Ձեր վստահելի աղբյուրը

Այսօր Վարդենիսում տեղի ունեցած նախընտրական քարոզարշավի ժամանակ ՕԵԿ նախագահ Արթուր Բաղդասարյանին աղուհացով դիմավորեցին։

Այնուհետ ելույթով դիմելով հավաքվածներին՝ վերջինս առաջարկեց դեկտեմբերի 9-ին քվեարկել  համար 9-ին։ 

«Ինչո՞ւ. որովհետև դեկտեմբերի 9-ին քվեարկելով համար 9-ին՝ դուք քվեարկում եք Հայաստանում իրական փոփոխություններ անելու օգտին։ Օրինաց երկիր կուսակցության թիկունքում վիթխարի աշխատանք կա կատարված։ Հայաստանում չկա երկրորդ կուսակցություն, որ կարող է ասել՝ 250 օրենքի հեղինակ է։ Հայաստանում ՕԵԿ-ը նախաձեռնեց ավանդների վերադարձման գործընթացը, և այսօր շատ մարդիկ սպասում են իրենց ավանդների վերադարձին։ Քվարկելով ՕԵԿ-ի օգտին՝ մարդիկ քվեարկում են իրենց ավանդները վերադարձնելու օգտին, այդ թվում՝ մահացած ավանդատուների ժառանգները՝ այնպես ինչպես արել են ԱՊՀ մյուս երկրներում»,- ասաց Արթուր Բաղդասարյանը։

ՕԵԿ առաջնորդի խոսքով, իրենք գտնում են, որ պետք է շարունակել վճռական քայլեր ձենարկել տարբեր ուղղություններով կուտակված սոցիալ-տնտեսական խնդիրները լուծելու համար։

«Բոլորս հիշենք. եթե այսօր ծնվող երեխան պետությունից գումար է ստանում, դրա թիկունքում կանգնած է եղել ՕԵԿ-ը։ ՕԵԿ-ի ջանքերով ընդունվել են օրենքներ հաշմանդամների, բռնադատվածների, փախստականների, զինծառայողների սոցիալական պաշտպանության և այլ ոլորտներում»,- ասաց Բաղդասարյանը։

Նա ընդգծեց, որ ՕԵԿ-ն առաջարկում է համակարգված պայքար թալանի, կոռուպցիայի և գանձագողության դեմ։ 

«Մենք նաև ասում ենք՝ Հայաստանում  պետք է լինեն հասանելի կրթություն և առողջապահություն։ Մենք առաջարկում ենք, որպեսզի ընդունելության քննություններ չլինեն։ Շնորհիվ մեր առաջարկած օրենքի՝ այսօր լավ սովորող երեխան պետության միջոցների հաշվին սովորում է անվճար, և մենք առաջարկում ենք ամեն տարի բարձրացնել կրթության և մշակութի ոլորտի աշխատողների աշխատավարձերը։ Մենք կտրականապես դեմ ենք ուսուցիչների կրճատմանը, պետք է ոչ թե նրանց կրճատել, այլ նվազագույնը 30 հազար նոր ուսուցչի ընդունել աշխատանքի։ Մյուս կողմից, մարդիկ փող չունեն, որ դեղ գնեն կամ վիրահատության դիմեն»,- ասաց Արթուր Բաղդասարյանը։

Նա նաև շեշտեց, որ պետք է բարձրացնել թոշակները, կրճատել գործազրկության մակարդակը, 100 տոկոսով հարկերից ազատել մինչև 25 միլիոն դրամ շրջանառություն ունեցող բոլոր տնտեսվարողներին, գյուղացիներին տալ էժան տոկոսներով վարկեր։

Վերջում Արթուր Բաղդասարյանը հույս հայտնեց, որ վարդենիսցիները կքվեարկեն ՕԵԿ-ի օգտին։ «Ով քվեարկի ՕԵԿ-ի օգտին, կքվեարկի իր օգտին։ Թող Վարդենիսը ծլի, ծաղկի, զորանա»,- ասաց նա։