Ձեր վստահելի աղբյուրը

15:32

Արտաքին հարաբերությունների ու Արցախի հարցում զիջումների մասին ահազանգերի վերաբերյալ

Քարոզարշավի ժամանակ Նիկոլ Փաշինյանն անդրադարձավ արտաքին հարաբերություններին՝ նշելով, որ, մասնավորապես, Ռուսաստանի հետ ռազմավարական դաշնակցային հարաբերությունները պետք է ուժեղացնեն:
«Ռուսաստանի հետ մեր հարաբերությունները պետք է բարձրացնենք նոր և առավել վստահելի մակարդակի վրա և ԵԱՏՄ-ի, և ՀԱՊԿ-ի շրջանակներում, բայց նաև երկկողմ մակարդակում: ՀԱՊԿ-ի հետ կապված գիտեք, որ վերջին շրջանում բավականին բուռն քննարկումներ են տեղի ունենում, և առնցքային իմաստը անդամ երկրների դաշնակցային հարաբերությունների հստակեցումն է»,- ասաց վարչապետի պաշտոնակատարը:

Նա նաև նշեց՝ այնքան էլ հասկանալի և պարզ չէ, թե ինչու են մեր դաշնակիցները զենք վաճառում մեր նկատմամբ թշնամաբար տրամադրված երկրին: «Մենք դա պետք է այս իրավիճակը հասկանանք: Սա անվտանգության բավական լուրջ մարտահրավեր է, և մենք պատրաստ ենք մեր գործընկերների հետ այս հարցը պարզ, ուղիղ, շիտակ, ազնիվ քննարկել: Մենք պետք է իմամանք՝  ում վրա պետք է հույս դնենք, ում վրա չդնենք: Բայց, ընդհանուր առմամբ, տնտեսական քաղաքականության, ընդհանրապես քաղաքականության տրամաբանությունը պետք է լինի այն, որ մենք առաջին հերթին պետք է հույսը դնենք մեր վրա: Դրա համար պետք է տնտեսապես, քաղաքականապես ուժեղանանք»:

Անդրադառնալով Արցախ հարցին՝ նշեց, որ իր վարչապետ ընտրվելու ժամանակվանից ահազանգում են, որ զիջումների է գնալու:

«Այդ ինչի՞ մասին են խոսում այն իշխանության ներկայացուցիչները,  որոնք ՀՀ-ն չեն կարողացել արժանապատիվ ներկայացնել ԼՂ հիմնահարցի բանակցային գործընթացում»,- ասաց նա:

Նրա խոսքով՝ այսօր Վանաձորում տեսել է ՀՀԿ պատգամավոր Վահրամ Բաղդասարյանի նախընտրական պաստառը, որի վրա գրված է՝ «Եթե մտահոգ ես ՀՀ-ի անվտանգությամբ, ընտրիր Հանրապետականին»: «Ես ամենայն պատասխանատվությամբ ասում եմ, որ  ՀՀԿ-ն իր իշխանության տարիներին բոլոր առումներով մեր անվտանգության բոլոր երաշխիքները քայքայել է»,- հայտարարեց Փաշինյանը:

Նա նաև նշեց, որ ՀՅԴ բյուրոյի ներկայացուցիչ Հրանտ Մարգարյանը հարցազրույց է տվել և ասել, թե մայիսից Հայաստանին զենք չի մատակարարվել: «Քիչ է մնում ասեն՝ տղերք, մայիսից էս կողմ Հայաստանին զենք չի մատակարարվել, հարձակվեք, իսկական ժամանակն է, դուք էդ կողմից, մենք էս կողմից: Նախ, ես ուզում եմ հիասթափեցնել ՀՅԴ բյուրոյի ներկայացուցչին, Հայաստանին զենքի մատակարարումն ընթանում է բնականոն, պլանավորված ձևով: Ուզում եմ հավաստիացնել, որ ՀՀ Զինված ուժերը և  հայ ժողովուրդը ի հեճուկս ՀՅԴ-ի բյուրոյի ներկայացուցչի ու ՀՀԿ-ի պատրաստ են կանգնել մինչև վերջ հայրենիքը պաշտպանելու գործում»,- ասաց Նիկոլ Փաշինյանը:

13:45
Սպիտակում Նիկոլ Փաշինյանը ևս մեկ անգամ անդրադարձավ այն փաստին, որ որոշ մարդիկ վախենում են ՀՀԿ-ից:

«Այդ որտե՞ղ կա ՀՀԿ-ական գյուղապետ, որի մտքով անցնում է իր գյուղացիներին ընտրության կամ որևէ այլ առիթով վախեցնել: Ուրեմն այդ գյուղապետեր, իմացեք, անձամբ գալու եմ ձեր հետևից ու վզներիցդ բռնած դուրս եմ շպրտելու ձեր կաբինետներից: Ո՞նց, այս երկրում մարդ կա, որ համարձակվում է քաղաքացուն վախեցնե՞լ: Տո, այո, բոլորիդ պառկեցնելու ենք ասֆալտներին: Էս ովքե՞ր են սրանք: Ի՞նչ հանրապետական, ի՞նչ օլիգարխ, ի՞նչ հաստավիզ, ի՞նչ մուսկուլավոր, բոլորիդ կպառկեցնենք ասֆալտներին ու տարիներով վեր չեք կենա այդ ասֆալտների վրայից: Ու ես ոստիկանությանն ասում եմ՝ չփորձի մեկը թպրտալ՝ գող կլինի, ավտարիտետ կլինի, պատերով կտանք բոլորին, պատերով: Վախեցնե՞ք քաղաքացուն․ գլուխներդ պատով կտաք, ովքե՞ր եք դուք, մի հատ ձեր անուն- ազգանունները ասեք, դուք ծակերից չպետք է դուրս գաք,  դուք էս երկրի փողոցներով չպետք է քայլեք, ձեր տեղը բանտերում է: Դուք բոլորդ հայտնվելու եք բանտերում գողեր, թալանչիներ,  ստահակներ»,- ասաց նշեց Նիկոլ Փաշինյանը:

13։00
«Իմ քայլը» դաշինքի թեկնածուները՝ վարչապետի պաշտոնակատար Նիկոլ Փաշինյանի գլխավորությամբ, քարոզարշավի երկրորդ օրը այցելել են Լոռու մարզ:

Նրանց առաջին կանգառը Սպիտակ քաղաքում է:

«Ինձ համար այսօր շատ հուզիչ օր է, մենք այստեղ հասանք Գյումրիից այն նույն  ճանապարհով, որով քայլարշավով անցել էինք մարտի 31-ին»,- Սպիտակում իր ելույթն այսպես սկսեց վարչապետի պաշտոնակատար Նիկոլ Փաշինյանը:

Նա իր ելույթում անդրադարձավ քաղաքացիների շրջանում հնարավոր վախի մթնոլորտին:

«Սպիտակ գալուց մենք կանգնեցինք Մեծ Պարնի գյուղի մոտ, որտեղ հավաքված մարդկանց ողջունեցինք: Ու ինձ համար զարմանալի էր, որ խոսք էր գնում այն մասին, թե մարդիկ կան, որոնք մտավախություն, վախեր ունեն: Ումի՞ց, ինչի՞ց և պատկերացնում եք՝ Հանրապետականից: Եթե նրանք նկատի ունեն Հանրապետականի պաստառները, որ գիշերվա սատանայի նման սևով հայտնվում են ճանապարհին, ես դա կարող եմ հասկանալ, բայց ապրիլին տեղի է ունեցել հեղափոխություն, դեկտեմբերի 9-ին տեղի են ունենալու արտահերթ ընտրություններ, իսկ դա նշանակում է՝ մենք իշխանությունը վերադարձրել ենք ձեզ, դուք որևէ քաղաքական ուժից վախենալու բան չունեք,  նրանք պետք է ձեզնից վախենան»,- նշեց Նիկոլ Փաշինյանը:

Նա միաժամանակ կոչ արեց քվեն չտան ՀՀԿ-ին:

«Ոչ մի ձայն ՀՀԿ-ին, քանի որ չի կարելի ներել, փորձը ցույց է տալիս՝ ինչքան փորձում ենք լարումներ չմտցնել, ինչքան փորձում ենք սիրո և համերաշխության մթնոլորտը տարածել, բայց ոմանք առիթավորվում են դրանից: Այո, այս ընտրություններում կա պատմական առաքելություն՝ Հանրապետականների թալանչի բրիգադը պետք է ուղարկվի պատմության աղբանոց: Ոչ մի ձայն Հանրապետականներին: Նրանք ասում են՝ եթե մտահոգ ես, ձայն տուր ՀՀԿ-ին, ես էլ ասում եմ՝ եթե ազատ, արժանպատիվ քաղաքացի ես՝ ձայն չտաս Հանրապետականին: Ասում եմ՝ ձայն չտաք էն ուժերին, որոնք թեկուզ մեկ անգամ փորձել են ընտրակաշառքով ընտրություններում հաղթել, ոչ մի ձայն որևէ  ուժին, որը երբևէ ընտրակաշառք է կիրառել, որը սպառնալիք է կիրառել սեփական ժողովրդի նկատմամբ, ոչ մի ձայն ուժին, որը մտածում է՝  Հայաստանում կարելի է բռնությամբ կամ զենքով հարցեր լուծել»,- ասաց Նիկոլ Փաշինյանը:

Նա նշեց՝ իր այսօրվա ամենամեծ շոկը եղել է այն, որ ՀՀ-ում կա քաղաքացի, որ վախենում է ՀՀԿ-ից: Դրա համար, ըստ նրա, պետք է քայլ անել. «Մենք ձեզնից վստահության քվե ենք ակնկալում Հայաստանում տնտեսական հեղափոխություն իրականացնելու համար: Առաջիկա 5 տարիներին արմատախիլ ենք անելու ծայրահեղ աղքատությունը, նվազեցնելու ենք գործազրկությունը, բայց աղքատության հաղթահարումը չենք պատկերացնում՝ գանք մարդկանց բրինձ, մուրաբա կամ փող բաժանենք»: 

Փաշինյանի խոսքով՝ աղքատության, գործազրկության նվազեցումը տեսնում են ներդրումների, նոր գործարաններ բացվելու միջոցով: Նա նշեց, որ երեկ իրեն մոտեցել են գործարարներ և ասել՝ պատրաստվում են ներդրումներ անել, գործարաններ ստեղծել:

Վարչապետի պաշտոնակատարը նաև հայտնեց, որ այսօր Հայաստանում մոտ 500 մլն դոլարի ներդրումային ծրագրեր են քննարկվում կառավարության հետ և դրանց թիվն, ըստ նրա, մեծանալու է. «Այո, Հայաստանում բացվելու են հազարավոր աշխատատեղեր, բայց դրանց մի մասը նաև դուք եք բացելու: Մենք ուզում ենք ձեզ քաջալերել, որ դուք զբաղվեք ձեռներեցությամբ: Մենք գյուղացուն պետք է ապահովենք ոռոգման ջրով, հակակարտային համակարգով, մատչելի վարկային միջոցներով ու քաջալերենք նրանց մթերքի սպառումն ու ապահովենք արտահանումը Հայաստանի սահմաններից դուրս, մենք մարդկանց պետք է օգնենք վաստակել, որովհետև ՀՀ քաղաքացին պետք է իր բարեկեցությունն ապահովի արժանապատիվ աշխատանքով»: