Ձեր վստահելի աղբյուրը

«Մենք լինելու ենք մի ուժ, որն այս փուլում ապահովելու է քաղաքական հավասարակշռությունը։ Իսկ երկարաժամկետ հեռանկարի համար մենք ունենք մեր շատ լուրջ ծրագիրը»,- քարոզարշավի շրջանակներում Սևանում ընտրողների հետ հանդիպմանն ասաց «Սասնա Ծռեր» կուսակցության համամասնական ցուցակը գլխավորող Վարուժան Ավետիսյանը։

Նա նշեց, որ իրենց պատկերացմամբ վերադարձված թալանը ծառայելու է սոցիալ-տնտեսական զարգացման համար՝ որպես մեկնարկային կապիտալ։

«Ընթացիկ քայլերից պետք է լինի նվազագույն սպառողական զամբյուղի հաշվարկումը իրականությանը համապատասխանեցնելը։ Սրանք փոքր թվացող բաներ են, բայց իրականում համակարգ ստեղծող բաղադրիչներ են, որոնք եթե մենք ճշգրտենք և տեղը բերենք, շղթայական  ռեակցիայով բերելու են էական բարեփոխումների»,- ասաց նա։

Անդրադառնալով անվտանգության, պաշտպանության ոլորտին՝ Ավետիսյանն ասաց. «Մենք ներկայացնելու ենք ազգ-բանակ հայեցակարգը, որի հիման վրա նպատակ ունենք ձևավորելու պաշտպանական համակարգ»։

Նրա կարծիքով՝ քաղաքական համակարգը պետք է հիմնված լինի երկու բևեռի վրա, որպեսզի կարողանա առաջ գնալ. «Մեկ ուժի վրա հիմնված քաղաքական համակարգը նման է միոտանի մարդու, իսկ մեր կուսակցությունը կարող է այդ մյուս ոտքի՝ հավասարակշռող ուժի դերը կատարել»։

Նա հավելեց, որ հարգանքով են վերաբերում նոր ստեղծված կուսակցություններին, բայց նրանք չեն կարող այդ բեռը իրենց վրա վերցնել։