Ձեր վստահելի աղբյուրը

«Մենք գնում ենք ԱԺ՝ ունենալով ծրագիր, և միտք՝ օրենքներ գրելու, ինչպես նաև գնում ենք՝ վերահսկելու կառավարությանը»,-լրագրողների հետ այսօր կայացած հանդիպման ժամանակ ասաց «Սասնա ծռեր» կուսակացության պատգամավորության թեկնածու Ստեփան Գրիգորյանը՝ հավելելով, որ իրենք ընտրվելու լուրջ հնարավորություններ ունեն։

Նրա խոսքով, գերվարչապետական համակարգը վտանգավոր է Հայաստանի համար, պետք է հանել վարկանիշային համակարգը, քանի որ այն թույլ չի տալիս կուսակցություններին հավասար պայմաններում լինել։

«Մենք հասկանում ենք, որ ռեյտինգային համակարգի պատճառով խորհրդարանն իդեալական չի լինի։ Պետք է իրականացնել սահմանադրական փոփոխություններ և կուսակցությունների մասին օրենքի փոփոխություն։ Մենք նաև համարում ենք, որ պետք է շարունակվի կոռուպցիայի դեմ համակարգային պայքարը»,- ասաց Ստեփան Գրիգորյանը։

Անդրադառնալով ղարաբաղյան հիմնախնդրին՝ պատգամավորության թեկնածուն շեշտեց՝ իրենց տեսլականն է վերջնահաշվարկում Հայաստանն ու Արցախը միավորված տեսնել. «Սրան պետք է փուլային ճանապարհով գնալ։ Արցախը Հայաստանի մի մասն է։ Ինչո՞ւ պետք է  այնտեղ տենդենցներ լինեն, որոնք մեզ համահունչ չեն լինի»։