Ձեր վստահելի աղբյուրը

«Սասնա Ծռեր» համահայկական կուսակցությունն իր քարոզարշավն այսօր շարունակում է Արագածոտնի մարզում։

«Պետք է նկատի ունենանք, որ դեռևս  անցյալից մնացուկներ կան և չպետք է թույլ տանք, որ դրանք անցնեն խորհրդարան։ Բոլոր այն ուժերը, որոնք մասնակցել են մեր ժողովրդին կեղեքելուն, մեր պետությունը քայքայելուն, մեր քաղաքացուն նվաստացնելուն, այդ ուժերը իրավունք չունեն լինելու մեր խորհրդարանում»,- այսօր Թալինում ընտրողների հետ հանդիպմանն ասաց կուսակցության համամասնական ցուցակը գլխավորող Վարուժան Ավետիսյանը։

Նրա խոսքով՝ իրենք չեն մրցակցելու հեղափոխությանը մասնակից մյուս ուժերի հետ, առաջին հերթին Փաշինյանի գլխավորած դաշինքի հետ. «Մեր նպատակն է այս փուլում, որ հեղափոխական ուժերը միասին, ձեռք ձեռքի անցնեն խորհրդարան և կարողանան շարունակել մեր պետության շինարարությունը։ Այդ պատճառով մեր առաքելությունը համարում ենք հեղափոխության ուժին աջակցելը և մյուս կողմից՝ հներին թույլ չտալ սողոսկել խորհրդարան։ Հանրապետականը, «Բարգավաճ Հայաստան», ՕԵԿ-ը, ՀՅԴ-ի հայաստանյան ղեկավարությունը պետք է հայտնվեն հայկական Նյուրնբերգի նստարանին, անցնեն այդ քավարանով»։

Հիշեցնենք, որ Գագիկ Ծառուկյանի բարեգործական հիմնադրամը 5 մլն դրամ էր նվիրել «Սասնա Ծռեր» խմբավորմանը, ովքեր էլ իրենց հերթին հայտարարել էին՝ «այն կծառայի քաղաքական բանտարկյալներին գրավի դիմաց ազատ արձակելուն և նրանց առողջական կարիքները հոգալուն»։

Ինչ վերաբերում է իրենց ծրագրային առաջարկներին՝ Ավետիսյանն ասաց, որ առաջին հերթին պետք է փոխվի Սահմանադրությունը. «Իսկ այն փոխելու և դրա հիման վրա նոր արտահերթ ընտրություններ անցկացնելու համար մենք շուրջ մեկուկես տարի ժամանակի կարիք ունենք»։

«Արտաքին հարաբերությունների ասպարեզում մենք ի վերջո պետք է ստեղծենք արժանապատիվ հարաբերություններ բոլոր այն պետությունների և ուժերի հետ, որոնք մեզ հետ կապված ունեն շահեր։ Հակառակ պարագայում այսպիսի անարժանապատիվ վիճակում մնալով անընդհատ Հայաստանից լինելու է արտագաղթ, տնտեսություն չենք ունենալու»,- հավելեց նա։