Ձեր վստահելի աղբյուրը

«Այն, ինչ տարիներով կատարվել է փոքր ՀԷԿ-երի ոլորտում, այլ բառով, քան այլանդակություն, չի կարելի անվանել»,- այսօր կառավարությունում ոռոգման խնդիրների հետ կապված քննարկման ժամանակ ասաց առաջին փոխվարչապետի պաշտոնակատար Արարատ Միրզոյանը:

«Ենթադրենք թույլտվություն ունեն իքս քանակի ջուր օգտագործելու, բայց 3-4 անգամ ավելի շատ են օգտագործում: Ունենք դեպքեր, երբ ՀԷԿ-ից ջուրը որևէ ձևով չի վերադարձվում գետ կամ ջրանցք, այլ ուղղակի գնում կորչում է այնպիսի հողերում, որոնք գյուղատնտեսական նպատակներով չեն շահագործվում: Հատկապես Ախուրյան և Եղեգիս գետերի վրա կատարվողը լրջագույն վերանայման և իրավապահ համակարգի ներգրավման ու ուսումնասիրման կարիք ունի»,- ընդգծեց Արարատ Միրզոյանը:

ՀՀ գլխավոր դատախազ Արթուր Դավթյանը տեղեկացրեց, որ 150 փոքր ՀԷԿ-երում  հայտնաբերված խախտումներով մեկ ամբողջական քրեական գործ է հարուցվել, այդ թվում՝ ջրաչափերի բացակայության հետ կապված:

Պետական վերահսկողության ծառայության ղեկավար Դավիթ Սանասարյանն էլ նշեց՝  ուսումնասիրություն են իրականացրել «Արտաշատի» ՋՕ-ում և խախտումներ հայտնաբերել. «Այստեղ խոսքը ոչ միայն ջրագողության մասին է, այլ նաև գյուղացիներից գումարներ են հավաքել և մուտք չեն արել բյուջե»:

Նրա խոսքով՝ մինչև գարուն ուսումնասիրություններ կիրականացնեն բոլոր ՋՕ-ում: