Ձեր վստահելի աղբյուրը

«Նախկին իշխանավոր եմ եղել՝ վարչապետ, ու հստակ կարող եմ ասել, որ նոր մարդը, որին բերում ես նախարար, մարզպետ, գործը կարող է սովորել 1,2,3 ամսում,  բայց դա հնարավոր է մի պարագայում, եթե ներքևում եղած չինովիկները, գործն իմացող, բանիմաց մարդիկ մնան իրենց տեղում»,- ԱԺ արտահերթ ընտրությունների քարոզարշավի շրջանակում Արագածոտնի մարզի Ծաղկահովիտ գյուղում բնակիչների հետ հանդիպմանն ասաց, «Մենք» դաշինքի ցուցակը գլխավորող Արամ Սարգսյանը։

Նա նշեց, այժմ տասնյակ հազարավոր չինովնիկներ, որոնք պետական աշխատողներ են, իրենց աշխատանքի վայրում նստած չգիտեն՝ ընտրություններից հետո աշխատելու են, թե նոր եկածը հանելու է։

«Այս խնդիրը լուծել է պետք։ Նիկոլ Փաշինյանն ինքն էլ էր ասում, որ այս հեղափոխությունը որևէ կուսակցությանը չէ, ժողովուրդն է արել, հետևաբար իր թիմը, մարզպետները, նախարարները պետք է լինեն ոչ միայն այն մարդիկ, ովքեր Փաշինյանի հետ քայլել են, այլ նաև ժողովրդի մեջ եղած այն մարդիկ, ովքեր 1990-ականներից սկսած պայքարել են այս երկրի հաջողության, հնարավորությունների համար»,- ասաց Ա. Սարգսյանը։

Նա  խոսեց աշխատատեղերի խնդրի մասին, նշեց, որ  պետք է զարգացնել արդյունաբերությունը, օգտագործել ունեցած բոլոր ռեսուրսները, նաև մտավոր ռեսուրսը։

Արամ Սարգսյանը նաև նշեց, որ այսօր ամեն օր սպասում են, որ կարող է պատերազմ լինել։

«Պատերազմում են ոչ թե բանակները, այլ պետությունները և հաղթում են հզոր պետությունները։ Մենք պետք է հզոր պետություն դառնանք։ Դրա համար համար մեկ կարևոր բանն արդար ընտրությունների անցկացումն է»,- ասաց նա։

Դաշինքի պատգամավորության թեկնածուն առաջարկում է, որ վերցնեն լրացուցիչ 20 հազար պայմանագրային զինծառայողներ, որոնք պետք է  կանգնեն սահմանին, իսկ  պայմանագրային զինծառայողները  հետ քաշվեն, սովորեն  ռազմական գործը՝ սակրավոր, տանկիստ, հրետանավոր, իրենք չպետք է կանգնեն սահմանի գծում։ Լրացուցիչ 20 հազար պայմանագրային զինծառայող ավելացնելու համար, Ա. Սարգսյանի հաշվարկներով, պետք է 220 միլիոն դոլար,  ու այդ պայմաններում, զինծառայողը ստանալու է 1000 դոլարի չափ աշխատավարձ, որից 700 դոլարը տուն է տանելու, 300 դոլարը տարբեր հարկերի տեսքով է գնալու։

«Պատկերացեք՝ ինչքան մարդ չի գնա խոպան, ինչքան ընտանիքներ չեն բաժանվի, ինչքան փող կմտնի շրջանառության մեջ»,- ասաց նա։ 

Դաշինքի ցուցակի երկրորդ համար Խաչատուր Քոքոբելյանն ասաց, որ իրենց հերոսը ՀՀ քաղաքացին է, ինչի մասին խոսում են, վերաբերում է  ուղիղ քաղաքացու կյանքին, ինչին հետամուտ են լինելու, նպաստելու է քաղաքացու կյանքի բարելավմանը։

«Մենք հստակ կարող ենք հասնել նրան, որ Հայաստանում  գազի գինն առնվազն 30 տոկոս իջնի։ Ինչի՞ չեն արել նախկինները։ Նրանք ապահովել են, որ այն գինը, որ այսօր կա, ֆիքսվի։ Ինչի՞ են դա արել, որովհետև այդտեղից իրենց մասնաբաժինն են ունեցել»,- ասաց Քոքոբելյանը։

Խոսելով գնաճի մասին, նա նշեց, որ այսօրվա իշխանությունը ուղղակի պարտավոր է ժամ առաջ լուծել այդ խնդիրը։ Կարմիր գծերի, տեսախցիկների մասին խոսելիս՝ Քոքոբելյանն  ասաց, որ քաղաքացին այն վիճակում չէ, որ քաղաքացու գրպանահատությամբ զբաղվի ինչ որ ընկերություն։

Խ. Քոքոբելյանի խոսքով, պետք է  բարձրացվեն աշխատավարձերը, թոշակները, պատրաստ են ցույց տալու, թե ինչպես է հնարավոր այդ թվերն ապահովել։