Ձեր վստահելի աղբյուրը

«Նիստի վերջին 40 րոպեն հիմնականում գլխավոր դատախազն էր ներկայացնում առարկությունները»,-վերաքննիչ դատարանում լրագրողների հետ զրույցում հայտնեց Հայաստանի երկրորդ նախագահի փաստաբանական խմբի անդամ Հայկ Ալումյանը։

Հիշեցնենք, որ այսօր վերաքննիչ քրեական դատարանում՝ դատավոր Ռուբեն Մխիթարյանի նախագահությամբ շարունակվում է Ռոբերտ Քոչարյանի նկատմամբ ընտրված խափանման միջոց կալանավորման որոշումն անձեռնմխելիության հիմքով վերացնելու վերաբերյալ բողոքի քննությունը։

Հարցին, թե ինչ առարկություններ է ներկայացրել Արթուր Դավթյանը, Ալումյանը մանրամասնեց.
«Դետալ առ դեալ մեր բոլոր փաստարկներին փորձում է անդրադառնալ։ Չէի ասի, որ համոզիչ են նրա հակափաստարկները, բայց համենայն դեպս մանրակրկիտ աշխատել է, անձեռնմխելիության հետ կապված հատկապես»։

Ալումյանը, կարճ ներկայացնելով գլխավոր դատախազի ներկայացրածի տրամաբանությունը, նշեց. «Գտնում է, որ անձեռնմխելիությունն անհամատեղելի է օրենքի խախտման հետ։ Այսինքն, եթե հանրապետության նախագահին վերագրվում է, և եթե այդ խախտումը իր լիազորությունների մեջ չի մտնում, ուրեմն ինքն անձեռնմխելի է։ Մեզ մոտ էլ հարց է առաջանում, էլ ի՞նչ անձեռնմխելիություն, եթե անձին չվերագրվի օրենքի խախտում։ Այսպիսի իրավական հարցերի շուրջ է եղել քննարկումը»։

Ալումյանը նկատեց, որ սահմանադրական կարգը տապալելուց ավելի ծանր քրեական հանցագործություններ կան քրեական օրենսգրքով։

«Խոր մոլորության մեջ են հասարակությանը գցել որոշ վերլուծաբաներ, որ ասում են՝ ամենածանր մեղադրանքն է սահմանադրական կարգի տապալումը և դրա վրա չի կարող տարածվել անձեռնմխելիությունը։ Ոչ, ես ձեզ հավատացնում եմ, իսկ եթե իմ ասածը ձեզ համար քիչ է, ապա կարելի է Քրեական օրենսգիրքը թերթել, շատ ավելի ծանր մեղադրանքներ կան, քան սահմանդրական կարգի տապալումը, օրինակ դիտավորյալ սպանություն կատարված ծանրացուցիչ հանգամանքներում»,-ասաց Ալումյանը։

Փաստաբանն ասաց, որ նոր երևան եկած հանգամանքներով փաստաբաների բողոքը թողնվել է առանց քննության, քանի որ դատարանը գտել է, որ դրանք  պետք է քննվեն որպես ոչ թե նոր ի հայտ եկած հանգամանք, այլ  ընթացող դատավարության շրջանակում։

«Դրա դեմ, ի դեպ, դատախազությունը շատ կտրուկ  անհամաձայնություն էր հայտնում, գտնում էր, որ դա կապ չունի քննվող նյութի հետ։ Համենայն դեպս դատարանը նման որոշում կայացրեց»,-ասաց Ալումյանը։

Քոչարյանի փաստաբանական խմբի անդամը նաև տեղեկացրեց, ընդմիջման ավարտից հետո  մի քանի միջնորդություն են ներկայացնելու։ Դրանցից մեկն էլ վերաբերում է նյութեր ներկզյացնելուն, հետազոտելուն։ Նյութերն էլ ձայնագրության ու ԱԱԾ և ՀՔԾ պետերի համատեղ ասուլիսում հայտարարություններն են, կան նաև նյութեր, որոնք նախաքննական գաղտնիք են պարունակում են։

Ի դեպ, Ալումյանը չբացառեց, որ անձեռնմխելիության հարցը կարող է լսվել Սահմանդրական դատարանում, բայց ոչ այս փուլում։

Ինչ վերաբերում է դատական նիստում Քոչարյանի ելույթին, Ալումյանը մանրամասնեց.
«Պարոն Քոչարյանն իր ելույթում նկարագրեց այն իրավիճակը, երբ այդ գործողություններն իրականացվել են։  Նկարագրեց, թե ինչ էր կատարվում, ինչ մտավախություններ կային, ինչ եկալկետային տվյալների հիման վրա է արտակարգ դրություն հայտարարվել»,-մանրամասնեց Ալումյանը։