Ձեր վստահելի աղբյուրը

«Հետաքրքիր խանդավառություն եմ նկատում ժողովրդի մեջ, հետաքրքրություն կա ծրագրերի նկատմամբ»,-լրագրողներին ասաց Էջմիածնում նախընտրական քարոզարշավ իրականացնող «Մենք» դաշինքի պատգամավորության թեկնածու Խաչատուր Քոքոբելյանը։

Նա նշեց, որ իրենց դաշինքն այն եզակի քաղաքական ուժերից է, որ ներկայացրել է շատ ընդգրկուն, փաստարկված ծրագիր, ցանկացած թվի տակ, ցանկացած ոլորտում կա հաշվարկ, մոտեցումներ։

Խ. Քոքոբելյանի ներկայացմամբ, իրենք երեք տարում ամբողջությամբ կկառուցեն միջհամայնքային ճանապարհները, նախատեսում են աշխատավարձերի բարձրացում, գազի, էլեկտրաէներգիայի սակագների իջեցում։

«Հայաստանում չկա չլուծվող հարց, ուղղակի մարդիկ են պետք, ովքեր կարող ուժ են, ունեն այն գիտելիքները, պոտենցիալը, որ կարող են լուծել այդ խնդիրները»,- նշեց պատգամավորության թեկնածուն։

«Մենք» դաշինքի ցուցակը գլխավորող Արամ Սարգսյանն ասաց, որ թեև նախընտրական քարոզարշավի ժամանակաշրջանը կարճ էր, բայց փորձում են իրենց հնարավորությունների սահմաններում լինել բակերում, շփվել մարդկանց հետ։

«Բարեբախտաբար, ճանաչելության խնդիրը լուծել ենք։ Այսօր Ազգային ժողովի ընտրությունների  արդյունքների մասին կարող է անհոգ լինել միայն «Քաղաքացիական պայմանագիր» կուսակցությունը, մնացած բոլորը խնդիրներ ունեն։ Ովքեր  մեծամտանում են այդ խնդիրների առումով,  իրենք կարող են արդյունքներ չունենալ։ Մենք չենք  մեծամտանում, մենք աշխատել ենք, աշխատում ենք,  այս օրերին էլ պինդ աշխատելու ենք, որ արդյունքներ գրանցենք»,- նշեց նա։

Ա. Սարգսյանն ասաց, որ իրենք արևմտյան արժեքներ կրող ուժ են։

«Մարդիկ մտածում են, որ եթե արևմտյան արժեքներ են, ուրեմն բոլոր այն  վատ բաները, ինչ քարոզել են, դա են հիշում։ Մոռանում են, որ այդ արժեքների հիմքում  լավ, որակյալ կրթությունն է ու առողջապահությունը,  որակյալ արտադրանքը, արևմտյան ժողովրդավարությունն ու արդար դատական համակարգը։

Այս ամենն ընդունելով՝ մեր համար կարևորն ու առաջինը Հայաստանն է, այդ արժեքները  ծառայեցնում ենք Հայաստանին, ոչ թե այդ արժեքները կրելով ուզում ենք իրենց բարքերը, եղած վատը ներառել ու բերել այստեղ, այլ այնտեղի  եղած լավը ծառայեցնել Հայաստանին»,- ասաց նա։