Ձեր վստահելի աղբյուրը

««Գելափ ինթերնեյշնլ»-ի հարցումներն ավարտվել են հինգ օր առաջ, բայց  կա նաև Ամերիկյան հանրապետական ինստիտուտի հարցումը, որով մենք երկրորդ տեղում ենք»,- այս մասին այսօր լրագրողների հետ զրույցում ասաց «Լուսավոր Հայաստան» կուսակցության ցուցակը գլխավորող Էդմոն Մանուքյանը՝ անդրադառնալով «GALLUP International association»-ի հարցման արդյունքներին, ըստ որի, «Լուսավոր Հայաստանը» երրորդ տեղում է՝ 3,8 տոկոս ձայնով:

Նրա խոսքով՝ եթե համարեն, որ «Գելափ»-ի հարցումը ճիշտ է, և ԼՀԿ-ն երրորդ տեղում է, նշանակում է, որ ՀՀ քաղաքացին անելիք ունի. «Դա տագնապ է ՀՀ քաղաքացիներին, դա տագնապ է , որ քաղաքական համակարգը չի առողջանում, դա նշանակում է, որ հին Հայաստանը մնում է: Հիմա պետք է արագացնել, պետք է տեմպ տալ: Ես հիմա ուղերձ եմ հղում ՀՀ քաղաքացիներին, որ ամեն ինչ անեն՝  «Լուսավոր Հայաստանը» լինի երկրորդը նոր քաղաքական համակարգում»:

Էդմոն Մարուքյանը նշեց, որ նոր քաղաքական համակարգում չեն կարող մեծ դերակատարում ունենալ այն ուժերը, որոնք ՀՀԿ-ի հետ հավասար պատասխանատվություն են կրել, որոնք ապրիլի 17-ին ընտրել են Սերժ Սարգսյանին, իսկ հոկտեմբերի 2-ին փորձել են սաբոտաժ անել հեղափոխությանը:

Նա միաժամանակ ասաց, որ նոր քաղաքական համակարգը չի կարող առողջանալ, եթե այդ համակարգում շահերի բախում լինի, բիզնես շահեր, գործարարներ լինեն: «Երեկվա բանավեճում իմ հարցը դրա մասին էր: Ես կարծում եմ, որ նոր Հայաստանում գործարարները որևէ մոտիվացիա չպետք է ունենան հայտնվելու խորհրդարանում: Այլևս գործարարները չպետք է գան մանդատ վերցնեն, որ իրենք իրենց պաշտպանեն»,- նշեց Էդմոն Մարուքյանը:

Լրագրողները հետաքրքվեցին, թե երեկվա բանավեճում «Բարգավաճ Հայաստան» կուսակցության առաջնորդ Գագիկ Ծառուկյանի ակնկարկած Գևորիկն ո՞վ էր, ԼՀԿ առաջնորդն ասաց, որ նա վանաձորցի մարզիկ է, ծառայել է իր հետ:

«Ընտրությունների ժամանակ բազմաթիվ սպորտսմեններ աջակցել են տարբեր ուժերի, այդ թվում նաև՝ ինձ, բայց դա ի՞նչ կապ ունի: Այդ ժամանակ ինձ Գևորգն առաջարկել է, որ գնամ  Ծառուկյանի հետ հանդիպեմ, բայց ես մերժել եմ: Հետո, երբ Վիկտոր Դալլաքյանը վիճարկում էր իմ գրանցման հարցը, նորից առաջարկում էին հանդիպել Ծառուկյանի հետ, որ հարցերս լուծվեն, բայց նորից մերժել եմ: Նաև առաջարկ է եղել անդամակցել կուսակցությանը ու էլի մերժել եմ: Հետևաբար, ես ի՞նչ եմ հարցնում, ինձ ի՞նչ է ասվում: Բանակում իմ հետ ծառայած տղեն, եթե եղել է իմ ընկերն ու ինձ օգնել է, ես էլ իր փաստաբանն եմ եղել, նրա վրա քրգործ է հարուցված եղել և պաշտպանել եմ մինչև ընտրությունները, որպես իրավապաշտպան 1000 հոգու լավություն եմ արել ու էդ մարդիկ ինձ են ընտրել, դա ինչ կապ ունի՞ Ծառուկյանի հետ»,- ասաց ԼՀԿ ղեկավարը:

Նշենք, որ Հանրային հեռուստաընկերության ուղիղ եթերում ԲՀԿ առաջնորդ Գագիկ Ծառուկյանից  Էդմոն Մարուքյանը հետաքրքրվեց, թե որն է իր մոտիվացիան, ինչ կարիք կա պատգամավոր դառնալու։ Այնուհետև հետաքրքրվեց, թե ինչ արժեք է ստեղծում «Շանգրիլա» կազինոն։ Ծառուկյանն էլ իր հերթին հարցրեց, թե Մարուքյանն իր կյանքում ինչ է արել։

«Ես կլասիկ պատգամավոր եմ»,- ասաց Մարուքյանը, ինչին Ծառուկյանն արձագանքեց. «Քո կլասիկ ցավը տանեմ... Էդ որ պատգամավոր էին ընտրվում, ո՞վ էր քեզ աջակցում։ Գևորգին ճանաչո՞ւմ ես, որ քո քարոզարշավն էր կազմակերպում, պիտի գայիր Ծառուկյանի մոտ, մենք ենք քեզ անցկացրել, բայց թղթերի պակասի պատճառով չեկար։  Չի կարելի դեմագոգություն անել»։