Ձեր վստահելի աղբյուրը

Մանվել Գրիգորյանի առողջական վիճակը գնալով վատանում է։ Panorama.am-ի հետ զրույցում հայտնեց Գրիգորյանի փաստաբաններից Արսեն Մկրտչյանը, ով ամեն օր երեկոյան մի քանի ժամով տեսակցում է իր պաշտպանյալի հետ։

«Մանվել Գրիգորյանն անկողնային մի օր էլ չի ապրելու, ինչպես ինքն է ասում։ Ոտքի վրա է տանում հիվանդությունը։ Օրական ստանում է 20 հաբ դեղ,  խմում է 30 միավոր ինսուլին այն դեպքում, երբ կալանավորվելուց առաջ ինսուլինից կախվածություն չի ունեցել։  Շաքարի ցուցանիշը նախքան կալանքը եղել է 7-ից ցածր։ Կալանավորումից հետո շաքարային դիաբետը զարգացել այն աստիճանի, որ այսօր պրոֆեսիոնալ բժիշկները հայտարարում են՝ կա վերջույթները հեռացնելու վտանգ, գանգրենոս պրոցեսներ կան»,-ասաց փաստաբանը։

Մկրտչյանը նշում է, խցային պայմաններում հիվանդության դեմ պայքարն իրականցվում է այնքանով, որքանով հնարավոր է, հրավիրյալ մասնագետների միջոցով, իսկ հիվանդությունների լիովին կասեցման մասին խոսք լինել չի կարող։

«Բայց ամեն դեպքում Մանվել Գրիգորյանի խառնվածքն ու բնույթն այնպիսին է, որ նա հերոսաբար տանում  իր խաչը, որն իր վրա նենգաբար բարձել են զուտ պոպուլիստական միտումներից ելնելով»,-ասաց պաշտպանը։

Մկրտչյանի խոսքով, «նույնիսկ իրավաբան լինել պետք չէ՝ հասկանալու, որ այդ մեղադրանքը ծիծաղելի է, այն ծիծաղելի է նույնիսկ հեղինակների համար։ Այն իրերը, որոնք հայտնաբերվել են տարբեր վայրերում, բնավ չեն վկայում այն մասին, որ յուրացումը կատարվել է Մանվել Գրիգորյանի կողմից, յուրացման փաստը, Մանվել Գրիգորյանի առնչությունը հայտնաբերված իրերին ոչ վարույթ իրականացնող մարմինը, ոչ էլ որևէ մեկը չի կարող հիմնավորել։ Ես ուզում եմ իմ և Մանվել Գրիգորյանի կողմից փոխանցել մի միտք, որ այն մարտական ընկերը, պատերազմ  տեսած անձը, որը մի տոկոս անգամ կարող է կասկած հայտնել, որ Մանվել Գրիգորյանը կարող է առնչություն ունենալ զինվոր պարագանների, սնունդի յուրացնելու հետ, ուրեմն այդ անձն ընդունակ է նման բան անել»։

Հետաքրքրվեցինք, արդյո՞ք ասվածը վերաբերում է Սեյրան Սարոյանին, ինչին ի պատասխան փաստաբանն իր անունից ասաց. «Ոչ ոք թող  չփորձի Մանվել Գրիգորյանի և  Սեյրան Սարոյանի հարաբերությունների մեջտեղում ինչ-որ դիվիդենտներ հավաքել, նրանց մեջ եղել է ու կա մաքուր ընկերություն, Սեյրան Սարոյանը Մանվել Գրիգորյանի հետ ունի քավորսանիկական հարաբերություններ ու անցել է մարտական ճանապարհ։  Ես ամեն օր մի քանի ժամ անցկացնում եմ Մանվել Գրիգորյանի հետ, ասում եմ՝ մեծ հարգանքով եմ վերաբերվում Սեյրան Սարոյանին, եթե ես չեմ խոսում, թող որևիցե մեկը  չփորձի այդ արտահայտությունները շահարկի։ Վստահ եմ, որ հեռու  չէ այն ժամանակը, որ իրար հետ նորից կհանդիպեն, կխոսեն, կդնեն-կվերցնեն»։
Հարցին,  կալանքի տակ գտնվելու ընթացքում Գրիգորյանին այցելե՞լ է Սարոյանը, փաստաբանը նշեց՝ նման տեղեկություն չունի, հավանաբար՝ ոչ։

Արսեն Մկրտչյանի խոսքով, Գրիգորյանին հաճախ այցելել ու հնարավոր ամեն ինչ արել են մարդու իրավունքների պաշտպանը, ՄԻՊ աշխատակազմի վարչության ներկայացուցիչները։
«Սա այն դեպքերից է, երբ ՄԻՊ գրասենյակն ամենագործուն մասնակցություն ունի մարդու իրավունքների ու հիմնարար ազատությունների պաշտպանության գործում։  Գրասենյակի ներկայացուցիչները ոչ միայն այցելել են, այլև բազմաթիվ գրություններով համագործակցել արդարադատության նախարարության,  գլխավոր դատախազության հետ, իրենց մտահոգություններն են հայտնել»,-կարծիք հայտնեց Գրիգորյանի պաշտպանը։

Հիշեցնենք, որ այսօր վարչապետի պաշտոնակատար Նիկոլ Փաշինյանին բաց նամակով դիմել է  Գրիգորյանի մյուս փաստաբանը՝ Լևոն Բաղդասարյանը, որտեղ մասնավորապես ասված է.
«Մեծարգո՛ պարոն Վարչապետ, օրեր առաջ հայտարարեցիք, թե ինչու չեն հրապարակվում Մանվել Գրիգորյանի հիվանդության թղթերը և հորդորեցիք, որպեսզի հանրությանը տեղեկացվի, թե ինչ հիվանդություններ ունի: Անսալով ձեր հորդորին՝ ներկայացնում եմ Արցախի հերոս, գեներալ Մանվել Գրիգորյանի հիվանդությունների վերաբերյալ տեղեկատվություն: Ընդ որում, դրանց հիմնական մասը վարույթն իրականացնող մարմնի որոշումների հիման վրա է տրամադրվել:

Համաձայն «Արմենիա» ԲԿ-ում 20.08-23.08.2018 թվականին ստացիոնար հետազոտման մեջ գտնվող Մանվել Գրիգորյանին տրված N5277/2351 էպիկրիզի՝ կալանավորվելուց հետո նրա սոմատիկ հիվանդություններն ավելի են ծանրացել: Կրծքավանդակի օրգանների ՀՇ- քննությամբ ձախից հայտնաբերվել են մեծացած պարաաորտալ լիմֆատիկ հանգույցներ, որոնք խոսում են ուռուցքային պրոցեսի հնարավոր վերսկսման մասին: Սկսվել է սիրտ- թոքային անբավարարություն, շնչական անբավարարություն, ս/վ ցավերը կրում են մշտական բնույթ, տեսողությունը վատացել է, առկա է դժվարամիզություն, ունի մշտական փորկապություն` աղիքային անանցանելիություն էպիզոդներով:

ԱՆ «Երևան-Կենտրոն» քրեակատարողական հիմնարկի կալանավոր Մանվել Գրիգորյանի բժշկական ամբուլատոր քարտից արված 13.07.2018 թվականի քաղվածքի՝ Ֆրանսիայի Փարիզ քաղաքի Ալլերայի-Լա-Բրաստ կլինիկայի Ուռուցքաբանության բաժանմունքի վարիչ, բժիշկ ուռուցքաբան Նորբերտ Ավետյանի կողմից (Մանվել Գրիգորյանին վիրահատող բժիշկ) կատարվել է հետևյալ գրառումը. «…հաշվի առնելով հիվանդի մոտ ուռուցքի` մանր բջջային քաղցկեղի ագրեսիվությունը, հիվանդին գտնվել նման վայրում արգելվում է»:

Համաձայն ՀՀ ԱՆ «Երևան-Կենտրոն» քրեակատարողական հիմնարկի կալանավոր Մանվել Գրիգորյանի բժշկական ամբուլատոր քարտի՝ 20.06.2018 թվականին ֆիքսվել է շաքարային դիաբետ՝ տիպ 2 միջին ծանրության և նշանակվել է դեղորայքային բուժում: Որոշ ժամանակ անց ստանում է ինսուլին լանտուս՝ 8-6 միավոր, որից հետո՝ 12 միավոր, այնուհետև երկու անգամ առավոտյան՝ 12 միավոր, երեկոյան՝ 16 միավոր, այնուհետև՝ 18 ED ինսուլին, այնուհետև՝ 20, 25, 30 ED ինսուլին:

Այսօր արդեն նա տառապում է շաքարային ծանր դիաբետով:
Բազմիցս եմ բարձրաձայնել, որ օրենքով նախատեսված հիմքերը բացակայում են Մ.Գրիգորյանին պահել կալանքի տակ, իսկ վերացական դատողություներով նրան պահելը կալանավայրում անթույլատրելի է: Նման հիվանդություններով և հիվանդությունների նման բացասական դինամիկայով անձին պահելը կալանքի տակ հանցագործություն է, որի պատասխանատուն պետությունն է: Առաջարկում եմ պետական լիազոր մարմնին կրկին դիմել բժշկական կենտրոններին՝ առաջադրելով հետևյալ հարցը. նման ծանր հիվանդություններով մարդը կալանքը կրելով կմահանա՞, թե՞ չի մահանա:
Եթե նորագույն Հայաստանում մարդն արժեք չունի և կոպտորեն խախտվում են նրա հիմնարար իրավունքները, եթե նախաքննությունը, արդարադատությունն ընտրովի է, եթե իրավապաշտպանի բարձրաձայնած խախտումները մնում են օդում կախված, ապա դրա դառը պտուղների քաղողը վաղը լինելու է իշխանությունը՝ բխող բոլոր բացասական հետևանքներով:

Մեծարգո պարոն Վարչապետ.
Հաշվի առնելով նախընտրական այս օրերի լարված վիճակը՝ ձեռնպահ եմ մնում և չեմ բարձրաձայնում այն կոպտագույն խախտումներն ինչպես դատական իշխանության, այնպես էլ նախաքննական մարմինների, որպեսզի չքաղաքականացվի այս գործը, սակայն ընտրություններից հետո կիրազեկեմ և իրավական հարթության վրա կպայքարեմ դրանց դեմ:
Հայաստանում պետք է արմատախիլ անել և բացառել խտրականությունն ու ընտրովի արդարադատությունը, ինչպես և անմեղության կանխավարկածի խախտումները, առավել ևս, երբ վերջինիս կրողը երկրի բարձրագույն իշխանությունն է»:

Հիշեցնենք, որ նոյեմբերի 23-ին Նիկոլ Փաշինյանը հայտարարել էր. «Այս պահին իմ ձեռքի տակ չկա փաստ, որ վկայում է, որ Մանվել Գրիգորյանի առողջական վիճակն անհամատեղելի է նրա կալանքի հետ»։