Ձեր վստահելի աղբյուրը

Վարչապետի պաշտոնակատար Նիկոլ Փաշինյանն այսօր Արմավիրի մարզում քարոզարշավի ժամանակ անդրադարձավ ՀՀ զինված ուժերի ՍՈՒ-25 մարտական ինքնաթիռի վթարին:

«Այսօր առավոտից անհանգստացնող լուր ունեի, և այդ լուրերը մեկ ժամ առաջ բոլոր մանրամասնություններով հաստատվեցին։ Հայաստանի ԶՈՒ ՍՈՒ-25 օդանավ է վթարի ենթարկվել և մեր երկու սպաները՝ շատ փորձառու օդաչուներ զոհվել են»,- ասաց Նիկոլ Փաշինյանը:
Նա ցավակցեց օդաչուների ընտանիքներին, ծառայակիցներին, հարազատներին  և առաջարկեց ներկաներին մեկ րոպե լռությամբ հարգել օդաչուների հիշատակը։

Հիշեցնենք, որ դեկտեմբերի 4-ին, ժամը 10.20-ի սահմաններում,  Շիրակի մարզի մարզի Մարալիկի տարածաշրջանի Քարաբերդ բնակավայրի հարևանությամբ կործանվել է մարտական պատրաստության պլանով նախատեսված ուսումնամարզական թռիչք իրականացնող ՀՀ զինված ուժերի ՍՈՒ-25 մարտական ինքնաթիռը: Ավիապատահարի հետևանքով զոհվել են 1-ին կարգի օդաչու, փոխգնդապետ Արմեն Սլավիկի Բաբայանը և 3-րդ կարգի օդաչու, մայոր Մովսես Գևորգի Մանուկյանը:

Քննչական կոմիտեի զինվորական քննչական գլխավոր վարչությունում քննություն է տարվում՝ պարզելու ինքնաթիռի   վթարի պատճառները։