Ձեր վստահելի աղբյուրը

ՀՀ ԱԺ աշխատակազմի ղեկավար-գլխավոր քարտուղար Արա Սաղաթելյանը հանդես է եկել ողջույնի խոսքով Երևանում ընթացող «ԶԼՄ-ների և քաղաքացիական հասարակության ներգրավվածությունը  ֆինանսական վերահսկողության հարցերի շուրջ» թեմայով միջազգային կոնֆերանսում, որը կազմակերպել է Գերմանիայի միջազգային համագործակցության ընկերության (ԳՄԸՀ-GIZ) հայաստանյան գրասենյակը՝ Վեսթմինսթերյան հիմնադրամի (WFD) օժանդակությամբ:

ՀՀ ԱԺ լրատվության և հանրության հետ կապերի վարչության փոխանցմամբ՝ Արա Սաղաթելյանը փաստել է, որ Հայաստանում կիսանախագահականից խորհրդարանական համակարգի անցման արդյունքում խորհրդարանի դերի  բարձրացմանը զուգընթաց Ազգային ժողովի գործունեության մեջ ԶԼՄ-ների և քաղաքացիական հասարակության ներկայացուցիչների պատշաճ և ավելի ակտիվ ներգրավվածության հետ կապված խնդիրները առավել քան արդիական են:

«Կառավարման խորհրդարանական համակարգի ներդրման արդյունքում մեծացել է Ազգային ժողովի դերը որոշումների կայացման գործընթացում, ինչպես նաև ավելացել է պատասխանատվության բեռը՝ արտաքին և ներքին քաղաքական օրակարգերի ձևավորման ու նոր մարտահրավերների դիմակայման հարցում: Բնականաբար, խորհրդարանի գործունեության արդյունավետությունն այս ադապտացիոն փուլում ուղղակիորեն պայմանավորված է լրատվամիջոցների և քաղաքացիական հասարակության ներկայացուցիչների հետ արդյունավետ փոխգործակցությամբ՝ համագործակցությունից մինչև տրամագծորեն հակառակ տեսակետների արտահայտում և հիմնավորում բոլոր այն իրավիճակներում, որտեղ առանցքային է հանրային շահը»,- ասել է Արա Սաղաթելյանը:

Ըստ ՀՀ ԱԺ գլխավոր քարտուղարի՝ ակնառու է, որ Հայաստանի խորհրդարանի աշխատանքներում քաղհասարակության ինստիտուտի ներգրավվածությունն աճում է:

«Փոխգործակցության սերտացման մասին է վկայում վիճակագրությունը, ըստ որի՝ այս տարի նախորդ տարվա համեմատ Հայաստանի խորհրդարանում կտրուկ աճել է հանրային լսումների թիվը,  միաժամանակ շարունակվում է հասարակական կազմակերպությունների ակտիվ համագործակցությունը ԱԺ ոլորտային հանձնաժողովների հետ: Ազգային ժողովում հստակ գիտակցում են ինստիտուցիոնալ գործակցման կարևորությունը, քանի որ քաղաքացիական հասարակության ներկայացուցիչներն ու մամուլը բարձրացնում են խնդիրներ, որոնց լուծումն անհրաժեշտ է պետության բնականոն գործունեության և անհատի, հասարակության ու պետության շահերի հավասարակշռության ապահովման համար: Մամուլն ու քաղհասարակությունը ևս մեկ կարևոր գործառույթ են իրականացնում.  արձանագրում են՝ ընդունված օրենքներն ինչ ազդեցություն են ունենում հանրային կյանքում և հետադարձ կապ են ապահովում»,- ասել է ԱԺ աշխատակազմի ղեկավարը:

Արա Սաղաթելյանը նշել է, որ լրատվամիջոցների հետ համագործակցության հարցում աշխատակազմի սկզբունքը հետևյալն է՝ «Մի հարցրու, թե ինչ են արել լրատվամիջոցները քեզ համար, այլ հարցրու՝ ինչ ես արել դու նրանց համար»:

«Այս տարի խորհրդանում ԶԼՄ ներկայացուցիչների համար մամուլի օթյակի հարակից տարածքներում հատուկ միջավայրեր են ձևավորվել, բացի այդ՝ ժամանակակից տեխնիկայով ու սարքավորումներով հագեցած մամուլի ակումբ է ստեղծվել, որտեղ մեր լրագրողները կարող են աշխատել, հանգստանալ, անցկացնել քննարկումներ և դասընթացներ՝ ոչ ֆորմալ միջավայրում: Մի խոսքով՝ ստեղծվել են պայմաններ, որոնք երբևէ չեն եղել: Խորհրդարանի տարածքում լրագրողների աշխատանքի տեխնիկական պայմանների ապահովման և ԱԺ մամուլի ծառայության ստորաբաժանումների արդիականացման համար 2017թ.-ին ԱԺ խնայողությունների հաշվին 8 մլն 500 հազար դրամ է ծախսվել, իսկ 2018թ.-ին՝ 12 մլն դրամ: Այդ գումարներն օգտագործվել են լրագրողների համար նախատեսված մամուլի ակումբի շինարարական աշխատանքների իրականացման, տեխնիկական վերազինման համար: Առաջիկայում դարձյալ խնայողությունների հաշվին նախատեսում ենք ևս 19 մլն դրամ հատկացնել՝ մամուլի ծառայության համար նոր տեխնիկայի ձեռքբերման համար»,- ասել է Սաղաթելյանը:
 
ԱԺ աշխատակազմի ղեկավարը հիշեցրել է, որ հանրային միջոցների կառավարման և դրանց ծախսերի վերահսկման հիմնական սկզբունքներից մեկը վերահսկողություն իրականացնող կառույցների ոչ միայն լավ աշխատանքն է, այլև այդ լավ աշխատանքի մասին պատշաճ հանրային իրազեկումն է, իսկ հանրությանը տեղեկացնելու և պրոցեսներում ներգրավվելու լավագույն մեխանիզմը թափանցիկությունն ու ակտիվ համագործակցությունն Է ԶԼՄ-ների ու քաղաքացիական հասարակության հետ:

«Վերջերս ես Ուկրաինայում մասնակցում էի Արևելյան գործընկերության երկրների խորհրդարանների աշխատակազմերում բարեփոխումների մարտահրավերների և վերլուծական կենտրոնների աշխատանքների կազմակերպման վերաբերյալ GIZ-ի կոնֆերանսին, որտեղ հանդիպեցի ավագ գործընկերոջս՝ հաղորդակցման տեսության առաջատար ուկրաինացի փորձագետի հետ:  Ինչպես նա նշեց շատ բան է փոխվել սոցիալական գիտակցության և վարքի կառավարման ոլորտում, բայց մի բան մնում է անփոփոխ՝ եթե ուզում ես փոխել իրականությունը, նախ պետք է փոխես դրա մասնակիցների մտածողությունը: Նման միջոցառումները, իմ կարծիքով, ուղղված են մտածողության մոդեռնիզացմանն ու թարմացմանը, նոր գիտելիքների ձեռքբերմանը, դրանց կարևորության գիտակցմանը, փորձի փոխանակմանը և գործնական կիրառությանը: Վստահ եմ, որ այստեղ լավագույն փորձի փոխանակումը կհանգեցնի խորհրդարանների գործունեության ակտիվացմանը՝ մեդիաների և քաղհասարակության  հետ»,- նշել է Արա Սաղաթելյանը:

Ամփոփելով խոսքը՝ ՀՀ ԱԺ գլխավոր քարտուղարը շնորհակալություն է հայտնել միջոցառման կազմակերպիչներին Հայաստանում հանրային ֆինանսների վերահսկողության  զարգացմանն ուղղված ջանքերի համար՝ արդյունավետ աշխատանք մաղթելով ի բարօրություն մեր երկրների խորհրդարանների և հասարակությունների: