Ձեր վստահելի աղբյուրը

Մանդարինի կեղևի վրայի կոշտ մասերը մտահոգել են սպառողին։ Նա մրգի նկարը հրապարակել է ֆեյսբուքում ու կարծիք հայտնել, որ դրանք ներարկիչի հետքեր են։ 

Panorama.am-ին խնդրի վերաբերյալ ՍԱՊԾ-ից հայտնեցին, որ ցիտրուսային բույսերի հիվանդության հետևանք է։

«Ցիտրուսային բույսերի հիվանդությունները բնորոշ են բազմաթիվ մրգային բույսերի: Մանդարինի ծառի հիվանդությունները կարող են առաջացնել միկրոօրգանիզմներ՝ միկոպլազմաներ, վիրուսներ, մանրէներ, սնկեր, որոնց ներազդման արդյունքում ծառի և մրգերի վրա ի հայտ են գալիս տարբեր թերություններ՝ գերաճ, խոցեր, բորբոս, բծավորություն և այլն:

Միկրոօրգանիզմները կարող են ներթափանցել տերևի, մեխանիկական վնասվածքի, միջատների, ինչպես նաև քամու կամ ջրելու միջոցով:

Երբ մանդարինը վարակվում է սնկով, պտղի վրա առաջանում են խոցեր, որոնք աճելով, ձեռք են բերում շագանակագույն երանգներ և տեղ-տեղ հաստանում:

Բուսական որևէ հիվանդություն մարդու կյանքի և առողջության համար վտանգավոր չէ»,-ասացին ծառայությունից։

Քիչ առաջ հայտնի դարձավ, որ Ռուսաստանի Դաշնության գյուղատնտեսական վերահսկողական ծառայությունը` «Ռոսսելխոզնադզոր»-ը, սահմանից հետ է ուղարկել Թուրքիայից ներկրվող 550 տոննա մանդարինը: Նովորոսիյսկի, Գելենջիկի և Տուապսեի նավահանգիստներ հասած մանդարինի խմբաքանակի մեջ միջերկրածովյան վնասատու միջատ է հայտնաբերվել:

Այս առումով, ծառայությունից Panorama.am-ին հայտնեցին, որ նոյեմբերի ընթացքում Հայաստան մանդարին ներմուծվել է միայն Վրաստանից՝ 989.356 կգ, որից 147.563կգ-ի ծագման երկիրը եղել է Թուրքիան:

«Վերջին խմբաքանակը եղել է նոյեմբերի 27-ին 14.701կգ»,-նշեցին ծառայությունից։