Ձեր վստահելի աղբյուրը

«Ատոմային էներգետիկայի շուկայում կան կոնկրետ առաջարկներ ունեցող ռուսական, չինական և ֆրանսիական ներդրողներ, որոնց հետ բանակցություններ են տարվում։ Պետք է ուսումնասիրենք բոլոր առաջարկները և կախված դրանց գրավչությունից, ինչպես նաև մեր պայմանների հետ համատեղելիությունից՝ որոշում կայացնենք», -«Երևանի ՋԷԿ»-ում լրագրողների հետ այսօր տեղի ունեցած հանդիպմանն ասաց ՀՀ էներգետիկ ենթակառուցվածքների և բնական պաշարների նախարարի պաշտոնակատար Գարեգին Բաղրամյանը։

Հարցին՝ երբևէ հնարավոր համարո՞ւմ է, որ Հայաստան առաքվող ռուսական գազի գինը բարձրանա՝ հաշվի առնելով «Գազպրոմի» գլխավոր տնօրենի այն հայտարարությունը, որ լավ որակի գազի համար պետք է պատրաստ լինել ավելի վճարել, նախարարի պաշտոնակատարը պատասխանեց.

«Ես չեմ լսել՝ ինչպես է դա ասել, բայց եթե ի նկատի ունեք գազի ջերմատվության գործակիցը, ապա սահմանին գազի գնի գոյացման բանաձևում տրված է, որ սակագինը 7900 կկալ գազի ջերմատվության համար է։ Բանաձև կա, որ փաստացի ջերմատվությամբ գնի ճշգրտում է իրականացվում։ ՌԴ-ի հետ գազի գնի համաձայնագրում այդ բանաձևն անցած հինգ տարիների ընթացքում չէր կիրառվում ՝ անկախ նրանից, թե ինչ որակի գազ էր գալիս։ Այս փուլում մենք շարունակում ենք նաև այդ ուղղությամբ բանակցել, որպեսզի ջերմատվության գործակցի բանաձևը հետագայում ևս չկիրառվի»։

Գարեգին Բաղրամյանը նաև նկատեց, որ առաջիկա երկու-երեք տարվա ընթացքում ակնկալվում է վերականգնվող էներգետիկայի մասով առնվազն 100-120 մգՎատտ հզորությամբ արևային կայանի մրցութային փաթեթ ձևավորել և մրցույթ անցկացնել։

«Պիլոտային մի ծրագիր կա, որն ուզում ենք իրականացնել։ Հայաստանում վերջերս անցկացված էներգետիկ շաբաթվա ընթացքում խոսել ենք նաև «Սիմենսի» ներկայացուցիչների հետ, որոնք ասեցին, որ կդիտարկեն գրանտային գումարներով Հայաստանում փոքր կուտակիչ կայանի պիլոտային ծրագրի իրականացումը։ Արտադրված էներգինա «ջուրը չթափելու» համար արտահանում ենք Իրան, հետո անհրաժեշտության դեպքում կարող ենք նույն ծավալով հետ բերել։ Իրանը, մեծ հաշվով, մեզ համար կուտակիչ է հանդիսանում»,- ասաց Բաղրամյանը։

Անդրադառնալով Թեղուտի հանքը շահագործող նոր օպերատորի թեմային՝ Գարեգին Բաղրամյանը նշեց, որ օպերատոր դեռևս չկա. «Ինքը, գիտեք, գրավադրված է եղել ռուսական ВТБ բանկի կողմից, հիմա ակտիվներն անցել են նրան, և ВТБ-ի կողմից նոր օպերատոր պետք է նշանակվի»։

Լրագրողները Բաղրամյանից նաև հետաքրքրվեցին՝ Իրանի հետ համատեղ Հայաստանի էներգետիկ ծրագրերը պատժամիջոցների մասով որևէ մեկին չե՞ն անհանգստացրել։

«Մի քանի օր առաջ հանդիպել ենք ԱՄՆ պետդեպարտամենտի ներկայացուցիչների հետ և հանգամանալից ներկայացրել, որ քանի դեռ ունենք փակ սահմաններ, մեր էներգահամակարգը զարգացել է Իրանի ուղղությամբ։ Իրանի էլեկտրահաղորդման գծերի հետ փոխանակումները մեզ համար շատ կարևոր են և իրենց կողմից էլ կա այդ պատկերացումը։ Իրենք էլ են դա հասկանում»,- նշեց նախարարի պաշտոնակատարը։