Ձեր վստահելի աղբյուրը

«Մենք» դաշինքն այսօր քարոզարշավը շարունակում է Շիրակի մարզում: Նրանք Երևանից Գյումրի շարժվեցին «Տղամարդիկ» արձանի մոտից։

«Մտածում էի, թե որտեղից սկսել Գյումրի այցելությունը։ Կարծում էի՝ կարելի էր սկսել Իսահակյանի կամ Շիրազի արձանների մոտից,  կամ Մինասի։ Որոշեցի, որ ճիշտը «Տղամարդիկ» արձանի և Ֆրունզիկ Մկրտչյանի կողքից սկսելն է։ Ինչո՞ւ այդ արձանի։ Որովհետև Գյումրին տղամարդ քաղաք է, պատահական չէ, որ գյումրեցիք իրենց քաղաքը համարում են հայրաքաղաք։ Հետևաբար, այսօր մենք մայրաքաղաքից գնում ենք հայրաքաղաք»,- ասաց դաշինքի ընտրական ցուցակը գլխավորող Արամ Սարգսյանը։

Նախքան Գյումրիում  քաղաքացիների հետ հանդիպումը, դաշինքի անդամները եղան Արթիկում։

Արթիկում քաղաքացիների հետ հանդիպմանը, Ա. Սարգսյանն ասաց, որ դաշինքն ընտրություններից 10 օր առաջ է ձևավորվել, արագ ճանաչվելու խնդիր ունեն, դրա համար դաշինքի անունը դրել են «Մենք», որը Հայաստանում ամենաշատն օգտագործվող բառերից մեկն է, որ շատ հիշեն իրենց։ 

«Մեր ցուցակում բոլորն ազնիվ, չգողացած, չթալանած, ճիշտ խոսք ասած մարդիկ են»,- նշեց Արամ Սարգսյանը։

Իր խոսքում պատգամավորության թեկնածուն նաև ասաց. «Հիմա կասեք, որ մեկ տարի առաջ այստեղ կանգնած էր ուրիշ խմբի հետո։ Այո, Նիկոլ Փաշինյանի հետ էի այստեղ։ Վստահաբար գիտեմ ու համոզված եմ, որ մեր ժողովուրդն իր քվեն տալու է «Իմ քայլը» դաշինքին, Նիկոլ Փաշինյանին։ Նա վաստակել է, որ այդ քվեն տաք իրեն, որ ինքը լինի հաղթողը, լինի վարչապետը։ Բայց ուզում եմ, ժողովուրդ,  հասկանաք, որ Ազգային ժողովը չի կարող լինել մեկ կուսակցությամբ, թե ժողովրդավարության առումով է վատ, թե ընդհանրապես է վատ։ Ցանկացած կուսակցություն  կուսակցություն է, ունի սեփական շահը։ Երբ մի կուսակցություն եղավ, ու ինքը եղավ ամենամեծը, այդ կուսակցությունն ինքն իրենով  պարտակվելու է ու լիքը խնդիրներ է առաջացնելու, հետևաբար Ազգային ժողովին պետք են նաև այլ կուսակցություններ, որոնք պետք է մտնեն ԱԺ ու այդ ԱԺ-ում պետք է ճիշտ աշխատեն։ Նիկոլ Փաշինյանն իմ ընկերն է, և ես ուզում եմ օգնած լինել  Նիկոլ Փաշինյանին։ «Մենք» դաշինքն է ուզում դա անել, մենք դրանով օգնում ենք ոչ թե անհատին, այլ երկրին»։ 

Ա. Սարգսյանի խոսքով, օգնելու լավագույն ձևն անընդհատ գովելը չէ:

«Իհարկե, ապրես, որ հեղափոխությունն արեցիր, բայց հեղափոխությունից հետո ահռելի աշխատանք կա, որը պետք է անել, բազմաթիվ թերություններ ու բացթողումներ կան, որոնք պիտի բարձրաձայնել, որոնք պիտի ասել,  երբեմն քննադատել, որպեսզի կարողանանք շտկել: Եթե ուզում ենք մեր երկիրը երկիր դառնա, պետք է լավին լավ ասենք, վատին՝ վատ։ Մենք հենց այդ ուժն ենք, որը ոչ թե ուրախանում է այսօրվա իշխանության թերություններով, բացթողումներով, փորձում օգտվել դրանից,  այլ այն ուժն է, որը ուզում է օգնել, օր առաջ ասել, որ այդ թերությունները, բաղթողումները չլինեն, ոչ միայն ասել, նաև ճանապարհներ ցույց տալ, թե ինչ քայլեր անել, որ  սխալները շտկվեն, երկիրն ավելի լավն ու առաջադեմը դառնա»,-նշեց նա: