Ձեր վստահելի աղբյուրը

ՌԴ Պետական դումայի ԱՊՀ գործերով, եվրասիական ինտեգրման և հայրենակիցների հետ կապերի կոմիտեի նախագահի առաջին տեղակալ Կոնստանտին Զատուլինն լրագրողների հետ զրույցում հայտարարել է, որ Արցախյան հակամարտության կարգավորումը  սպասում է իր հերթին։ Խնդրի կարգավորման գորրծընթացում առկա ժամականավոր դադարը նա պայմանավորել է Հայաստանում կայանալիք առաջիկա արտահերթ ընտրություններով։

«Ինձ թվում է հիմա դադար է վերցված, չգիտեմ դա որքանով է արդարացված, բայց կարծում եմ, որ բարձր մակարդակի քաղաքական գործիչները գնահատում են այն փաստը, որ Հայաստանում անցկացվելու են ընտրություններ»,- ասել է նա։  

Ռուսասատանցի բարձրաստիճան պաշտոնյայի դիտարկումները նկատի առնելով՝ Panorama.am-ի թղթակիցը թեմայի շուրջ մի քանի հարց ուղղեց ՀՀ արտակարգ և լիազոր դեսպան, Արցախի ԱԳ նախկին նախարար Արման Մելիքյանին։

Panorama.am- Պարոն Մելիքյան, կարելի՞ է արդյոք պնդել, որ ռուսական կողմն Արցախյան հակամարտության կարգավորման հարցը հերթագրում է ընտրություններից հետո։
Պատասխան- Կարծում եմ սա ոչ թե հերթագրման խնդիր է, այլ հարցի հանդեպ իրատեսական մոտեցում: Այս պահի դրությամբ Հայաստանի գործող անցումային կամ ժամանակավոր կառավարության որևէ որոշում կարգավորման հարցում չէր համարվի իրապես իրավաչափ ու հիմնավոր հենց այն պատճառով, որ այդ կառավարությունն ինքն այս ուղղությամբ քայլեր ձեռնարկելու բավարար մանդատով օժտված չէ: Սա է պատճառը, որ, գոնե ձևական առումով, հատկապես ազդեցիկ արտաքին դերակատարների համար ցանկալի կլինի գործ ունենալ քաղաքացիների ակնհայտ աջակցության մանդատն ունեցող հայաստանյան իշխանության հետ:

Panorama.am- Հակամարտության կարգավորման ամբողջ ընթացքն աչքի առաջ ունենալով՝ տարածքների  հանձնման հարց բարձրացնելու վերահաս վտանգ տեսնո՞ւմ ենք։
Պատասխան- Այդ վտանգը կպահպանվի այնքան ժամանակ, քանի դեռ պաշտոնական Երևանն ու Ստեփանակերտը նոր բանակցային օրակարգի ձևավորման նախաձեռնողը չեն դարձել:

Panorama.am- Ինչպե՞ս կբնութագրեք խնդրի կարգավորման ներկա փուլը։
Պատասխան- Վարչապետի պաշտոնակատար Նիկոլ Փաշինյանը հայտարարել է, որ իրավասու չէ բանակցային սեղանի մոտ ներկայացնել նաև Արցախի ու արցախահայության շահերը, և սա միանգամայն նոր պոտենցիալ հնարավորություններ է ստեղծում մեր բանակցողների համար՝ մեր շահերը հավուր պատշաճի պաշտպանելու համար: Ասվել է նաև, որ հակամարտության խաղաղ կարգավորումն իրատեսական կլինի միայն այն դեպքում, եթե բանակցություններին լիարժեքորեն մասնակցի նաև պաշտոնական Ստեփանակերտը: Բայց այս երկու թեզերն ընդամենը նոր զարգացումներին մեկնարկ տալու հայտ են իրենցից ներկայացնում: Որպեսզի այդ թեզերը օդում կախված ու անարդյունք չմնան, պաշտոնական Երևանը պետք է մշակի և իրականացնի նշված նպատակների իրագործումն ապահովող քայլերի ծրագիր, իսկ պաշտոնական Ստեփանակերտն էլ նախապատրաստի բանակցային օրակարգի իրեն վերաբերող հարցերի շրջանակը: Այս ամենը հնարավոր է անել, բայց ես վստահ չեմ, որ մեր գործող իշխանությունն այս ուղղությամբ անհրաժեշտ նախապատրաստական քայլերն արդեն արել է:

Panorama.am- Տեղեկություններ կան, որ դեկտեմբերին՝ ԵԱՀԿ նախարարական համաժողովին, հնարավոր է՝ հանդիպեն Հայաստանի և Ադրբեջանի ԱԳ նախարարները։ Իրատեսական համարո՞ւմ ենք, որ մինչև տարեվերջ հակամարտության  կարգավորման գործընթացում էական զարգացումներ գրանցվեն։
Պատասխան- Դրա համար առարկայական նախադրյալները չկան: