Ձեր վստահելի աղբյուրը

Վերաքննիչ քրեական դատարանում՝ նախագահությամբ դատավոր Ռուբեն Մխիթարյանի մեկնարկեց  Հայաստանի  երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորման որոշումն անձեռնմխելիության հիմքով վերացնելու վերաբերյալ բողոքի քննությունը:

Դատարանից Panorama.am-ի թղթակիցը հայտնում է, որ նիստը կընթանա դռնփակ ռեժիմով։

Լրագրողների հետ զրույցում փաստաբան Հայկ Ալումյանը հայտարարեց, որ Ռոբերտ Քոչարյանը ներկա է նիստին։

«Մեղադրանքի մեջ կենտրոնական դեր է խաղում այն արտահայտությունը, որ 2008 թվականի փետրվարի 23-ից մինչև մարտի 1-ը Հայաստանում սահմանված է եղել փաստացի ռազմական դրություն։ Փաստացի նշանակում է, որ հրամանագրով ռազմական դրություն չի եղել։ Ռազմական դրությունը բաղկացած է մոտ 20 տարբեր կոմպոնենտներից, որոնք միասին ստեղծում են ռազմական դրություն։ Ռազմական դրության որևէ կոմպոնենտ այդ օրերին՝ փետրվարի 28-ից մինչև մարտի 1-ը  գոյություն չի ունեցել։ Այսինքն, ռազմական դրություն իրականում չկար և չէր կարող լինել»,-ասաց Ռ. Քոչարյանի փաստաբանական խմբի անդամ Հայկ Ալումյանը։

Նրա խոսքով, մեղադրանքի մեջ նաև նկարագրված է, որ մարտիմեկյան ցույցը եղել է խաղաղ ու անզեն:

«Նախաքննական մարմնում վկայակոչել են բազմաթիվ դատական ակտեր, որոնցում հստակ նշված է եղել, որ այս կամ այն մասնակիցը կատարել է այս կամ այն բռնի գործողությունը, կիրառել այս կամ այն զենք։ Պետությունը իր անունից կայացված դատական ակտը չի կարող դնել կասկածի տակ, քանի դեռ այն օրինական ուժի մեջ է գտնվում։ Այստեղ փաստորեն ուժի մեջ մտած դատական վճիռը քննչական մարմինը դրել է կասկածի տակ»,-ասաց փաստաբանն ու ավելացրեց, որ  դատարանում ներկայացնելու են իրենց դիրքորոշումը, իսկ այս պահին որևէ սպասելիքի մասին խոսել չեն կարող։