Ձեր վստահելի աղբյուրը

Կենտրոնական ընտրական հանձնաժողովը հրապարակել է դեկտեմբերի 9-ին արտահերթ ընտրություններին մասնակցող քաղաքական ուժերի թեկնածուների ցուցակները։

Հիշեցնենք, որ ընտրություններին մասնակցում է 11 քաղաքական ուժ՝ 2 դաշինք, 9 կուսակցություն։ Ինչպես արդեն տեղեկացրել ենք՝ 11 քաղաքական ուժերից միայն մեկի ցուցակն է կին գլխավորում, Քաղաքական ուժերից երեքն են, որ կանանց տեղ են հատկացրել երկրորդ հորիզոնականում՝ ՀՀԿ-ն, «Լուսավոր Հայաստան»-ն ու Քրիստոնեա-դեմոկրատական կուսակցութունը։

Առավել մեծ թվով թեկնածուներ ընդգրկված են «Իմ քայլը» դաշինիքի ցուցակում, ապա՝ ԲՀԿ-ի ու «Սասնա ծռեր»-ի։

Այսպես.

ՀՀԿ ցուցակում 127 թեկնածու կա, ինչպես հայտնի է առաջին եռյակում են Վիգեն Սարգսյանը, Արփինե Հովհաննիսյանը, Դավիթ Շահնազարյանը։

Քաղաքացու որոշում Սոցիալ Դեմոկրատական կուսակցության ցուցակում 81 թեկնածու կա, Առաջին եռյակում են Սուրեն Սահակյանը, Արտակ Կիրակոսյանը, Ռուզաննա Տոռոզյանը։

ՀՅԴ ցուցակում 152 թեկնածու կա, առաջին եռյակում են Արմեն Ռուսատմյանը, Արսեն Համբարձումյանը, Արթուր Խաչատրյանը։

«Իմ քայլը» դաշինքի ցուցակում 183 թեկնածու կա, առաջին տեղում Նիկոլ Փաշինյանն է, երկրորդում՝ Արարատ Միրզոյանը, երրորդում ՝ Լենա Նազարյանը։

«Լուսավոր Հայաստան» կուսակցության ցուցակում 157 թեկնածու կա, առաջին եռյակում կուսակցության նախագահ Էդմոն Մարուքյանն է, երկրորդում՝ Մանե Թանդիլյանը, ապա՝ Արման Բաբաջանյանը։

Քրիստոնեա-ժողովրդական վերածնունդ կուսակցության համապետական ցուցակում 85 թեկնածու է ներկայացված, առաջին եռյակում են Լևոն Շիրինյանը, Մարիամ Մանուկյանը, Գևորգ Հովսեփյանը։

Ազգային Առաջընթաց կուսակցության  ցուցակում 84 թեկնածու կա, միակ քաղաքական ուժն է, որի համապետական ցուցակը կին է գլխավորում, առաջին տասնյակում էլ չորս կանայք կան։ Առաջին եռյակում են՝ Լուսինե Հարոյանը, Սամվել Մելիքյանը, Արամ Մանուկյանը։

«Մենք» դաշինքը, որի կազմում են «Հանրապետություն» և «Ազատ դեմոկրատներ» կուսակցությունը 134 թեկնածու է ներկայացրել, առաջին եռյակում են կուսակցությունների նախագահները՝  Արամ Սարգսյանը և Խաչատուր Քոքոբելյանը, «Ազատ դեմոկրատներ»-ի փոխնախագահ Անժելա Խաչատրյանը։

Օրինաց երկիր կուսակցության համապետական ցուցակում  132 թեկնածու կա, առաջին եռյակը վերջին տարիներին անփոփոխ է՝ Արթուր Բաղդասարյան, Մհեր Շահգելդյան, Հեղինե Բիշարյան։

Սասնա Ծռեր կուսակցության ցուցակում 174 թեկնածու կա, առաջին եռյակում են Վարուժան Ավետիսյանը, Ստեփան Գրիգորյանը, Գարեգին Չուգասզյանը։

ԲՀԿ ցուցակում 176 թեկնածու կա, եռյակում են Գագիկ Ծառուկյանը, Միքայել Մելքումյանը, Արթուր Գրիգորյանը։

Հիշեցնենք, որ նախընտրական քարոզարշավը կմեկնարկի նոյեմբերի 26-ին։