Ձեր վստահելի աղբյուրը

«Ականատես» դիտորդական առաքելությունը  երկարաժամկետ և կարճաժամկետ դիտորդություն է իրականացնելու դեկտեմբերի 9-ին կայանալիք ԱԺ արտահերթ ընտրությունների ժամանակ։ Այսօր առաքելության հիմնադիրներից Թրանսփարենսի Ինթերնեյշնլ հակակոռուպցիոն կենտրոնի գործադիր տնօրեն Սոնա Այվազյանը լրագրողներին ներկայացրեց իրենց երկարաժամկետ դիտորդության նախնական արդյունքները։

Նա ասաց, որ սկսել են դիտորդությունը նոյեմբերի 5-ից, դիտարկել են ընդհանուր գործընթացը, ձևավորել են որոշակի կարծիք, ցանկանում են ներկայացնել իրենց դիտարկումները, որոնք կարող են որոշ չափով  նախազգուշական դեր խաղալ հետագա նախընտրական ժամանակահատվածի համար։

Նախընտրական քարոզչության հետ կապված՝ ասաց.  «Պաշտոնական ժամանակահատվածը, որ նշված է, ոչ մի կերպ կարծես չի կանխարգելում, որպեսզի նախընտրական քարոզչություն փաստացի չծավալվի։ Ըստ մեր օրենսդրության, անօրինական չէ։ Իհարկե, մի քիչ հակասական է, միգուցե ապագայում օրենքի վերանայման  ժամանակ պետք է դրան անդրադառնել, ավելի իրատեսական սահմանվեն ժամկետները։ Ընդհանուր առմամբ, կարող ենք ասել, որ խոշոր խախտումներ չեն եղել»։

Ս. Այվազյանն ասաց, որ այս պահին գործընթացը նորմալ է, սակայն կոչ են անում կուսակցություններին  հետևել նախընտրական քարոզչության համար սահմանված կանոններին, նույնիսկ մինչև պաշտոնական քարոզչության սկսվելը, հետամուտ լինեն այդ նույն կանոններին, որպեսզի հակասական կարծիքների, մեկնաբանությունների տեղիք չտան։

Նա նշեց, որ ընտրակաշառքի հետ կապված իրենց դիտորդները որևէ դեպք չեն արձանագրել, թեև լրատվամիջոցներում առկա են նման լուրեր, մասնավորապես նորամուծություններ են առաջ եկել, օրինակ ստանդարտ կաշառք բաժանելու փոխարեն հիմա մարդկանց աշխատանքի են ընդունում։ 

Վարչական ռեսուրսի չարաշահման հետ կախված՝  Այվազյանն ասաց. «Վարչական ռեսուրսը դա քաղաքական պաշտոնյաների, հանրային ծառայողների տնօրինության տակ գտնվող իրավական, մարդկային, նյութական, ոչ նյութական ռեսուրսներն են։ Ընտրությունների ժամանակ դրանց օգտագործումը որևէ կուսակցության կամ դաշինքի օգտին, կարող է ստեղծել անհավասար մրցակցային  պայմաններ, կարող է ազդել ընտրությունների անդյունքների վրա։ Այդ առումով  վարչական ռեսուրսների օգտագործումն ընտրությունների ժամանակ խիստ քննադատելի են։ Լրատվամիջոցներում առկա են մի քանի նյութեր, որոնք մենք ստուգում ենք, չեն կարող հավաստել, բայց կոչ ենք անում պետական կառույցների ղեկավարներին նախ իրենք խուսափեն օգտագործել վարչական ռեսուրսներ, կոչ անեն աշխատողներին խուսափել օգտագործել վարչական ռեսուրսները»։

Նա նաև ասաց, որ իրավիճակը բավականին խաղաղ է, բայց արդեն իսկ նկատվում են կոչեր, որոնք իրենք գնահատում ենք որպես ատելության կոչ,  որը թիրախավորում է  մարդկանց կամ մարդկանց խմբերի իրենց կրոնական, սեռային, քաղաքական տարբերակող հատկանիշների  հիման վրա։

Թրանսփարենսի Ինթերնեյշնլ հակակոռուպցիոն կենտրոնի ծրագրի ղեկավար Վարուժան Հոկտանյանը խոսեց ընտրական ցուցակների մասին. «Կա ընդհանուր թերություն. Հայաստանից արտագաղթած, բայց Հայաստանի քաղաքացի հանդիսացողներն ընտրացուցակներում են, որի պատճառով ասում էին ուռճացված ընտրացուցակներ։ Եթե կա դա չչարաշահելու քաղաքական կամք, չպետք է խնդիր առաջացնի, եթե չկա այդպիսի կամք, նախորդ  իշխանության օրոք չկար, առաջացանում էր խնդիրներ։ Հույս ունենք, որ այս անգամ այդ խնդիրը, չի բերի չարաշահումների»։

Նշենք, որ  «Ականատես» դիտորդական առնաքելությունը  հիմնադրվել է 2018 թվականի օգոստոսին, հիմնադիրներն են «Թրանսփարենսի Ինթերնեյշնլ հակակոռուպցիոն կենտրոնը», Ժուռնալիստների «Ասպարեզ» ակումբը, «Ռեստարատ» նախաձեռնությունը։