Ձեր վստահելի աղբյուրը

«Դեկտեմբերի 9-ին սպասվում են արտահերթ խորհրդարանական ընտրություններ և այդ «արտահերթ» բառը նկարագրում է մեր վիճակը, որ մենք արտահերթ պրոցեսների մեջ ենք, որ մենք ուղղակի սպասելու ժամանակ չունենք»,- այս մասին այսօր Սյունիքի մարզի Ագարակ քաղաքում ընտրողների հետ հանդիպման ժամանակ ասաց  «Լուսավոր Հայաստան» կուսակցության նախընտրական ցուցակը գլխավորող Էդմոն Մարուքյանը:

Նա նշեց, որ չի ցանկանում խոսել խնդիրներից ու անցյալից, հիմա պետք է խոսել միայն ապագայի մասին:

«Իսկ ապագան, ըստ էության, ձեր ձեռքերում է: Դեկտեմբերի 9-ին յուրաքանչյուրդ ձեր մեկ ձայնով որոշելու եք բոլորիս ապագան, այսինքն՝ առաջիկա 5 տարիներին ինչպիսի պառլամենտ ենք ունենալու: Սա նշանակում է, որ հնարավորություն ունենք այս ընտրություններով ձևավորել այնպիսի պառլամենտ, որ մենք այլևս կարիք չունենանք որևէ հեղափոխության»,- նշեց Էդմոն Մարուքյանը:

Նրա խոսքով՝ երկար տարիներ պետությունը մարդկանց հնարավորություն չի տվել, որ նրանք կարողանան «ձուկ բռնել», այլ «ձուկ» են տվել մարդկանց՝ ասելով, թե այն «կերեք», բայց «ձուկ բռնել» չսովորեք:

«Եթե «ձուկ բռնել» սովորեք, կսկսեք ձեր գլուխը պահել, իսկ որ ձեր գլուխը պահեք, 10 հազար դրամին չեք նայի և կգնաք այնպես ընտրություն կկատարեք, որ մենք այլևս չենք լինի»,- ասաց Մարուքյանը:

Այսօր, ըստ նրա, պետությունը պետք է ամեն ինչ անի, որ  քաղաքացին ունենա հնարավորություններ՝ ինքնազբաղվածությամբ, նոր ստեղծված աշխատատեղերով, լավ կրթությամբ ինքն իրեն իրացնի, այլ ոչ թե գնա ու իր պոտենցիալն իրացնի Ռուսաստանում, ԱՄՆ-ում, Եվրոպայում. «Ով դուրս է գալիս Հայաստանից, դառնում է հաջողակ, որովհետև այնտեղ այնպիսի պայմաններ են ստեղծված, որ մարդ կարողանում է իրեն իրացնել»:

Էդմոն Մարուքյանն ասաց, որ իրենց նախընտրական ծրագրում նշված են այն բոլոր քայլերը, որոնց իրագործման արդյունքում քաղաքացիները արժանապատիվ կյանք կունենան: Նրա խոսքով՝ թեև իրենց կուսակցությունը երեք տարվա պատմություն ունի, բայց այդ ժամանակահատվածում այնքան բանի են հասել, որ և հանրությունն է իրենց ճանաչում, և իրենց անցած ճանապարհով հպարտություն են ներշնչում:

«Մենք՝ երեսներս պարզ, ճակատներս բաց, կանգնում ենք քաղաքացիների առջև: Դուք ունեք հնարավորություն՝ ձեր քվերակությամբ «Լուսավոր Հայաստանը» ապագա խորհրդարանում լինի ամենախոշոր խմբակցություններից: Այդ խմբակցության գործունեության արդյունքում է, որ մենք կունենանք այն Հայաստանը, որտեղ մարդը չի մտածի արտագաղթելու մասին, չի մտածի իր երազանքներն այլ երկրներում իրացնելու մասին, այլ կմնա Հայաստանում և կշենացնի իր երկիրը»,- նշեց Էդմոն Մարուքյանը: