Ձեր վստահելի աղբյուրը

«Մեր դիրքորոշումն այն է, որ Ռոբերտ Քոչարյանը պետք է մնա կալանքի տակ: Եվ մենք բերում ենք այն հիմնավորումները, որոնք վկայում են, որ քննության այս փուլում կա անհրաժեշտություն, որպեսզի երկրորդ նախագահը գտնվի կալանքի տակ: Թե ինչ որոշում կկայացնի դատարանը, կարծում եմ, դա գիտի միայն դատարանը»,- լրագրողների հետ զրույցում ասաց ՀՀ գլխավոր դատախազ Արթուր Դավթյանը։

Նա նշեց, որ «Մարտի 1-ի» վերաբերյալ քրեական գործի այսօրվա փաստակազմը տրամագծորեն տարբերվում է 2008թ. քննության փաստակազմից, այսինքն, ձեռք բերված տվյալները բացարձակապես այլ տեղեկությունների մասին են խոսում:

«Փաստակազմի էական տարբերության պայմաններում Ռոբերտ Քոչարյանին առաջադրված այսօրվա մեղադրանքը որևէ հակադրության մեջ չի մտնում 2008 թվականին քննված քրեական գործով ձեռք բերված տվյալների հիման վրա կայացրած դատական ակտերի հետ:

Այսօրվա քննությամբ ձեռք բերված տվյալներն առանձին դեպքերում նաև վկայում են, նախապես, այսպես առերևույթ կարող եմ ասել,  նախկինում կայացված որոշակի դատական ակտերի վերանայման առերևույթ հիմքերի մասին: Մարդու իրավունքների եվրոպական դատարանն առանձին գործերով արդեն դիրքորոշումներ է հայտնել, և մենք այս լույսի ներքո կունենանք նաև նախկինում կայացված առանձին դատական ակտերի վերանայման գործընթացներ, և, ինչպես արդեն նշեցի, փաստակազմի էական տարբերությունը հակադրության մեջ չի դնում այսօրվա մեղադրանքի և նախկինում կայացրած դատական ակտերի միջև»,- նշեց Ա. Դավթյանը։

Հիշեցնենք, որ երեկ Վերաքննիչ քրեական դատարանում՝ նախագահությամբ դատավոր Ռուբեն Մխիթարյանի, կայացել է Հայաստանի  երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորման որոշումն անձեռնմխելիության հիմքով վերացնելու վերաբերյալ բողոքի քննությունը: Դատական նիստին ներկա է եղել նաև Արթուր Դավթյանը։ Այն շարունակվում է  նաև այսօր։ 

«Ռոբերտ Քոչարյանի մեղադրանքին առնչվող  առանձին իրավական հարցեր մասնագիտական լայն շրջանակներում քննարկման առարկա էր դարձել։ Անձամբ  վճռաբեկ բողոք ներկայացրեցի համապատասխան հիմնավորումներով։ Վռճաբեկ դատարանը մասնակի  բավարարեց,  մեր բողոքին համապատասխան  ամենակարևոր իրավական հարցի  հիմնական պատասխանը տվեց։ Գործն ուղղարկվեց վերաքննիչ դատարան նոր քննության։ Դրանով պայմանավորված նպատակահարմար  համարեցի, որ ինքս այդ ամբողջ խնդիրները ներկայացնեմ վերաքննիչ դատարանում։ Կմասնակցեմ նաև այսօրվա նիստին»,- ասաց ՀՀ գլխավոր դատախազը։