Ձեր վստահելի աղբյուրը

«Հայաստանում տեղի ունեցած թավշյա հեղափոխությունը ոչ միայն ներքաղաքական իրավիճակը փոխեց, այլ նաև նոր հնարավորություններ բացեց տարածաշրջանային մետամորֆոզների համար»,-«2018. Հարավային Կովկասի համար բեկումնայի՞ն տարի» միջազգային կլոր սեղանի ժամանակ այսօր ասաց ՀՀ ազգային անվտանգության խորհրդի քարտուղար Արմեն Գրիգորյանը։

«Ասվածի համատեքստում հատկապես կարևոր է Արցախյան հարցում լարվածության թուլացումը, որն արդյունք է Հայաստանի և Ադրբեջանի ղեկավարների բանավոր բանակցությունների։ Հեղափոխությունից հետո շփման գծում մենք աննախադեպ հանգիստ վիճակ ենք արձանագրում»,- ասաց նա։

Անդրադառնալով հայ-ռուսական հարաբերություններին՝ ԱԽՔ քարտուղարը  նշեց, որ բարձր մակարդակով այդ հարաբերությունները շարունակում են զարգանալ և խորանալ։

Ինչ վերաբերում է հայ-վրացական տնտեսական հարաբերությունններին, Արմեն Գրիգորյանը նկատեց, որ երկու երկրների ապրանքաշրջանառությունը զգալի մեծացել է. «Ընդհանուր առմամբ, տարին կարելի է բեկումնային համարել»։

Խոսելով իր ռուս գործընկերոջ՝ Նիկոլայ Պատրուշևի հետ հանդիպման մասին՝ ԱԽՔ քարտուղարն ասաց, որ վերջինիս հետ հանդիպել է երեք անգամ, առաջին հանդիպումը նա գնահատեց ճանաչողական, իսկ ահա երկրորդ և երրորդ հանդիպումներն՝ արդեն աշխատանքային։

Արմեն Գրիգորյանը հավաստիացրեց, որ Հայաստանի և Ռուսաստանի անվտանգության խորհուրդների միջև կապերն ակտիվորեն զարգանում են, մասնավորապես աշխատանքային պլաններ կան ինչպես 2019, այնպես էլ արդեն 2020 թվականի համար։

«Սա հարաբերությունների զարգացման համար կարևոր գործոն է։ Կան դրական միտումներ, և բանակցությունների ընթացքում քննարկված հարցերից որոշներն արդեն լուծում են գտնել»,- ասաց նա։