Ձեր վստահելի աղբյուրը

«2016 թվականին տեղի ունեցածը մեր բոլորի համար շոկ էր։ Բոլորս գիտեինք, որ գործարարներին լրացուցիչ հարկման՝ ռենտային  տակ էին դրել։ Դա սովորաբար ներկայացվում էր, որ մենք կարևորագույն պաշտպանական խնդիրներ ունենք ։ Բայց ապրիլյան պատերազմի ժամանակ պարզվեց, որ մենք ուղղակի մերկ ենք, և այդ գումարները չեն օգտագործվել այն նպատակով, ինչի համար որ տրվել են, որ գրպանված գումարներն իրենց նպատակին չեն ծառայել»,- Հայաստանի տնտեսության զարգացման արդի հիմնախնդիրները և ռազմավարական ուղղությունները խորագրով այսօր տեղի ունեցած խորհրդաժողովի ժամանակ ասաց տնտեսագետ Վահագն Խաչատրյանը։

«Միգուցե Ադրբեջանն էլ էր այդ հանգամանքը հաշվի առել, բայց ՀՀ արժանապատիվ քաղաքացին պաշտպանեց ինքն իրեն և հաղթեց»,- ասաց նա։

Անդրադառնալով այս տարվա ապրիլին տեղի ունեցած քաղաքական իրադարձություններին՝ Վահագն Խաչատրյանը նշեց, որ իր համոզմամբ՝ տեղի է ունեցել հեղափոխություն։

«Բոլոր այլ ձևակերպումները շահարկումներ են։ Տեղի է ունեցել հեղափոխություն, որը դեռևս շարունակվում է, որովհետև այն հեղափոխությունը, որի արդյունքում տեղի է ունեցել իշխանափոխություն, մեր ուղեղներում, մեր մոտեցումներում դեռևս տեղի չի ունեցել։ Մենք 2013-ին կամ 2015-ին լուռ համակերպվել էինք, որ իշխանությունը, հերթական անգամ մեզ զրկելով արժանապատվությունից, գոնե 2018-ին գնալու է։ Չգնաց և ստացավ այն, ինչ ստացավ։

Ես ուրախ և երջանիկ եմ, որ ի վերջո ազատությունը վերադարձվեց մեզ։ Ես հիմա շատ ազատ մարդ եմ, գործարարները ևս այդ ազատությունը պետք է զգան։ Բայց արդյոք մենք պատրա՞ստ ենք ազատությունը գնահատել և այդ ազատության պայմաններում գործել»,- նշեց բանախոսը։

Տնտեսագետը հույս հայտնեց, որ ազատության և մրցակցային պայմաններում շուկայական տնտեսության նորմերը սկսելու են գործել։