Ձեր վստահելի աղբյուրը

Հայ-ռուսական հարաբերություններն այսօր հատուկ հոգածության կարիք ունեն։ Երևանում «Լազարևյան ակումբի» առաջին լիագումար նիստի ժամանակ հայտարարեց ՀՀ երկրորդ նախագահ Ռոբերտ Քոչարյանը։

Նա հույս հայտնեց, որ քննարկումների այս հարթակը  կդառնա ոչ միայն լավ ու բարի ընկերների հանդիպման վայր, այլև նոր գաղափարների գեներացման ու  հայ-ռուսական հարաբերությունների  ամրապնդման, հայ և ռուս ժողովուրդների բարեկամությանն ամրապնդմանն ուղղված նոր նախագծերի ստեղծման տեղ։

«Լազարևյան ակումբի» ստեղծման համար նա հատուկ շնորհակալություն հայտնեց Կոնստանտին Զատուլինին։

«Չեմ փորձի թաքցնել, որ դեռ մի քանի ամիս առաջ մեր հերթական հանդիպման ժամանակ նրա հետ քննարկել ենք այս գաղափարը։ Ես նրան հայտնեցի իմ լիակատար աջակցությունը և պատրաստակամությունը այս ակումբի ստեղծման  գործում»,-ասաց Քոչարյանն ու հայտնեց իր ուրախությունը, որ ակումբի մասնակիցներ են շատ հայտնի ու հեղինակավոր անձինք ինչպես Ռուսաստանից, այնպես էլ Հայաստանից։

Նա ընդգծեց, այս անհանգիստ ժամանակաշրջանում Հայաստանի ու հայ ժողովրդի ավանդական աշխարհքաղաքական առաջնահերթությունները վերանայելու մասին ուղղակի և անուղղակի կոչերը, նույնիսկ եթե կյանքի չեն կոչվում, էական վտանգ են ներկայացնում։

«Տեղեկատվական  տեխնոլոգիաներն ու սոցիալական ցանցերն այսօր մեծ հնարավորություն են ընձեռում մանիպուլացնելու հասարակական տրամադրությունները, նրանք թույլ են տալիս կասկած ու անվստահություն սերմանել միմյանց նկատմամբ, ինչը  բերում է մեր բազմամյա կապերի քայքայմանը»,-ասաց նա։

«Ցանկացած բարեկամություն պահանջում է ջանք, նվազագույնը կարիք ունի մեր էներգիայի, ժամանակի, զգացմունքների։ Բարեկամությունն իհարկե նաև իներցիա ունի, սակայն միայն դա բավարար չէ բարեկամությունը զարգացնելու համարք։ Հիշեք, ինչքան շատ ընկերներ ենք մենք կորցրել այն պատճառով, որ բավարար ջանք չենք ներդրել այդ ընկերությունը պահպանելու համար»,-ասաց Ռոբերտ Քոչարյանը։

Քոչարյանի խոսքով, բարակեմանությունն ավարտվում է, երբ ի հայտ է գալիս կասկածը  ընկերոջ ազնվության, մտադրությունների նկատմամբ, երբ կողմերից մեկը միշտ ձգտում է վերցնել ավելին, քան պատրաստ է տալ։

«Դժվար է ընկերություն անել անվերջ խնդրողի, պարտադրողի, նվնվացողի կարգավիճակում գտնվողի հետ։ Այդպես է ոչ միայն անձնական, այլև միջպետական  հարաբերություններում։ Հենց այստեղ, հենց միջպետական հարաբերություններում մենք պետք է հասկանալի լինենք, կանխատեսելի,  հուսալի ու պիտանի գործընկերների համար։ Պետությունների միջև բարեկամական հարաբերությունները ոչ միայն շահերի համընկնումն է, այլ պետական շահերի սինթեզ, մարդկային գործոնը ներթափանցում է մեր երկու հասարակությունների հարաբերությունների մեջ»,-նշեց ՀՀ երկորրդ նախագահը։

ՀՀ երկրորդ  նախագահը նշել է, Հայաստանի ու Ռուսաստանի հարաբերությունների եզակիությունը, ընդգծել, որ դրանց պահպանման ու զարգացման  համար ամենօրյա ջանքեր են պետք։

Ի դեպ, ՀՀ երկրորդ նախագահն իր ստորագրությամբ իր հեղինակած գրքի առաջին օրինակներից նվիրել է  ՌԴ Պետական դումայի ԱՊՀ գործերով, եվրասիական ինտեգրման և հայրենակիցների հետ կապերի կոմիտեի նախագահի առաջին տեղակալ Կոնստանտին Զատուլինին։