Ձեր վստահելի աղբյուրը

«Խորհրդարանում միակ ընդդիմությունը լինելու ՀՀԿ-ի հավակնությունը ֆեյք է»,- այս մասին այսօր լրագրողների հետ զրույցում ասաց «Լուսավոր Հայաստան» կուսակցության համամասնական ցուցակը գլխավորող Էդմոն Մարուքյանը:

Նրա խոսքով՝ նրանք ընդհանրապես կտրված են եղել իրական կյանքից, մարդկանց հոգսերից, իրենց պալատներում ապրել են, անգամ խանութ, շուկա  չեն գնացել, որ իմանան ապրանքների գները: 

«Կյանքից կտրված իշխանությունից ընկել են ու հիմա նորից կյանքից կտրված ուզում են լինել ընդդիմություն, հակակշիռ»,- նշեց Էդմոն Մարուքյանը:

Նա նշեց` այսօր կարդացել է ՀՀԿ առաջին փոխնախագահ, ընտրական ցուցակը գլխավորող Վիգեն Սարգսյանի գրառումը, որը վարչապետի պաշտոնակատար, «Իմ քայլը» դաշինքի ընտրական ցուցակը գլխավորող Նիկոլ Փաշինյանին բանավեճի է հրավիրել։

«Նա առաջարկում է, որ միայն ինքը Նիկոլ Փաշինյանի հետ բանավիճի: Ես հասկանում եմ իրենց ռազմավարությունը, իրենք ուզում են լինել լուրերի գլխագրերում, միայն իրենք են հակադրվում, բայց այն բանավեճը, որ Հ1-ն առաջարկել է՝ բոլոր ուժերի հետ, դա ճիշտ ֆորմատ է, իսկ եթե մի ուժ ուզում է միայն ինքը լինի, դա նշանակում է՝ մյուս ուժերին փորձել նվաստացնել: Կարծում եմ, որ նման բանավեճ անելը սխալ է, առավել ևս մի ուժ, որը հարց է՝ 4 տոկոս ձայն կհավաքի, թե ոչ, ուզում է մյուս ուժի լիդերի հետ բանավիճել, որը 68 տոկոս ռեյտինգ ունի հարցման արդյունքներով: Դա աբսուրդի ժանրից է»,-ասաց Էդմոն Մարուքյանը:

Այսպիսով, ըստ նրա, միակ ընդդիմությունը լինելու ՀՀԿ-ի հավակնությունը ֆեյք է. «ՀՀԿ-ն կարող է Նիկոլ Փաշինյանի իշխանության համար լինել բոքսի տանձիկ խորհրդարանում: Հայաստանի քաղաքական համակարգի առողջացման համար մեզ խորհրդարանում բոքսի տանձիկ չէ պետք, այլ նոր քաղաքական ուժ, ընդդիմություն, որն ունի անցած մաքուր ճանապարհ»:

Էդմոն Մարուքյանը նաև նշեց, որ  պետք է վերացնել խորհրդարանում միմյանց հայհոյելու մշակույթը. «Ոչ թե ՀՀԿ-ն քրֆի իշխանությանը, իշխանությունը՝ ՀՀԿ-ին: Վստահ եմ, որ  ՀՀ քաղաքացիները բոլոր մակարդակներում դուրս են մղելու այն ուժերին, որոնք կփորձեն լինել բոքսի տանձիկ»:

Նա անդրադարձավ նաև արտաքին քաղաքականությանը: «Ռուսաստանի Դաշնությունը Հայաստանի Հանարապետության ռազմավարական գործընկերն է, սակայն երկար տարիներ ասել ենք, որ մեր գործընկերային հարաբերություններում բազմաթիվ հարցեր կան, բայց չունենք ունակ իշխանություն, որն այդ հարցերը կբարձրաձայնի, կդնի սեղանի վրա և կասի՝ այդ հարցը պետք լուծել: Ես հույս ունեմ, կարելի է ասել՝ վստահ եմ, որ դեկտեմբերի 9-ից հետո ունենալու ենք այդպիսի իշխանությունը, ունենալու ենք այդպիսի ընդդիմություն, և այս առումով մենք խնդիր չենք ունենալու»,- նշեց «Լուսավոր Հայաստան» կուսակցության նախագահը:

Նրա խոսքով՝ բոլոր երկրների հետ պետք է այնպիսի հարաբերություններ կառուցել, որ ՀՀ-ի շահը լինի առաջին տեղում. «Իսկ մինչև այդ  մենք ծառայել ենք միայն իրենց շահերին, դրա համար էլ այդքան տրամադրություններ են ձևավորվել Հայաստանում»:

Հարցին, թե ծանոթ է ՀՀԿ ընտրացուցակի երրորդ հորիզոնականը զբաղեցնող պատգամավորության թեկնածու Դավիթ Շահնազարյանի հայտարարությանը, թե ներկայիս իշխանություններն Արցախի համար շատ ավելի վտանգավոր են, քան Ադրբեջանը՝ իր բոլոր զինված ուժերով,  Էդմոն Մարուքյանն ասաց, որ ինքը չի հասցնում հետևել ՀՀԿ-ականների հայտարարություններին, քանի որ նրանք քարոզարշավ անելու փոխարեն ամեն օր ասուլիս են կազմակերպում: «Այսինքն՝ վախենում են դուրս գալ ժողովրդի մեջ խոսել, ասուլիսներով են հայտարարություններ անում»,- ընդգծեց նա:

Մարուքյանը միաժամանակ նշեց, որ Արցախի հետ կապված հարցը շահարկվում է նախկին իշխանությունների կողմից. «Այնպես է շահարկվում, թե իբր իրենք ամեն ինչ անում էին Արցախի համար, այնպես են արել, որ ապրիլյան պատերազմի ժամանակ այդքան զոհ չունենայինք, հիմա էլ խոսում են»: