Ձեր վստահելի աղբյուրը

«Հիմնականում պարզ է, որ նախընտրական քարոզչությունը սև-սպիտակի տրամաբանության մեջ է։ Այնպիսի տպավորություն է, կարծես պինգ-պոնգ լինի՝ ՀՀԿ-ն «Իմ քայլին»-ին, «Իմ քայլ»-ը՝ ՀՀԿ-ին։ Մնացածն ուշադրությունից դուրս են մնում»,- այսօր տեղի ունեցած մամուլի ասուլիսի ժամանակ ասաց քաղտեխնոլոգ Կարեն Քոչարյանը։

«Այստեղ շահում է  ՀՀԿ-ն, քանի որ «Իմ քայլն» այսպես, թե այնպես շահած է։ Ինչ էլ լինի՝ «Իմ քայլը» հաղթելու է։ Այդ ուժն, իհարկե, ինքնահաստատվելու կարիք չունի, այն առանց այդ էլ բարձր վարկանիշ ունի։ Ինչ վերաբերում է ՀՀԿ-ին, թեև այդ ուժն ընտրողների հետ հանդիպումներ չի անցկացնում, «Իմ քայլը» նրա մասին խոսում է։ Ես մեկ ամիս է՝ ասում եմ, որ ՀՀԿ-ի անցնելու շանսերը  մեծ են, կան մարդիկ,ովքեր քսան և ավել տարի նրանց իշխանության որոք իրենց շատ հարմարավետ են զգացել։ Եթե ՀՀԿ-ն կարողանա ուժերը լավ կոնսոլիդացնել, հնարավորություններ կունենա»,- ասաց նա։

Կարեն Քոչարյանը նշեց, որ մնացած ուժերից իրեն ամենից շատ դուր է գալիս «Մենք» դաշինքի քարոզարշավը։

«Նախ, շատ կրեատիվ են աշխատում, երկրորդ՝ շատ ակտիվ են։ Ինձ շատ դուր եկավ, որ Արամ Սարգսյանը դեպի Գյումրի քարոզարշավը սկսեց «Տղամարդիկ» արձանի մոտից՝ հայտարարելով, որ Գյումրին տղամարդկանց քաղաք է։ Ինչ վերաբերում է ԲՀԿ-ին, այդ կուսակցությունն անում է  այն, ինչ միշտ արել է. քարոզարշավը հիմնականում կառուցված է Գագիկ Ծառուկյանի հեղինակության վրա։ Նա երկրորդ տեղը զբաղեցնելու ամենամեծ շանսերն ունի։

«Լուսավոր Հայաստան» կուսակցությունն էլ փորձում է պահպանել «Ելքի» դիվիդենտերը, որոնք մնացել են նշված դաշինքից դուրս գալուց հետո։ ՀՅԴ-ն իր հերթին հասկացել է, որ ամեն ինչ կորցրել է, նրանք այս պահին երբևէ ունեցած ամենացածր վարկանիշն ունեն»,- նշեց բանախոսը։

Կարեն Քոչարյանը զերծ մնաց ընտրությունների արդյունքների հետ կապված կանխատեսումներ անել, միայն նշեց, որ նորեկների շանսերը շատ փոքր են։ Սակայն դրանցից որոշները՝ օրինակ ՔՈ-ն, շատ լավ կամպանիա է տանում. «Զգացվում է, որ իրենք պատրաստվում են ապագային։ Լևոն Շիրինյանն էլ լավ ծրագրեր է առաջարկում, սակայն նրա մոտ չկա խարիզմա և կրեատիվ։ Ինչ վերաբերում է «Սասնա Ծռերին», ապա նրանցից շատ տոկոս տարել է Նիկոլ Փաշինյանը, ով ամիսներ առաջ ապացուցեց, որ առանց արյան կարելի է հեղափոխություն անել»։

Անդրադառնալով ԱԺ պատգամավոր Արամ Հարությունյանին մեղադրանք առաջադրելու հանգամանքին՝ բանախոսը շեշտեց՝ երկրում այնպիսի մթնոլորտ է ստեղծվել, որ հասարակությունը մեկ վայրկյան իսկ չի կասկածում, որ նա մեղավոր է։

«Խնդիրն այն չէ՝ Սիլվա Համբարձումյանը ճիշտ է ասում թե ոչ, կամ Արամ Հարությունյանն ինչ կասի։ Խնդիրն այն է, որ հասարակության մեծ մասը վստահ է, որ Արամ Հարությունյանն արել է դա։ Էականն այն չէ՝ ճիշտ է դա, թե սուտ, էականն այն է, որ հասարակությունը չի կասկածում՝ սա թալան է։ Սա է ամենամեծ պրոբլեմը։ Պետք է կամաց-կամաց հանել այն համոզմունքը, որ եթե օլիգարխ է, բացառվում է, որ նա մաքուր աշխատած լինի»,- ամփոփեց քաղտեխնոլոգը։