Ձեր վստահելի աղբյուրը

«Ես չեմ մերժում, որ Հայաստանում կամ որևէ երկրում եղել են կամ կան կոռուպցիոն դրսևորումներ, քանի որ չկա ինձ հայտնի որևէ երկիր, որտեղ կոռուպցիոն երևույթներ չկան»,- այսօր խորհրդարանում լրագրողների հետ ճեպազրույցում ասաց ԱԺ փոխնախագահ Էդուարդ Շարմազանովը։

«Եկան իշխանության ու հայտարարեցին, թե համատարած կոռուպցիա կա։ Հիմա վարչապետը նախագահի վերահսկողական ծառայության նախկին պետին, հարկայինի երկար տարիների պետին նշանակել է նախարարի շատ բարձր պաշտոնի, եթե նշանակել է ուրեմն այդ մարդը մաքուր է։ Եթե մարդը մաքուր է, ուրեմն այդ համակարգում կոռուպցիա չի եղել, եթե մաքուր չէ, ուրեմն ինքը խրախուսում է կոռուպցիան։ Պաշտպանության նախարարի առաջին տեղակալին նշանակել է նախարար, եթե նման նշանակում է արել, ուրեմն դա նշանակում է, որ բանակում չի եղել համատարած կոռուպցիա։ ԱԱԾ պետ նշանակել է Արթուր Վանեցյանին, շատ էլ լավ ա արել, բայց Վանեցյանը երկրորդական մարդ չի եղել, այլ եղել է ԱԱԾ Երևանի վարչության պետի տեղակալը։ Հունան Պողոսյանին, եթե նշանակում ես մարզպետ, ուրեմն ընդունում ես, որ ոստիկանությունում թալան չի եղել։ Իմիջիայլոց, ինչքան խելքը գլխին կադր ունի, մեր իշխանությունից են եկել», - ասաց Շարմազանովը։

Լրագրողների հարցին, թե ինչպես է քարոզարշավ իրականացնելու՝ նա պատասխանեց. «Ամեն ինչ էլ անելու եմ, լոռեցիքի հետ էլ եմ հանդիպելու, երգելու էլ եմ, պարելու էլ եմ, խոսելու եմ ժողովրդի հետ»։

Հարցին, թե հնարավոր է Փաշինյանի նախատեսած երթի պես երթ անի, ասաց. «Մեզ մոտ աշխատելն ավելի լավ է ստացվում, իր մոտ՝ երթը»։