Ձեր վստահելի աղբյուրը

15։25
«Ծափահարություններ մեր զինվորներին, մեր զինված ուժերին, մեր սպաներին ու գեներալներին»

Վարչապետի պաշտոնակատարն այսօր Արարատում հայտարարեց, որ ՀՀ զինված ուժերն ամբողջությամբ սահմանին տիրապետում են ռազմավարական նախաձեռնությանը:

Նրա խոսքով՝ իր վարչապետ ընտրվելուց հետո, Ադրբեջանը հայտարարեց Նախիջևանում 11 հազար հեկտար տարածք ազատագրելու մասին: Ցավալիորեն, ըստ նրա, Հայաստանում եղան ուժեր, որոնք գիտակցաբար կամ անգիտակցաբար սկսեցին տուրք տալ այդ ապատեղեկատվությանը:

«Ես հույս ունեմ, որ դուք՝ Արարատի բնակիչներդ,  հենց սկզբից եք իմացել, որ դա կատարյալ անհեթեթություն է, և ՀՀ զինված ուժերը ինչպես նախկինում վստահորեն պաշտպանել են մեր սահմանները և մեր անվտանգությունը, այնպես էլ հիմա վստահորեն պաշտպանում են մեր անվտանգությունը: Իհարկե, նրանք, ովքեր եղել են սահմանին և առաջնագծում և տեղյակ են այդ դիրքային նրբություններին, գիտեն, որ դիրքերը սեզոնային և այլ որոշակի փոփոխությունների են ենթարկվում: Ըստ էության, կարող ենք արձանագրել հետևյալը՝ ՀՀ զինված ուժերը ինչպես ամբողջությամբ տիրապետում էին ռազմավարական նախաձեռնությանը, այնպես էլ ամբողջությամբ տիրապետում են ռազմավարական նախաձեռնությանը: Սրանում համոզվելու համար 15 օր առաջ եղել եմ  հայ-ադրբեջանական սահմանի Նախիջևանի հատվածում, ծանոթացել եմ իրավիճակին և կարող եմ անձամբ հավաստիացնել այդ մասին»,- ասաց Նիկոլ Փաշինյանը և հավաքվածներին առաջարկեց  ծափահարեն զինվորներին, որոնք հիմա կանգնած են սահմանին. «Ծափահարություններ մեր զինվորներին, մեր զինված ուժերին, մեր սպաներին ու գեներալներին»:

Վարչապետի պաշտոնակատարը նաև կոչ արեց չհավատալ բոլոր այն սադրիչ լուրերին, որոնք ոմանք քաղաքական էժան դիվիդենտներ շահելու նպատակով տարածում են:

Նրա խոսքով՝ քննադատությունը կարևոր է կառավարության համար, ժողովրդավարական հասարակության մեջ քննադատությունն առաջընթացի կարևոր գործիք է,  բայց չի կարելի սեփական նեղ քաղաքական շահերի համար սուտը տարածել և հարվածել ազգային անվտանգությանը:

«Այսօր քաղաքական ուժեր կան, որոնք այդ ճանապարհով են գնում, ոմանք փորձում են մեզ մեղադրել Արցախի դեմ ինչ-որ դավադրությունների մեջ ներգրավված լինելու համար: Մենք կարող ենք հասկանալ նաև նախընտրական տրամաբանությունը, բայց երբ այդպիսի լուրջ մեղադրանքներ են ներկայացվում, դա արդեն միայն քաղաքական հարթակում քննարկելու հարց չէ: Այո, այդ մարդիկ պետք է գնան և համապատասխան մարմիններին տան բացատրություններ: Նաև հանրության առաջ թող կանգնեն և պատասխան տան»,- հայտարարեց Նիկոլ Փաշինյանը:
Նրա խոսքով՝  երբ ասում են, որ այս հեղափոխությունը դավադրություն է Արցախի և Հայաստանի դեմ, ժողովուրդը պետք է  պահանջի՝ բացատրեն, թե դա ի՞նչ դավադրություն է, այդ ի՞նչ ինֆորմացիա է: «Իհարկե, դա սուտ է, քանի որ հեղափոխությունն արել է ժողովուրդը, եթե որևէ մեկը հեղափոխությանը մեղադրում է Հայաստանի կամ Արցախի դեմ դավադրության մեջ, ուրեմն նա ժողովրդին է մեղադրում Արցախի և Հայաստանի դեմ դավադրության մեջ: Մենք ասում ենք, որ Արցախի հարցը լուծողը կառավարությունը չէ, այդ հարցի լուծողը ժողովուրդն է, և ինչ կառավարություն էլ լինի, չի կարող ժողովրդի թիկունքում որևէ քայլ անել: Բա մի կառավարություն, ասենք՝ էդքան տուպոյ եղավ, գնաց ինչ-որ դավադրությունների մեջ մտավ, բա հետո հետ չի գալո՞ւ: Իրենք իրենց խառնում են ուրիշների հետ: Էդ դուք եք, որ երբ գնացել եք բանակցությունների, մտածել եք՝ բա մեր Բրյուսելի բիզնեսի վերջն ինչ է լինելու, Մոսկվայի բիզնեսի վերջն ինչ է լինելու, ԱՄՆ-ում մեր անշարժ գույքի վիճակն ինչ է լինելու»,- նշեց Փաշինյանը:

Անդրադառնալով Հայաստանի արտաքին քաղաքականության շուրջ քննադատություններին՝ վարչապետի պաշտոնակատարն ասաց, որ շատ կարևոր բան է փոխվել ՀՀ արտաքին քաղաքականության մեջ. «Փոխվել է այն, որ Հայաստանում հաստատված է կառավարություն, որ ոչ միայն Հայաստանում, այլ աշխարհի ոչ մի անկյունում ոչ մի բիզնես շահ չունի: Եվ ես ուղիղ եմ ասում՝ Հայաստանում հաստատվել է մի կառավարություն, որի վրա աշխարհում ոչ մեկը ոչ մի կոմպրոմատ չունի և չի կարող ունենալ՝ ի տարբերություն նախորդների: Ես ձեզ հստակ ասում եմ՝ միգուցե կոշտ է հնչում, բայց երկրագնդի վրա չկա այդպիսի ուժ, որ մեր կառավարության վրա ազդելու որևէ լծակ ունենա: Մեր կառավարության վրա ազդող միակ բացառիկ ուժը կա և  կլինի հայ ժողովուրդը, ՀՀ քաղաքացին»: 

14։10
Խնդիր ենք դրել առաջիկա հինգ տարիների ընթացքում ԶՈՒ կարիքների համար ծախսել հավելյալ 2,5 մլրդ դոլար
«Մենք խնդիր ենք դրել առաջիկա հինգ տարիների ընթացքում մեր ԶՈՒ կարիքների համար ծախսել հավելյալ 2,5 մլրդ դոլար, որը պետք է վճարեն ձեզ հայտնի կոռուպցիոներները»,- այս մասին այսօր Արարատ քաղաքում ասաց վարչապետի պաշտոնակատար Նիկոլ Փաշինյանը՝ հավելելով, որ եթե նրանք դա կանեն կամավոր, ապա հաշվի կառնեն, որ արել են կամավոր, բայց դա չի նշանակում, որ դա ամբողջ թալանվածն է:

Նրա խոսքով՝ շատ կարևոր է, որ կարողանան գնահատել, թե որքան գումար է գողացվել և որքան գումար պետք է վերադարձվի. «Սա հեշտ աշխատանք չէ, բայց չափազանց կարևոր է, որ քրգործերը լինեն հիմնավորված և որևէ մեկը քրեական հետապնդման չենթարկվի չհիմնավորված»:

Նիկոլ Փաշինյանն ասաց՝ հնարավոր է, որ նոր ԱԺ-ում կարող են լինեն օրենսդրական փոփոխություններ, հնարավոր է անցումային արդարադատության որոշակի տարրեր ներդնեն:

«Մենք պետք է կարողանանք մշակել պատրաստի բանաձևեր, ենթադրենք առանց որևէ քրգործի հարուցման, որովհետև քրգործը հարուցվում է կոնկրետ դեպքերով: Այսօր մեր  քննչական մարմինները ծանրաբեռնված են անհավատալի չափերով, քննիչներ կան, որ վարույթներում ունեն 20-30 քրգործեր: Այս առումով պետք է մեխանիզմներ մշակենք: Ենթադրենք, մեկը ներկայանում է քննչական մարմիններին ու հայտարարում, որ այսքան չարաշահում եմ թույլ տվել, գողացել եմ այսքան գումար, այսքան գումար պատրաստ եմ վերադարձնել: Մենք նման դեպքերում ի՞նչ ենք անում: Սա շատ կարևոր հարց է, որ պետք է քննարկենք առաջիկա Ազգային ժողովում: Մի կողմից հանրությունը մեր առջև պահանջ է դնում, որ կոռուպցիայի դեմ պայքարում մենք լինենք ավելի արդյունավետ, մյուս կողմից իրավական ընթացակարգերը թույլ չեն տալիս, որ լինենք բավարար չափով արագ»,- ընդգծեց Նիկոլ Փաշինյանը:

13։32
Վարչապետի պաշտոնակատարը նաև նշեց՝ Արամ Հարությունյանի գործի հետ կապված մտավախություն կա, որ վաղը կամ մյուս օրը քվորում չի լինի
«Իմ քայլը» դաշինքի թեկնածուները՝ վարչապետի պաշտոնակատար Նիկոլ Փաշինյանի գլխավորությամբ, քարոզարշավի ութերորդ օրը այցելել են Արարատի մարզ:

Արարատ քաղաքում բնակիչների հետ հանդիպման ժամանակ վարչապետի պաշտոնակատար, «Իմ քայլը» դաշինքի ցուցակը գլխավորող Նիկոլ Փաշինյանն անդրադարձավ ՀՀԿ խմբակցության պատգամավոր Արամ Հարությունյանի դեմ հարուցված քրգործին:

«ՀՀ գլխավոր դատախազն այսօր առավոտյան միջնորդություն է ուղարկել Ազգային ժողովի, որպեսզի օրակարգում ընդգրկվի ԱԺ պատգամավոր Արամ Հարությունյանի դեմ քրեական գործ հարուցելու և նրան որպես մեղադրյալ ներգրավելու հարցը: Արամ Հարությունյանը բնապահպանության նախկին նախարարն է և կասկածվում է 14 մլն դոլար կաշառք վերցնելու մեջ»,- հայտարարեց Փաշինյանը:

Նրա խոսքով՝ սա հերթական ապացույցն է այն բանի, որ իրենք կոռուպցիայի դեմ պայքարում լինելու են հետևողական:

Նիկոլ Փաշինյանը նշեց, որ այս օրինակով ուզում է ցույց տալ, թե ինչու են կոռուպցիայի հետ կապված գործերը երկար տևում:

«Այս գործի վերաբերյալ քաղաքացին հայտարարություն է տվել 4-5 ամիս առաջ: Քանի որ այդ գործողությունները, ըստ քրեական նյութերի,  կատարվել էին օտարերկրյա բանկի միջոցով, քրգործի քննություն պատշաճ ձևով չէր կարող շարունակվել այնքան ժամանակ, քանի դեռ օտարերկրյա պետություններից մեկից պատասխան չէր ստացվել մեր քննչական մարմինների ուղարկված հարցմանը: Այդ պատասխանի ստացումը տևեց 4-5 ամիս»,- ասաց նա:

Նա նկատեց, որ որոշ հարթակներում նման խոսակցություններ են եղել, թե  իրենք շոու են անում, որ բռնում են, հետո ինչ-որ բան պայմանավորվում. «Ես ուզում եմ ձեր բոլորի աչքերի մեջ նայելով ուղիղ ասել, որ որևէ հարցում որևէ անսկզբունք կոմպրոմիս չի լինելու, բացառված է, որ մենք  ժողովրդի թիկունքում գործարքներ կկնքենք որևէ հարցի վերաբերյալ, առավել ևս այն հարցերի, որոնք սկզբունքային նշանակություն են ունեցել Հայաստանում թավշյա հեղափոխության համար: Ոչ մի գործարք ժողովրդի թիկունքում չի լինելու և թալանված գումարները կոպեկ առ կոպեկ պետք է հետ բերվեն»:  

Նիկոլ Փաշինյանի խոսքով՝ այնպես չէ, որ իշխանափոխության հետևանքով պետական մարմինները փոխել են, բայց երաշխավորում է՝ այսօր դատական համակարգը գործում է կառավարությունից անկախ, ու դա վատ չէ, բայց ունե՞ն արդյոք երաշխիքներ, որ դատական համակարգը գործում է նախկին տերերից անկախ:

«Սկզբունքորեն պետք է, որ այդպիսի ազդեցության լծակներ չլինեն, բայց հասկանում ենք, որ  այսօրվա պաշտոնյանների 90 տոկոսը նշանակված է նախորդ համակարգի կողմից: Մենք ձեր առաջ ստանձնել ենք, որ կադրային ջարդ չենք անելու»,-ասաց նա:

Վարչապետի պաշտոնակատարը նաև նշեց՝ Արամ Հարությունյանի գործի հետ կապված մտավախություն կա, որ վաղը կամ մյուս օրը քվորում չի լինի:

«Կարող է լինել նման բան, որովհետև ԱԺ մեծամասնությունը Արամ Հարությունյանի խմբակցության ներկայացուցիչներ են և ՀՀԿ-ականները կարող են բոյկոտել, չներկայանալ նիստին, քվորում չապահովել կամ չքվեարկել Արամ Հարությունյանին կալանավորելու կամ որպես մեղադրյալ ներգրավելու հարցը: Ես հույս ունեմ, որ բոլոր պատգամավորները կներկայանան, կգրանցվեն և չեն խոչընդոտի կոռուպցիայի դեմ պայքարին, արդար քննությանը: Իսկ եթե այդպիսի բան տեղի ունենա, արդեն հաջորդ ԱԺ-ն այդ հարցին կանդրադառնա»,- հայտարարեց նա: