Ձեր վստահելի աղբյուրը

Հայաստանի կինեմատոգրաֆիստների միության նախագահ Հարություն Խաչատրյանն այսօր այցելել է Մատենադարանի տարածքում հացադուլ հայտարարած կինոռեժիսոր Հովհաննես Գալստյանին:

Հայաստանի կինեմատոգրաֆիստների միության ֆեյսբուքյան էջից տեղեկանում ենք, որ Հարություն Խաչատրյանը Հովհաննես Գալստյանին նախ հորդորել է դադարեցնել հացադուլը, քանի որ այն պայքարի շատ ծայրահեղ միջոց է և կարող է անվերականգնելի կորուստ պատճառել մարդուն: Այնուհետև խոսելով կինոռեժիսորի բարձրացրած հարցերի և ստեղծված իրավիճակի շուրջ, Հայաստանի կինեմատոգրաֆիստների միության նախագահը նշել է, որ իրավիճակի հանգուցալուծումը բացարձակապես իրավական դաշտում է և միայն իրավական հարթությունում է, որ հնարավոր է լուծում գտնել թնջուկին:

«Նկատի առնելով, որ կինոռեժիսորը դիմել է ծայրահեղ միջոցի, Հայաստանի կինեմատոգրաֆիստների միության նախագահը դիմում է Հայաստանի իրավական ոլորտի ներկայացուցիչներին՝ հորդորելով հնարավորինս արագ քննարկել բարձրացված հարցերը և իրավական վերջակետ դնել խնդրին:

Հույս ունենք, որ Հայաստանի մշակույթի նախարարությունն ու ազգային կինոկենտրոնը ևս կանեն հնարավոր ամեն ինչ, որպեսզի խնդիրը հնարավորինս արագ իրավական հանգուցալուծում ստանա»,- նշված էՀայաստնաի կինեմատոգրաֆիստների միության հաղորդագրության մեջ։ 

Հիշեցնենք, որ կինոռեժիսոր, սցենարիստ, պրոդյուսեր, «Պարալլելս ֆիլմ» կինոընկերության հիմնադիր Հովհաննես Գալստյանը  հացադուլ է հայտարարել երեկ ժամը 15։00-ից։Նա պահանջում  «Տատիկիս Վարսերը» Հայ-բուլղար-գերմանական համատեղ կինոնախագծի հանդեպ ազգային կինոկենտրոնի ստանձնած պարտավորությունների կատարաման երաշխիքներ, «Տատիկիս Վարսերը» կինոնախագծից 2017թ-ին վերցրած գումարի վերադարձ, «Պարալլելս Ֆիլմպրոդաքշնի» Հայտերի հանդեպ ապօրինի որոշման չեղարկում։

«Այս Հացադուլը հանդիսանում է Հայաստանում մշակույթի ոլորտում տասնամյակներով կուտակված արատավոր երևույթները հրապարակայնացնելու և կինոյի կառավարման համակարգը բարեփոխելու համար անզիջում պայքարի առաջին փուլը»,- հայտարարել է նրան։