Ձեր վստահելի աղբյուրը

«2018 թվականի հուլիսի 1-ին էներգետիկայի մասին օրենքում փոոխություններ են ընդունվել։ Ըստ նոր օրենքի՝ նախատեսվում է բարելավել էներգետիկ շուկայի մոդելը, և մինչև 2021 թվականը մեկ գնորդ-վաճառող մոդելից անցում կատարվել առավել ազատական մոդելի։ Հիմնական փոփոխությունները նոր մատակարարների ինստիտուտի ներմուծումն է էներգահամակարգ։ Ստեղծվելու է մրցակցային դաշտ»,- «Երևանի ՋԷԿ»-ում այսօր տեղի ունեցած մամուլի ասուլիսի ժամանակ հայտարարեց ՀՀ էներգետիկ ենթակառուցվածքների և բնական պաշարների նախարարի պաշտոնակատար Գարեգին Բաղրամյանը:

«Նոր՝ թրեյդերների ինստիտուտ է մտնում։  Ցանկացած օղակ պատասխանատու է լինելու իր առաջացրած խնդիրների համար։ Նախատեսվում է նոր շուկայի մոդելի արդյունքում ստեղծել միջսահմանային առևտրի ավելացում, որը հնարավորություն կստեղծի ներմուծել ավելի էժան էլեկտրաէներգիա»,- ասաց նա։

Անդրադառնալով վերջին վեց ամիսների ընթացքում կատարված աշխատանքներին՝ Գարեգին Բաղրամյանը նշեց, որ վերջերս ստորագրվել է Երևանի ՋԷԿ-ի տարածքում նոր համակցված շոգեգազային ցիկլով էներգաբլոկի կառուցման համաձայնագիր. «Այդ ծրագիրը քննարկվում էր երկու տարի։ Բավական բարձր ՕԳԳ-ով կայան է կառուցվելու, այն ամենաէժան ջերմակայանն է լինելու, կառուցման ընթացքը կտևի 26 ամիս, շինարարության մեջ կներգրավվի 1200 աշխատող, այնուհետ էներգաբլոկը կունենա 250 աշխատող»։

Նախարարի պաշտոնակատարը տեղեկացրեց, որ մեծ տեմպերով շարունակվում են ատոմակայանի կյանքի երկարաձգման աշխատանքները։ Մի քանի օրից կգործարկվի նոր տուրբինը, ինչի արդյունքում կունենանք ևս 20 Մգվատ հզորության ավելացում։ Հաջորդ տարի նախատեսվում է երկրորդ տուրբինի փոխարինում։

«Աշխատանքների ավարտին կունենանք մոտավորապես տասը տոկոս հզորության ավելացում։ Այս ընթացքում ստորագրվել է նաև Մասրիկի արևային կայանի կառուցման համաձայնագիրը։ Նախատեսվում է 55 մեգավատանոց արևային կայանի կառուցում։ Բավական մրցունակ գին է առաջարկվել՝ 4.19 ցենտ։ Եթե մի քանի տարի առաջ խոսում էինք, որ 80-100 դրամ պետք է լինի 1 ԿՎատտ սակագինը՝ արևային էլեկտրակայան կառուցելու համար, ապա այսօր ստացել ենք մրցութային առաջարկ՝ շուրջ 20 դրամ ԿՎատտի համար»,- նշեց նախարարի պաշտոնակատարը՝ շեշտելով, ապագայում առավել շահավետ առաջարկների հույս ունեն։

Հաջորդ հարցին՝ գործող իշխանությունների մոտ ինչ հեռանկարներ կան նոր ատոմակայանի առնչությամբ, Գարեգին Բաղրամյանը պատասխանեց՝ 2019 թվականի կեսերին կավարտեն ամբողջ էներգահամակարգի զարգացման հեռանկարը՝ 2020-2040 թվականների համար:

«Նախ պետք է հասկանալ՝ ինչպես է զարգանալու էներգահամակարգը։ Հիմքում դրվում է նվազագույն ծախսերով, օպտիմալ համակարգ ունենալու գաղափարը: Գործող ատոմակայանի աշխատանքը 10 տարի երկարաձգելուց հետո կարող եմ ասել, որ նմանատիպ ատոմակայանները արդեն ունեն պրակտիկա մինչև 60 տարի շահագործման, այսինքն ստացել են ՄԱԳԱՏԷ-ի կողմից թույլտվություն մինչև 60 տարի շահագործվելու համար: Երբ որ լրանալու լինի մեր տասը տարվա ատոմակայանի ծառայության ժամկետը, բնականաբար, պետք է իրականացվի ռեակտորի մանրամասն ուսումնասիրություն և եթե պարզվի, որ ռեակտորի կյանքի տևողությունն իրեն չի սպառել, կստանանք բոլոր համապատասխան թույլտվությունները՝ առաջնահերթությունը դնելով անվտանգության վրա։ Որովհետև ատոմակայանի անվտանգությունն այսօր ավելի է բարձրացել,քան նախկինում էր։ Եթե կապացուցվի, որ ռեակտորն իր ժամկետը չի սպառել, ապա ևս ինչ-որ ժամկետով կերկարաձգվի, իսկ թե ինչքան, ցույց կտան ուսումնասիրությունները:

Ինչ վերաբերվում էնոր ատոմակայանի կառուցմանը, ապա մեր օրակարգում է նաև այդ հարցը, և ես անձամբ կարծում եմ, որ մենք պետք է հետագայում շարունակենք լինել որպես ատոմային էներգետիկա ունեցող երկիր։ Ներկայումս քննարկվում են միջազգային ատոմային շուկայում և կան նոր մոդուլյար էներգաբլոկներ, որոնց անվանական հզորությունները ցածր են, և իրենք կարելի է ասել ավելի ճկուն են։ Մեր համակարգի համար, և նմանատիպ ատոմակայանները ավելի տեղին կլինեն: 3-5 տարվա ընթացքում նախատեսվում է նման մոդուլյար էներգաբլոկների արտադրության մեկնարկ, և բնականաբար, մեր ուշադրության կենտրոնում է, թե ինչ գնով և ինչ պայմաններով կարող ենք նմանատիպ էներգաբլոկներ ներդնել Հայաստանում»,- ամփոփեց  նախարարի պաշտոնակատարը:

Հանքարդյունաբերության ոլորտ

Ինչ վերաբերում է հանքարդյունաբերության ոլորտին, ապա Գարեգին Բաղրամյանի խոսքով, 127 ընկերության ներկայացվել է համապատասխան զգուշացում պարտավորությունները կատարելու վերաբերյալ։ Արդեն վերականգնվել է 134 միլիոն դրամ, 28 ընկերություններից 23-ի նկատմամբ զգուշացումներ են եղել, իսկ հինգի՝ ընդերքի օգտագործման իրավունքները դադարեցվել են։ Նախարարի պաշտոնակատարը, սակայն, չկոնկրետացրեց, որ հինգ ընկերությունների մասին է խոսքը։

«Շատ ակտիվ աջակցում ենք «KFW բանկի հետ՝ Հայաստանն-Վրաստան էլեկտրահաղորդման գծի հարցերով. դրա շինարարությունն այս պահին չի մեկնարկել։ Մենք շինարարությունը դադարեցրել էինք ուսումնասիրությունների համար։ Շարունակվում են աշխատանքները Իրան-Հայաստան երրորդ էլեկտրահաղորդման գծի կառուցման մասով։ Բացի այդ՝ բոլոր պետական ձեռնարկություններում այսօր իրականացվում է հաստիքացուցակների և աշխատողների վերանայում, օպտիմալացում, ուսումնասիրվում են գործող սակագներում ներառված ծախսերը, գնումների ընթացակարգերը։ Որևէ ավելորդ ծախս բացառվելու է»,- ասաց նախարարի պաշտոնակատարը։