Ձեր վստահելի աղբյուրը

«Բնականաբար, կոռուպցիա կա։ Կա այդ երևույթը վերացնելու քաղաքական կամք։  Ի վերջո աշխարհում չկա երկիր, որտեղ կոռուպցիա չկա, ամենամաքուր երկրներում էլ դա կա»,- լրագրողների հետ հանդիպմանն ասաց Թրանսփարենսի Ինթերնեյշնլ հակակոռուպցիոն կենտրոնի ծրագրի ղեկավար Վարուժան Հոկտանյանը՝ պատասխանելով հարցին, թե ինչպե՞ս եք գնահատում վարչապետի պաշտոնակատար Նիկոլ Փաշինյանը հայտարարությունը, որ Հայաստանում այլևս կոռուպցիա չկա, համամի՞տ եք այդ պնդման հետ։

«Այժմ չկա ցանկություն և վերևներից թելադրվող, որի արդյունքում ունեինք համակարգային կոռուպցիա։ Հույս ունեմ ընտրություններից հետո շատ ավելի լուրջ համակարգային կոռուպցիայի դեմ պայքար կմղվի։ Հայաստանի համար հիմնական խնդիրը մնում  է համակարգային կոռուպցիայից ազատվելը։ Սա առաջնահերթ խնդիր պետք է լինի, ոչ թե ընդհանրապես կոռուպցիան վերացնելը»,- ասաց Վ. Հոկտանյանը։

Նա վստահ չէ, որ ամենատարածված հայկական երևութը՝ խնամի-ծանոթ-բարեկամ, վերացել է։

«Հնարավոր է բյուջեներ թելանելու պրակտիկան վերջին ամիսներին չկա, դրական երևույթ է,  բայց չեմ կարծում, որ լիովին վերացել է գործի ընդունելը կաշառքով։ Այս երևույթները շատ ավելի լուրջ ուսումնասիրության կարիք ունեն։ Ենթադրում եմ վարչապետը նկատի ուներ այն, որ արվում է  ամեն ինչ, որպեսզի դա չլինի։ Փոքր երկիր ենք, բայց հնարավոր չէ այդ ամենը վերևից կարգավորելը,  շատ բան տեղերից էլ է կախված, հենց քաղաքացու մոտեցումներից, որքանով է հանդուրժող կոռուպցիայի նկատմամբ»,- ասաց Թրանսփարենսի Ինթերնեյշնլ հակակոռուպցիոն կենտրոնի ծրագրի ղեկավարը։