Ձեր վստահելի աղբյուրը

«Մեդիա կենտրոնում» կազմակերպվել էր «Ընտրապայքար. Կանանց իրավունքներն ու գենդերային հավասարության խնդիրները  կուսակցությունների օրակարգում» թեմայով քննարկում։ Մասնակցում էին տարբեր ուժերից կին ներկայացուցիչներ, միայն «Սասնա ծռեր» համահայկական կուսակցությունը ներկայացնում էր Ալեք Ենիքգոմշյանը։

«Գիտակցաբար արված որոշման արդյունք է՝ շեշտելու համար հարցի կարևորությունը, որ իգական սեռի գենդերային խնդիրները երկրորդական նշանակություն չունեն, չենք ասում՝ կանայք, գնացեք ձեր թեմայով դուք խոսեք, մենք ավելի կարևոր հարցեր ունենք»,-կանանց խնդիրներին նվիրված քննարկմանն իր մասնակցությունն այսպես բացատրեց Ալեք Ենիքգոմշյանը։

Նա նշեց, որ կանանց հավասարության, իրավունքների խնդիրները պետք է դիտարկել հասարակություն-պետություն հարաբերությունների շրջանակներում։ Պատգամավորի թեկնածուի խոսքով,  կանանց վերաբերվող շատ  չլուծված խնդիրներ կան, բայց դրանք չպետք է առանձնացնել հասարակության և պետության ներսում մնացած խնդիրներից։ Ա. Ենիքգոմշյանն ասաց, որ Հայաստանում այսօր սպառնալիքներից մեկը ժողովրդագրական աղետն է, որը պետք է լուծեն բոլորը միասին՝ կանայք և տղամարդիկ։

«Կոչ ենք անում, որ կանայք իրենց իրավունքներն ամբողջությամբ պահանջելով և այդ իրավունքների իրացման համար պայքարելով հանդերձ՝ չանտեսեն մայրության խիստ կարևոր հանգամանքը»,- նշեց նա։ 

«Լուսավոր Հայաստան» կուսակցության թեկնածու Աննա Կոստանյանն ասաց, որ սիմվոլիկ թիվ է արձանագրված, որ  ընտրական ցուցակներում կանանց ներգրավածությունը պետք է լինի 25 տոկոսի չափով։

«Կարծում եմ՝ այստեղ արդեն իսկ ունենք թվի հետ կապված խնդիր։ Եթե խոսում ենք գենդերային հավասարության մասին, այստեղ պետք է արձանագրենք, որ թվային հարաբերակցությամբ ունենք անհավասար պայմաններ, հենց այստեղից սկսվում է  անհավասար պայմաններ, և անհավասար ներկայացվածության հնարավորություն»,- նշեց նա։

Ա. Կոստանյանի խոսքով, կանանց իրավունքների թեման բավականին լայնածավալ  և խորքային ուսումնասիրությունների, լուրջ հետազոտությունների,  նաև օրենսդրական մակարդակում վերանայման կարիք ունի, 2013 թվականին ընդունված գործող օրենքում չնայած արձանագրված է գենդերային հավասարության մասին, միևնույնն է՝ դրանք ուղղակի դրույթներ են, չեն ենթադրում պրակտիկ գործողությունների դրդում։

«Եթե ընտրությունների արդյունքում հայտնվեմ խորհրդարանում, անպայման հետամուտ եմ լինելու հենց այս դրույթների վերանայմանը, օրենսդրական մակարդակում վերամշակմանը»,- ասաց պատգամավորության թեկնածուն։

Նա նաև նշեց, որ կանայք ինչ-որ չափով խուսափում են  ընտրական պրոցեսներին մասնակցելուց, գուցե մտավախություն ունեն, որ թե ընտանիքի անդամների, թե հասարակության կողմից չեն հասկացվի։

«Խնդիր ունենք աշխատելու հասարակության լայն շերտերի հետ, հատկապես մարզերում»,- ընդգծեց նա։

«Մենք» դաշինքի թեկնածու Լուսինե Զակալաշվիլիի խոսքով, իրենց դաշինքի ցուցակի առաջին տասնյակում ոչ թե երկու, այլ երեք կին է ներկայացված, ինչը խոսում է այն մասին, որ իրենց համար գենդերային հավասարությունը կարևոր դեր է խաղում։

Հայ Յեղափոխական Դաշնակցություն կուսակցության թեկնածու Ռուզաննա Առաքելյանն ասաց, որ ինքնանպատակ չպետք է լինի կնոջ ներգրվածությունը քաղաքականության մեջ։

«Ի վերջո քաղաքականության մեջ պետք է ներգրավվեն կանայք, ովքեր ունեն բավարար ներուժ, ոչ միայն բարձրագույն կրթություն, համապատասխան ինտելեկտ, նաև ունենան քաղաքական մտածողություն, աշխարհընկալումը փոքր-ինչ տարբեր պետք է լինի, որովհետև երկրի թիվ մեկ ամբիոնից պետք է խոսեն իրենց երկրի մասին, երկիր ներկայացնեն։ Պատրաստված կանայք պետք է հավակնեն քաղաքականություն մտնել»,- նշեց նա։

Ռ. Առաքելյանի խոսքով, հատկապես գյուղերում ՏԻՄ ընտրությունների ժամանակ կանայք չեն ընտրում կանանց. «Չի գործում նախանձի գործոնը, կարծում եմ՝ վստահության խնդիր է։ Դեռևս  հասարակության մեջ կա մի խավ, հատկապես մարզերում, գյուղերում, որ տղամարդկանց են վստահում։ Կարծում եմ՝  հոգեբանական այս պատնեշները պետք է հաղթահարել  հասարակության զարգացման միջոցով»,- նշեց ՀԿԴ-ական գործիչը։

«Ազգային առաջընթաց» կուսակցության թեկնածու Լուսինե Հարոյանի խոսքով, պետք է խնդիրը լուծել համակարգային, ստեղծել առողջ հասարակություն։ Նա կարևորեց ՀՀ բոլոր քաղաքացիների իրավագիտակցության բարձրացումը, որովհետև պետք է յուրաքանչյուր քաղաքացի հասկանա, որ նույնքան կարող է մասնակցել քաղաքական գործընթացներին և լինի հենց իշխանության տերը։

«Իմ քայլը» դաշինքի թեկնածու Գայանե Աբրահամյանն ասաց, որ կանանց իրավունքների խնդիրը բազմաշերտ է, միայն քվոտաների  լուծմամբ այդ հարցը չի լուծվելու։

«Մենք խնդիր ունենք  հասարակության մեջ կարծրատիպերի կոտրման, կարծրատիպերից դուրս կանանց իրավունքների և հավասարության ներդրման։ Մեր ծրագրում հենց այս ոլորտի վրա է շեշտադրումն իրականացված, կրթական բարեփոխումների բաժնում է հիմնական հատվածը, որը վերաբերում է  հենց կանանց իրավունքներին»,- նշեց նա։