Ձեր վստահելի աղբյուրը

Կառավարությունն այսօրվա նիստում հավանություն տվեց Հայաստանի Հանրապետության և Վերականգնման վարկերի բանկի միջև Հայաստանում կենսաբազմազանության և կայուն տեղական զարգացման ծրագրի 23 մլն 208 հազար եվրոյի չափով դրամաշնորհային համաձայնագրի ստորագրման առաջարկությանը:

ՀՀ բնապահպանության նախարարի պաշտոնակատար Էրիկ Գրիգորյանը նշեց, որ այս դրամաշնորհը բնապահպանության ոլորտում Հայաստանին հատկացված ամենախոշոր դրամաշնորհն է:

«Հայաստանում կենսաբազմազանության և կայուն տեղական զարգացման» ծրագրի տևողությունը նախատեսվում է 8 տարի, կապահովի կենսաբազմազանությամբ հարուստ տարածքներում բնական ռեսուրսների պահպանությունն ու կայուն օգտագործումը։

Դրամաշնորհային ծրագրի շրջանակներում նախատեսվում է իրականացնել պահպանվող տարածքների, բնական ռեսուրսների և բնական հուշարձանների բարելավում ու կառավարում, անտառների կայուն կառավարում, անտառային լանդշաֆտը և անտառները վերականգնելու միջոցառումներ, ընտրված հարակից համայնքներում սոցիալ-տնտեսական զարգացման միջոցառումներ,  էկոզբոսաշրջությունը խթանելու միջոցառումներ,  խորհրդատվական ծառայություններ։ 

Ծրագրի իրականացումը նախատեսվում է 4 հիմնական ուղղություններով՝ բազմաֆունկցիոնալ նպատակներով դիտարկվող կենսաբազմազանությամբ հարուստ տարածքների կայուն կառավարում
կենսաբազմազանությամբ հարուստ տարածքներում մարդկային գործոնի ազդեցության նվազեցում, շահագրգիռ կողմերի մասնակցությամբ միջոլորտային ներդրումների ուժեղացում, ընտրված տարածքների, բնության հատուկ պահպանվող տարածքների, անտառային տնտեսությունների վարչակազմի ֆինանսական կայունության ապահովում, ընտրված համայնքների սոցիալ-տնտեսական վիճակի բարելավում:

Հաշվի առնեով Կովկասի տարածաշրջանի, այդ թվում՝ Հայաստանի յուրահատուկ և հարուստ կենսաբազմազանությունը, որպես ծրագրի իրականացման վայր կընտրվեն կենսաբազմազանությամբ հարուստ տարածքները։ Թիրախային տարածքներն աշխարհագրորեն սահմանափակված չեն, այն հնարավոր է իրագործել Հայաստանի Հանրապետության ցանկացած վայրում:

Դրամաշնորհային համաձայնագրի կնքումը հնարավորություն կտա Հայաստանի Հանրապետությունում շրջակա միջավայրի պահպանության ոլորտում իրականացնել հստակ արդյունքներին ուղղված լայնածավալ միջոցառումներ:

ՀՀ վարչապետի պաշտոնակատար Նիկոլ Փաշինյանը նշեց, որ այս դրամաշնորհն ուղղվելու է ոչ միայն անտառների վերականգնմանը, կենդանատեսակների պահպանմանը, այլ նաև որոշակի բնապահպանական ուղղվածությամբ՝ սոցիալ տնտեսական ծրագրերին:

Նրա խոսքով՝ դրամաշնորհն ունի նաև այնպիսի կոմպոնենտ, որ որոշակի տարածաշրջաններում քաղաքացիներին աջակցություն են տրամադրում, որպեսզի ձերբազատվեն անտառահատումից՝ որոշակի գործարար ձեռներեցությամբ զբաղվելով և այսպիսով՝ երկու խնդիր կլուծեն:

Էրիկ Գրիգորյանը համաձայնեց՝ նշելով, որ ժամանակակից բնապահպանական կառավարումն՝ առանց սոցիալ տնտեսական բաղադրիչի, ուղղակի չի կարող լինել:

Փաշինյանն էլ ասաց, որ գործող կառավարության նպատակաուղղվածությունը և ռազմավարական ուղղվածությունը Հայաստանի կենսաբազմազանությունը պահպանելը և զարգացնելն է. «Մենք առաջնորդվում ենք էկո Հայաստանի  տրամաբանությամբ, ինչը նշանակում է, որ բնապահպանական հարցերով լինելու ենք նախանձախնդիր»:

Ինչ վերաբերում է հանքարդյունաբերությանը, վարչապետի պաշտոնակատարը նշեց, որ իրենք չեն ասում, թե հանքարդյունաբերություն Հայաստանում չպետք է լինի, այլ ասում են, որ պետք է այն իրականացվի միջազգային ամենաբարձր ստանդարտներով և հետևողական քայլեր են ձեռնարկելու՝ Հայաստանում այդպիսի ստանդարտներ հաստատելու համար:

«Եթե, օրինակ, միջոցներ են ձեռնարկվում, որ սիգի որսը ձվադրման սեզոնում սահմանափակվի, կամ անտառների պաշտպանվածության մակարդակը բարձրանա, ո՞ւմ համար ենք անում, մե՞նք ենք գնալու որսանք, նույն տարածաշրջանի մարդիկ են որսալու: Ինչ-որ արվում է՝ առաջին հերթին այդ տարածաշրջանում ապրող մարդկանց շահերից է ելնում: Մենք պետք է ուղիղ երկխոսություն սկսենք մեր հայրենակիցների հետ, որ այն ընկալումը՝ ինչպիսին կա բնապահպանների մոտ, նույնպիսի զգացողությամբ իրենք վերաբերվեն շրջակա միջավայրին»,- ասաց Նիկոլ Փաշինյանը:

Նա նաև նշեց՝ քաղաքացիներին պետք է ցույց տալ, որ անտառ չկտրելով ավելի շատ կարող են օգուտ ստանալ, քան կտրելով: Փաշինյանը տեղեկացրեց, որ օրինակ, քաղաքացիներին 55 հազար խմ վառելափայտ է անվճար տրամադրվել՝ առանց անտառին վնասելու: