Ձեր վստահելի աղբյուրը

Փարիզում «Դեղին բաճկոնների» ցույցերը, որոնց շարքեր են մտել նաև աջակողմյան ու ձախակողմյան արմատականներ, ամփոփված են Հաղթական կամարի վրա արված գրաֆիտիներով՝ «Կեցցե քամին ու վանդալիզմը», «Դեղին բաճկոններին հաղթանակ է սպասվում»:

Եվրանյուզը գրում է, որ «Մեծ քսանյակի» գագաթաժողովից վերադառնալուց հետո Ֆրանսիայի նախագահ Էմանուել Մակրոնն առաջին հերթին այցելել է հենց այդ հանրահայտ հուշարձան:

«Եկել եմ այստեղ, որպեսզի երախտագիտությունս հայտնեմ ձեզ քաջության և անձնվիրության համար»,- ասել է Մակրոնը՝ լսելով իրավապահների զեկույցը հուզումների ժամանակ բռնության մակարդակի մասին:

Նախագահը հանդիպում է անցկացրել առանցքային նախարարների հետ, որի ժամանակ, տարբեր տվյալներով, քննարկվել է արտակարգ դրության ռեժիմ մտցնելու հնարավորության հարցը:

Արդարադատության նախարար Նիկոլ Բելլուբեն ավելի ուշ հայտարարել է, որ պետությունը երկրում հանգստություն պահպանելու համար այլ միջոցներ էլ ունի:

«Ես չեմ կարծում, որ մենք գտնվում ենք այն էտապում, որ պետք է արտակարգ դրություն մտցնել, կան քաոսը կանխարգելելու այլ միջոցներ »,- ասել է նա։ 

Մակրոնը կարգադրել է վարչապետին հանդիպել կուսակցական առաջնորդների և խոհրդարանական խմբակցությունների ղեկավարների հետ: Երեքշաբթի բացատրություններ տալու համար Սենատ կկանչվի ներքին գործերի նախարար Քրիստոֆ Կաստաները: