Ձեր վստահելի աղբյուրը

Արցախի Հանրապետության Նախագահ Բակո Սահակյանը այսօր շնորհավորական ուղերձ է հղել Ոստիկանության ծառայողի օրվա առթիվ:

Ուղերձում ասված է.

«Ոստիկանության հարգելի՛ աշխատակիցներ և վետերաններ,
Արցախի Հանրապետության իշխանությունների և անձամբ իմ անունից ի սրտե շնորհավորում եմ ձեզ մասնագիտական տոնի կապակցությամբ:

Քաղաքացու իրավունքների ու ազատությունների, մարդու, հասարակության և պետության շահերի պաշտպանությունը, հանցագործությունների կանխարգելումը և դրանց դեմ պայքարը, իրավախախտումների նախականխումը ապահովելուն ուղղված ձեր ծառայությունը կարևոր տեղ է զբաղեցնում մեր պետականաշինության գործընթացում:

Վստահ եմ, որ դուք քաջ գիտակցում եք ձեր պարտականությունների պատշաճ կատարման անհրաժեշտությունը, որ հենց ձեր արհեստավարժ ու սկզբունքային աշխատանքով, մարդկային ու բարոյական որակներով, մասնագիտական համապատասխան ունակություններով ու անձնվիրությամբ ըստ ամենայնի նպաստում եք ոստիկանի դերի և պետության հանդեպ քաղաքացիների վստահության բարձրացմանը, հասարակության մեջ հանգիստ ու առողջ մթնոլորտի պահպանմանը: 

Պետությունը հատուկ ուշադրության կենտրոնում է պահում համակարգում առկա խնդիրները, որոնց արդյունավետ լուծմանն են ուղղված իրականացվող բարեփոխումները:  Ձեր աշխատանքային և սոցիալական պայմանների բարելավման նպատակով կատարվող աշխատանքները կրելու են շարունակական բնույթ:

Թանկագի՛ն բարեկամներ,

Մեկ անգամ ևս շնորհավորում եմ բոլորիդ Ոստիկանության ծառայողի օրվա առթիվ և մաղթում խաղաղություն, քաջառողջություն, մեծագույն հաջողություններ ձեզ և ձեր ընտանիքներին»: