Ձեր վստահելի աղբյուրը

«Ռուսական կողմը չի կարող պարծենալ նրանով, որ Հայաստանում բազմաթիվ ռուսական ՀԿ-ներ կան, Եվ դա է պատճառը, որ մենք առաջարկել ենք  ստեղծել «Լազարյան ակումբը»։ Միաժամանակ,  տասը տարուց ավելի՝ Հայաստանում գործում է ԱՊՀ երկրների ինստիտուտի մասնաճյուղը»,- այսօր լրագրողների հետ զրույցում ասաց ՌԴ Պետական դումայի ԱՊՀ գործերով, եվրասիական ինտեգրման և հայրենակիցների հետ կապերի կոմիտեի նախագահի առաջին տեղակալ Կոնստանտին Զատուլինը։

Նա միաժամանակ նկատեց, որ ամեն ինչ ՀԿ-ների թվով չէր պայմանավորի. «Մենք միշտ ենթադրել և հույս ենք ունեցել, որ Հայաստանի հետ մեր հարաբերությունները լրացուցիչ հովանավորչության և բացատրությունների կարիք չունեն։ Հնարավոր է, որ մենք ճիշտ չենք եղել, որովհետև նոր սերունդներ են գալիս, և բացատրելու ու համոզելու խնդիրը շարունակում է մնալ։ Բայց ինձ նախկինի պես թվում է, որ եթե Ռուսաստանը Հայաստանում գլխավոր ներդրողն է, ապա հիմքեր ունի այս և այլ հանգամաներ հաշվի առնելով՝ ենթադրել, որ հենց սա  է ՌԴ փափուկ ուժի դրսևորումը»։

Անդրադառնալով «Լազարյան ակումբի» աշխատանքների արդյունքներին, ՌԴ Պետական դումայի պաշտոնյան նշեց, որ իրենք դիտմամբ եզրափակիչ ելույթներ չեն նախապատրաստել, քանի որ դա առաջին նիստի շրջանակներում չափազանց հավակնոտ կլիներ։

«Մենք լսեցինք բոլոր արտահայտվել ցանկացողներին, ակումբի ժամանակավոր խորհուրդ ընտրեցինք, պայամանվորվեցինք հանդիպել Ռուսաստանում և Հայաստանում, պայմանավորվեցինք, որ կունենանք կայքէջ, մտքերի փոխանակություն։ Մենք կհանդիպենք փետրվարին՝ հաստատելու աշխատանքային պլանը։ Ես հիմքեր ունեմ գոհ լինելու»,- ասաց ռուսաստանցի պաշտոնյան։

Լրագրողները Կոնստանտին Զատուլինին խնդրեցին մեկնաբանել՝ ի՞նչ երաշխիքներ կան, որ Ադրբեջանը կդադարի կրակել, և բանակցություններն իսկապես արդյունավետ կլիեն։

«Ես ոչ մի կերպ նման երաշխիքներ չեմ կարող տալ։ Իմ կողմից դա չափազանց հավակնոտ կլիներ։ Ես մարդ եմ, ում մուտքն Ադրբեջան 2010 թվականից արգելված է։ Դուք գիտեք, որ ցավոք, ադրբեջանական կողմը շարունակում է կրակել։ ՀՀ ներքաղաքական իրավիճակը՝ արտահերթ ընտրություններին նախապատրաստվելը, ակամայից  դադար են մտցրել Արցախյան հակամարտության կարգավորման բանակցային գործընթացում։ Քանի դեռ ներքին հարցերը չեն լուծվել, լուրջ որոշումներ չեն ընդունվի ոչ Հայաստանում, ոչ Ադրբեջանում, ոչ էլ ԵԱՀԿ Մինսկի խումբն է դրան պատրաստ։

Իհարկե, առկա են որոշակի նոր ակցենտներ և հայկական կողմի ցանկությունը՝ Արցախին վերադարձնել բանակցային սեղանի շուրջ։ Կարծում եմ՝ սա դժվար, բայց ոչ անիրագործելի խնդիր է։ Մենք հիշում ենք, որ ժամանակին նման պրակտիկա եղել է»,- ասաց Զատուլինը՝ հույս հայտնելով, որ հայ-ռուսական հարաբերություններն այսուհետ ևս կշարունակեն զարգանալ։