Ձեր վստահելի աղբյուրը

Ներքաղաքական կայունություն չի հաստատվի

«Դեռ մինչև ընտրությունները ես ասել եմ, որ արտահերթ ընտրություններում որևէ լավ բան չի լինելու, քանի որ այս ընտրությունների արդյունքում Հայաստանում չի հաստատվելու ներքաղաքական կայությունուն։ Երկրորդ, ընտրությունների արդյունքները լավագույն դեպքում ներկայացնելու են մեր հասարակության քաղաքական խճանկարն այդ պահին, այսինքն մեկ-երկու ամիս անց՝ այն լինելու է  լրիվ ուրիշ»,- այսօր տեղի ուենցած մամուլի ասուլիսի ժամանակ համոզմունք հայտնեց ՀՀԿ ընտրացուցակի երրորդ հորիզոնականը զբաղեցնող պատգամավորության թեկնածու Դավիթ Շահնազարյանը։

«Վստահ եմ՝ բոլորդ լավ հիշում եք, որ իշխանությունների նախագծած ընտրական օրենսգիրքը և արտահերթ ընտրությունների որոշում ընդունելու հարցը գրեթե միաժամանակ էին դրվել ԱԺ-ում։ Իրականում սա արդեն լուրջ կասկածի տակ էր դնում ընտրությունների լեգիտիմությունը, քանի որ այդ որոշումը մեկ մարդու որոշում էր, որը փաթաթվեց հասարակության վզին»,- ասաց բանախոսը։

ՀՀԿ-ի երկու քայլը
Դավիթ Շահնազարյանն ընդգծեց, որ ՀՀԿ-ն, ի շահ Հայաստանի, արել է երկու կարևոր քայլ։

«Առաջինը, այն, որ այսօր իշխող վարչախումբը և նրա պարագլուխն ամեն օր շեշտում են, որ տեղի է ունեցել խաղաղ, թավշյա հեղափոխություն։ Բայց դա եղել է  ոչ թե իրենց պատճառով, այլ բացառապես եղել է նախկին իշխանությունների որոշումը։ Այս քայլն առնվազն հարգանքի է արժանի։ Եթե որևէ մեկը կարծում էր, որ իշխանությունն այնքան թույլ էր, որ չէր կարող ուժ կիրառել, խորապես սխալվում է։ Ի՞նչ է, Երանոսյան Լյովան պետք է հրաման չկատարե՞ր։

Երկրորդ քայլը. որոշ ժամանակ առաջ, երբ դեռ պարզ չէր՝ ՀՀԿ-ն մասնակցելու է  ընտրություններին, թե ոչ, ես հանդիպեցի կուսակցության ղեկավարներից մեկի հետ, հարց տվեցի՝ մասնակցելո՞ւ եք ընտրություններին, թե ոչ։ Պատասխան հնչեց, որ եթե մենք ընտրություններին չմասնակցենք, ընտրությունների լեգիտիմությունը խիստ կասկածելի կլինի։ Ընտրություններն արդեն փաթաթված էին մեր հասարակության վզին, և չգնահատել մասնակցելու նման փաստարկն ուղղակի չի կարելի»,- նշեց ՀՀԿ թեկնածուն։

Շահնազարյանը շեշտեց՝ իշխող ուժի ղեկավարն ամեն ինչ անում է, որպեսզի ստվեր գցի ընտրությունների վրա։ Խոսքն, ըստ նրա, վարչական ռեսուրսի կիրառման մասին է, որը Նիկոլ Փաշինյանը դադարեցրեց և արձակուրդ գնաց ՀՀԿ պատգամավորության մեկ այլ թեկնածու Արփինե Հովհաննիսյանի զգուշացումից հետո։

Ներքին մարտահրավերները լուրջ են

ՀՀԿ պատգամավորության թեկնածուն նաև նշեց՝ ՀՀ անկախության ողջ պատմության ընթացքում երբեք մարտահրավերներն այսքան լուրջ չեն եղել։

«Ներքին մարտահրավերների մասին. տեղի ունեցավ համաներում, աննախադեպ իրավական ակտ։ Համաներումն արդարադատության ինստիտուտ է, պետությունն իր իրավունքները զիջում է մասնավոր անձանց՝ զոհվածների հարազատներին։ Պատկերացնո՞ւմ եք՝ ինչ է կատարվում։ Ես նկատի ունեմ ՊՊԾ գնդում տեղի ունեցած ահաբեկչական գործողության իրականացնողներին։ Դա գործողություն էր առաջին  հերթին պետության դեմ, իսկ քանի որ այսօրվա իշխանության պարագլուխն ասում է, որ ինքը նոր պետություն է, կրակել են հին պետության վրա։ Ավելին, նա հայտարարում է, որ ժողովուրդն ինքն է, բայց դա այդպես չէ։ Նա ոչ միայն ներում է պետության վրա արձակած կրակոցները, համարում, որ դա իր գործն է, այլև ասում, որ համաներման որոշում պետք է ընդունեն զոհված ոստիկանների հարազատները, այն ոստիկանների, որոնք պետության վրա արձակված կրակոցներն ընդունեցին իրենց վրա։ Պատկերացնո՞ւմ եք ինչքան թույլ պետք է լինի պետությունը, որ արդարադատությունը հանձնի մասնավոր մարդկանց։ Այդ մարդկանց ազատ արձակելը լրջագույն հարված էր մեր իրավապահ համակարգի արժանապատվությանը։ Ոստիկանությունը երբևիցե չի եղել այսքան թույլ և իշխանության կողմից նվաստացված։ Այսօրվա ոստիկանապետն այս մասին պետք է մտածի, սա արժանապատվության հարց է»,- ասաց բանախոսը։

Ներկայիս իշխանությունների գործելաոճի մասին և հայտնի գաղտնալսման մասին

Ներկայիս իշխանությունների գործելաոճի մասին խոսելիս Դավիթ Շահնազարյանը համեմատական անցկացրեց՝ նշելով, որ պրոֆեսիոնալ հանցագործներն իրենց հանցագործությունները սովորաբար թաքցնում են նոր հանցագործությունների կամ նոր դիակների տակ։

«Օգոստոսի 17-ի առավոտյան մամուլում հայտնվեց հայտնի գաղտնալսման ձայնագրությունը։ Նույն երեկոյան վարչապետը հանրահավաքում պետք է հայտարարեր մի այնպիսի նորություն, որը կխլացներ դա։

Բացառապես այդ պատճառով նա նույն երեկոյան հայտարարեց ասֆալտին պառկեցնելու, պատին ծեփելու մասին։ Այդ գաղտնալսման աղմուկը լռեցվեց այդ հայտարարություններով։

Մեկ այլ օրինակ, երբ նա մասնակցում էր ՀԱՊԿ-ի վերջին գագաթաժողովին և իր համար ակնհայտ դարձավ, որ Հայաստանը չի պահպանելու գլխավոր քարտուղարի պաշտոնը, անմիջապես դրանից հետո՝ հայ համայնքի հետ հանդիպման ժամանակ, մեկ այլ ցնցող հայտարարություն արեց, այն է, որ Հայաստանում 800 հազար այսպես կոչված անբան կա։ Նույնիսկ թշնամին հայ ժողովրդին նման գնահատական չի տվել»,- հիշեցրեց Դավիթ Շահնազարյանը՝ նման հայտարարությունները որակելով իշխանությունների տապալումը կոծկելու փորձ։

«Ժողովուրդը Նիկոլն է» կարգախոսն իրականության հետ կապ չունի

ՀՀԿ պատգամավորության թեկնածուն ուշադրություն հրավիրեց այն հանգամանքի վրա, որ Նիկոլ Փաշինյանի գլխավորած վերջին քայլերթը ցույց տվեց՝ «Ժողովուրդը Նիկոլն է» կարգախոսն իրականության հետ կապ չունի։

Ինչ վերաբերում է Սասուն Միքայելյանի հայտնի հայտարարությունից հետո ֆեյսբուքյան էջով երեկվա Փաշինյանի ուղիղ եթերին, Դավիթ Շահնազարյանի խոսքով, վարչապետի պաշտոնակատարին զայրացրել էր ոչ միայն ազատամարտիկի հայտարարությունը, այլ հիմնականում՝ երեկվա ՀՀԿ-ի մեծաթիվ մարդկանց մասնակցությամբ միջոցառումը՝ կապված քարոզարշավի հետ։

«Այն, ինչ ասաց Սասուն Միքայելյանը, իրականում քաղաքական ծրագիր է, որն իրականացնում է  Նիկոլ Փաշինյանը։ Խոստանում եմ, որ ամսի չորսին կայանալիք իմ ասուլիսում բոլորդ կհամոզվեք՝ սա իշխանության ձգտում է։ Սասուն Միքայելյանն ուղղակի արտահայտել է այն, ինչը հանդիսանում է ներկայիս իշխանությունների քաղաքական նպատակը»,- ասաց բանախոսը։

Լրագրողները Դավիթ Շահնազարյանից հետաքրքրվեցին՝ ինչու է  ՀՀԿ-ն մասնակցում այս ընտրություններին։ Վերջինս պատասխանեց՝ այն պարզ պատճառով, որ այլ ընդդիմություն գոյություն  չունի, մնացած բոլոր ուժերը հեղափոխական են՝ առանց բացառության։

«Դեռ ապրիլ ամսից հայտարարել եմ, որ այս հեղափոխություն կոչվածն իսկական չարիք է հայկական երկու պետականությունների համար։ Եվ վերջապես, դա պատասխանատվություն է։ Ավագանու ընտրություններում, երբ ընդդիմություն չէր մասնակցում, ձևավորվել է, այսպես կոչված, հեղափոխական ավագանի։ Նորընտիր քաղաքապետի առաջին գործողություններն ուղղակի բարբարոսություն էին»,- ասաց նա։

«Մարտի մեկ»

Անդրադառնալով Մարտի 1-ի թեմային՝ նա իշխանություններին կոչ արեց ադ հարցով դիմել ՀՔԾ-ին։ «Ես այս թեմայի վերաբերյալ որևէ դիտարկում վերջերս չեմ արել, նախկինում ինչ որ ասել եմ, ասածիս տերն եմ։ Ես ընդամենը համառոտ նկարագրել եմ այն, ինչին մասնակից և ականատես եմ եղել։ Իշխանությունները անտեղյակ են ամեն ինչից։

Ես չեմ ասել շշեր հավաքել, ես ասել եմ շշեր ջարդել։ Դրանք այն շշերն էին, որոնք վստահ եմ քրեական խմբերի կողմից ջարդած խանութներից տանում էին, և խնդիր կա, որ այդ շշերը չօգտագործվեին ցուցարարների կողմից։ Այդ մարդիկ շատ լավ գիտեն ինչ է եղել։ Հիմա այդ մարդիկ իրենց դրել են ռետինե խողովակի տեղ։ Փորձում են մոլորեցնել մարտի մեկի զոհերի հարազատներին, նրանց օգտագործել բացառապես իրենց քաղաքական նպատակների համար»,- ասաց ՀՀԿ-ական գործիչը։

Բանակը դարձել է թիրախ

Անդրադառնալով բանակի թեմային՝ ՀՀԿ-ական գործիչը շետեց, որ Նիկոլ Փաշինյաnի կողմից բանակի նկատմամբ հարձակումներ են տեղի ունենում, բանակը վերջինիս համար դարձել է թիրախ։

Դավիթ Շահնազարյանը շեշտեց՝ ներկայիս իշխանություններն Արցախի համար շատ ավելի վտանգավոր են, քան Ադրբեջանը՝ իր բոլոր զինված ուժերով։

Կադրային սով

Անդրադառնալով իշխանությունների կադրային սովին՝ նա նշեց, որ ասվածի հետ այդքան էլ համաձայն չէ. «Ինչու են կառավարության անդամներն այսքան խեղճուկրակ. որովհետև իրենց առջև քաղաքական ծրագիր չկա, քաղաքական գիծ չկա։ Խնդիրներն անընդհատ փոխվում են, թե չէ այսքան ժամանակ ինչ-որ բան սովորած կլինեին։ Նիկոլ Փաշինյանի առաջին խնդիրը ներդրումներն էին։ Գիքորի նման անընդհատ «էստի համեցեք» էր անում։ Ախր դա չի կարող լինել, ներդրողներին պետք է օրինականություն, իսկ Փաշինյանը հայտարարում է, որ օրենքն ինքն է»։

Դավիթ Շահնազարյանը նշեց, որ իշխանությունը զբաղված է բացառապես հակաքարոզով, հասարակության մի մասը թմբիրից դուրս են գալիս, և նրանք դա տեսնում են. «Պետական մտածողության ի սպառ բացակայություն. օր առաջ պետք է ազատվենք այս վարչախմբից»։

Գեներալներին՝ ՀՔԾ

«Գիտեք՞, երբ առաջին գծից սպաներն ու գեներալները ծանուցագրով կանչvում են ՀՔԾ, և ինչ-որ կապիտանի հավասար աստիճան ունեցողները նրանց ժամերով սպասեցնում են, դա ուղակիորեն ուղղված է բանակի դեմ։ Ավելին, դրա նպատակն է բանակը բերել այն վիճակին, ինչ ոստիկանությունն է այսօր գտնվում։ Դա նպատակ է։ Բանակը նուրբ օրգանիզմ է, պետք է հասկանալ՝ ինչ ես անում, իսկ էս դասալիքների կառավարությունը չի կարող հասկանալ։ Բանակի թուլացումը կատարվում է վարչապետի ուղղակի հրահանգով»,- ասաց Դավիթ Շահնազարյանը։ 

Ինչ վերաբերում է Մանվել Գրիգորյանի ձերբակալության թեմային՝ ապա նրա խոսքով, որևէ ստահակ թող չպնդի, որ վերջինս պահածո է գողացել, քանի դեռ դատարանով մեղադրանքն ապացուցված չէ։

«Անկախ նրանից՝ դատարանն ինչ կորոշի, փաստ է մի բան. Մանվել Գրիգորյանը հայրենիքի առջև այնքան ծառայություն է մատուցել, որ իրավունք ունի արդար դատաքննության, որովհետև նրա մատուցած ծառայություններն այնքան շատ են, որ այսօրվա ողջ կառավարությունը միասին վերցրած՝  դրա մեկ քառորդը չի արել»,- հայտարարեց Շահնազարյանը։

Ապրիլյանի ծրագիրը դեռ կա Ադրբեջանում

Ինչ վերաբերում է ապրիլյան պատերազմին և դրանից հետո առաջնագծում վերազինման հարցին՝ ՀՀԿ պատգամավորության թեկնածուն նկատեց, որ 2016 թվականից հետո իրավիճակն առաջնագծում այնքան է փոխվել, որ համեմատել չի կարելի։

«Իհարկե, համարել այդ ամենը բավարար, չի կարելի։ Մենք հերոսաբար կանգնեցրեցինք մի ահավոր ծրագիր, որը մինչև հիմա դեռ Ադրբեջանի մոտ կա»,- ասաց նա։

Կոռուպցիանի մասին՝ դեմագոգիա

Դավիթ Շահնազարյանի խոսքով, եթե ներկայիս վարչապետը խոսում է կոռուպցիայի մասին, դա դեմագոգիա է. «Կոոռուպցիան նրա քթի տակ է։ Քանի դեռ 35 հազար դոլարի տենդեր շահած փոխվարչապետ Ավինյանը բանտախցում չէ, ուրեմն թող մտքով չանցնի խոսել կոռուպցիայի մասին, որևէ իրական քայլ կոռուպցիայի դեմ բացարձակապես չի կատարվում։ Ընդամենը՝ պրոպագանդա»։

Դավիթ Շահնազարյանն անդրադարձավ նախկին իշխանությունների իրականացրած արտաքին քաղաքականությանը, որը, նրա խոսքով, բավական բարդ է եղել։ Մինչդեռ վարչապետի ոչ մի խոստումը, մինչ այժմ, չի կատարվել. «Ես նրան եմ մեղադրում  ստախոսությա մեջ, ինչում նա մեղադրում էր Սերժ Սարգսյանին։ Հասարակությունը տեսնում է այդ ստախոսությունը։ Վստահ եմ՝ դա շատ կարճ է տևելու։ Այս խորհրդարանը հինգ տարի դիմանալու հնարավորություն չունի»։