Ձեր վստահելի աղբյուրը

Շիրակի մարզի Արևիկ գյուղի դպրոցի երկրորդ դասարանի աշակերտուհիներ Ս.  Թ-ի և Մ. Ն-ի հետ տեղի ունեցած արտակարգ դեպքով ոստիկանությունն է զբաղվում։ Նշենք, որ երեկ, աշակերտուհիները փակված մնալով դասասենյակում, վախենալով, որ այնտեղից չեն կարող դուրս գալ, ցած են նետվել դասասենյակի պատուհանից և վնասվածքներ ստացել։

«Ահազանգ ունենք, այս պահին հետաքննություն է գնում»,- Panorama.am-ը աս մասին տեղեկացավ ոստիկանությունից։

Դեպքի մանրամասները պարզելու համար զրուցեցինք դպրոցի տնօրեն Հակոբ Թորոյանի հետ, ով այսպես ներկայացրեց տեղի ունեցածը.

«Երկրորդ դասարանի երկու աշակերտները դասվարի հետ հինգերորդ ժամից` 13:10-ից հետո մնացել են, որ դասասենյակի ծաղիկները խնամեն, ջրեն: Դասվարը մի 15-20 րոպե մնացել է նրանց հետ, հետո տնից զանգել են, ասել են, որ երեխան վատ է զգում, շուտ տուն արի։ Նա դասասենյակի բանալին մոռացել է սեղանի վրա, իջել է փոխտնօրենից թույլտվություն է վերցրել ու գնացել։

Երեխաները մինչև ժամուկես մնացել են դասասենյակում և այդ ընթացքում բանալիով ներսից փակել են դուռը, այնուհետև ժամը երեքի կողմերը ուզեցել են դուռը բացել ու չեն կարողացել, լուսամուտից գոռացել են, մարդ չի լսել իրենց, քանի որ դասասենյակի դիրքը այնպես է, որ հեռու է ուսուցչանոցից։ Վախենալով, որ իրենց չեն լսի, որ կարող է հանկարծ այդտեղ մնան, մոտ չորս մետր բարձրությամբ լուսամուտից թռել են։ Ես զրուցել եմ նրանց հետ, այդպես են ասել։ Դպրոցի մոտ բնակվող հարևանը, տեսնելով երեխաներին, անմիջապես զանգել է պահակին, պահակն էլ ինձ զանգեց  ու եկա դպրոց, ծնողներն էլ եկան ու երեխաներին արագ հասցրեցինք հիվանդանոց, այնտեղ ստուգեցին, Ս-ին բան չէր պատահել, ցավեր ուներ, առաջին օգնություն ցուցաբերեցին, դուրս գրեցին, իսկ Մ-ն աջ բազուկի կոտրվածք ուներ, վիրահատեցին, հիմա նա հիվանդանոցում է»։

Տնօրենն իր խոսքում նշեց, որ դեպքի ժամանակ ինքը դպրոցում չի եղել. «Ընտրական հանձնաժողովի անդամ եմ, այդ ժամանակ ընտրատարածքում էի, զանգել կանչել էին»։

Մեր հարցին, թե արդյոք իրավունք ունի աշխատանքային ժամին նման հարցերով զբաղվելու՝ Թորոյանը պատասխանեց. «Երբեմն աշխատանքային ժամերին նիստեր են լինում, այդ օրը բյուլետեններ պետք է ստանայինք, աշխատանքի բաժանում էր կատարվում, դրա համար այնտեղ էի»։

Մեկ այլ հարցին, թե երեխաները դասերից հետո հերթապահ են մնու՞մ՝ դասասենյակները մաքրելու համար, նա պատասխանեց. «Ոչ, հավաքարարներն են մաքրում»։

Նշենք, որ տնօրենի հետ հեռախոսազրույցի ընթացքում ոստիկանության աշխատակիցները դպրոցում էին։