Ձեր վստահելի աղբյուրը

«Լուսավոր Հայաստան» կուսակցության պատգամավորության թեկնածու Արման Բաբաջանյանը կարծում է, որ նախընտրական քարոզարշավը հետհեղափոխական այս ժամանակահատվածի համար շատ օրինաչափ է ընթանում։ Նման տեսակետ նա հայտնեց այսօր տեղի ունեցած մամուլի ասուլիսի ժամանակ։

«Ես վերջին օրերին ավելի շատ մարզային այցերի էի, մարդկանց հետ էի շփվում և ավելի ու ավելի համոզվում, թե ինչ հույսեր կան վերջին փոփոխությունների առնչությամբ։ Բաց էի թողնում լրահոսում տեղ գտած միմյանց ոչնչացնելու պալեմիկան՝ հատկապես ՀՀԿ-ի և «Իմ քայլի» միջև։ Դա իրական մարդկանց, իրական ժողովրդի հետ ընդհանրապես կապ չուներ, և մենք տեսնում էինք, թե ինչպես կարելի է այդ ամենին զուգընթաց՝ առողջ, նպատակային, պոզիտիվ քարոզարշավ իրականացնել։ Մեզ որևէ կերպ չի խանգարել քարոզարշավի սևի ու սպիտակի՝ մռայլ գույների հիմնական լրահոսը»,- ասաց նա։

Արման Բաբաջանյանը նշեց, որ ամեն ինչ տեղն է ընկնում, իրենք ավելի ու ավելի ամրապնդվում են որպես քաղաքական ուժ, մարդկանց համար ավելի ու ավելի ընկալելի դառնում։

«Հետհեղափոխական իրականությունը գնալով սկսում է կայունանալ, մարդիկ իրավիճակի փոփոխություն են ուզում, և ոչ միայն հռչակումների ու լոզունգների ռեժիմ»,- ասաց նա։

Արման Բաբաջանյանի խոսքով, իրենք ցույց են տալիս, թե ինչ կարող են անել, ասելիքն ասված է, և հիմա ժամանակն է գործելու, հրապարակ կոնկրետ ծրագրեր բերելու և դրանք իրագործելու։

Անդրադառնալով քաղաքական մյուս ուժերին,  հատկապես ՀՀԿ-ին՝ նա նշեց, որ այդ կուսակցության նկատմամբ ծայրահեղ ատելության հասնող վերաբերմունք է։

«Եթե  անգամ Նիկոլ Փաշինյանը շատ ցանկանա ՀՀԿ-ին խորհրդարան բերել, դա նրան չի հաջողվի։ Օրավուր ավելի ու ավելի խորացող այն համոզումը, որ մենք այս վիճակում ենք նախկին ռեժիմի պատճառով չի օգնի Հանրապետականին մուտք գործելու խորհրդարան»,- ընդգծեց Բաբաջանյանը։

Անդրադառնալով իրենց հնարավորություններին՝ Արման Բաբաջանյանը նշեց՝ իրենք ԱԺ-ում երկրորդ ուժը լինելու հանձնառությունն ու խիզախությունն ունեն, իրենք դեմոկրատական այլընտրանք են։

Ինչ վերաբերում է ԲՀԿ-ին և ՀՅԴ-ն, ապա այդ ուժերը, պատգամավորութան թեկնածուի խոսքով, Հայաստանի զարգացման և ժողովրդավարության հետ ընդհանրապես կապ չունեն։

«Մենք հասկանում ենք փողի և կապիտալի շուրջ ձևավորած ուժն իրապես մաքուր քաղաքական ուժերի հետ մրցավազքում կարող է կրկին առավելության ձգտել, բայց ոչ ունենալ։ 2007 թվականից ի վեր՝ ԲՀԿ-ի մասնակցությամբ շատ առողջ քաղաքական ուժեր դուրս են մնացել քաղաքական գործընթացներից։ Հիմա շատ ավելի վտանգավոր վիճակ է, քանի որ փողոցում կարող են հայտնվել այնպիսի ռադիկալ ուժեր, որոնք չեն թաքցնում իրենց քաղաքական նպատակներին հասնելու համար զենքի գործածումը։ Իսկ մենք նախկին համակարգի հետ որևէ կապ չենք ունեցել, մենք իշխանությունը բռնի պահողների հետ առնչություն չենք ունեցել, մեր թիմում միայն լուսավորության գաղափարներ կրողներ են։ Մենք խորհրդարան գնում ենք աշխատելու համար»,- շեշտեց պատգամավորության  թեկնածուն։

Վերջում Արման Բաբաջանյանը նշեց, որ դատելով  քարոզարշավում մարդկանց հետ շփումներից՝ ակնհայտ է, որ հեղափոխական տրամադրություններն ու էյֆորիան դեռևս պահպանվում են, սակայն իրենց հետևորդներն այդ զանգվածից չեն։