Ձեր վստահելի աղբյուրը

ԱԺ «Ելք» խմբակցության ղեկավար Լենա Նազարյանն այսօր լրագրողների հետ ճեպազրույցում անդրադարձավ Մամուլի Ազգային ակումբի նախագահ Նարինե Մկրտչյանի հոդվածին, որտեղ նա հայտնել էր, թե իրեն առաջարկել են ընդգրկվել «Իմ քայլը» դաշինքի համամասնական ցուցակում, կանչել են կուսակցություն և հարցաքննել՝ ինչպես է պատկերացնում իր համագործակցությունը ՔՊ-ի հետ։

«Մենք հանդիպել, շատ բարյացկամ միջավայրում զրուցել ենք հարյուրավոր մարդկանց հետ, ովքեր մեր ցուցակով պատգամավորության թեկնածու լինելու ցանկություն են հայտնել։  Քաղաքավարի զրուցել ենք բոլորի հետ, ստացել ենք պատասխանները և բարեկամաբար հրաժեշտ ենք տվել։ Դա ընդամենը ընկալման հարց է տիկին Մկրտչյանի կողմից»,- ասաց Լենա Նազարյանը։

Մեկ այլ հարցի, թե Նարինե Մկրտչյանը դա որակել էր որպես հավատաքննություն, պատգամավորը պատասխանեց. «Հաշվի առնելով ներկա իրողությունը, իմանալով, որ տիկին Մկրտչյանը շատ բացասական տրամադրվածություն ունի ԵԱՏՄ-ի հետ կապված հարցերի նկատմամբ՝ մեզ հետաքրքրել է նրա պատասխանը: Ես չգիտեմ՝ ինչպես է նա հրավերը ստացել, եղել են տարբեր թեկնածուներ, որոնց հետ զրուցել ենք, այդ զրույցների ընթացքում պարզել ենք, որ տարբեր ճանապարհներ ունենք անցնելու և չենք կարող միասին համագործակցել»։

Լրագրողների դիտարկմանը, թե այսինքն՝ այլակարծությունը չի՞ հանդուրժվում ՔՊ-ում «Ելք» խմբակցության ղեկավարը պատասխանեց. «Ինչո՞ւ չի հանդուրժվում, ինչո՞ւ եք կարծում, որ հենց դա է եղել պատճառը: Ես հետաքրքրվել եմ՝ որ այդպիսի վառ արտահայտված բացասական վերաբերմունք կա, դա չի՞ խանգարի նրան հետագայում լինել մի քաղաքական թիմի կազմում, որն, ըստ էության, շարունակում է նույն արտաքին քաղաքականությունը, ինչ եղել է: Ես էթիկապես ճիշտ չեմ համարում բացահայտել նրա պատասխանը, նաև էթիկապես ճիշտ չեմ համարում, որ նա է բացահայտել մեր խոսակցությունը։ Ոչ մի վիրավորական բան նրա հասցեին չի եղել։ Այն, որ տիկին Մկրտչյանը չի ընդգրկվել մեր ցուցակում, երևի դա է պատճառը եղել, որ նա նման հրապարակում է արել»։

Նա հավելեց, որ իրենց թեկնածուներին ընդգրկելիս տարբեր հանգամանքներ են հաշվի առել։