Ձեր վստահելի աղբյուրը

Աղետի գոտու բնակավայրերում երկրաշարժի հետևանքով անօթևան մնացած ընտանիքների բնակարանային խնդիրների լուծման նպատակով շահառու է ճանաչվել 5381 ընտանիք: Այս մասին այսօր Գյումրիում տեղի ունեցած ՀՀ կառավարության  արտագնա նիստում ասաց ՀՀ քաղաքաշինության կոմիտեի նախագահ  Ավետիք Էլոյանը:

Նրա խոսքով՝ պետական աջակցությամբ իրականացվող բնակպահովման ծրագրի շրջանակներում շահառու ճանաչված ընտանիքները Շիրակի, Լոռու և Արագածոտնի մարզերի բնակավայրերից են:

Ավետիք Էլոյանը նշեց, որ 4839 ընտանիքի բնակարանային խնդիր լուծվել է 2008-2017 թվականներին՝ մոտ 65 մլրդ. դրամ միջոցների հաշվին:

ՀՀ կառավարության 2018-2022 թվականների գործունեության միջոցառումների ծրագրով նախատեսված է մինչև 2020 թվականի տարեվերջ ավարտին հասցնել մնացած 542 ընտանիքների նկատմամբ ձևավորված պետական պարտավորությունների կատարումը:

Ավետիք Էլոյանը հայտնեց, որ 2018 թվականի պետբյուջեով հատկացված 460 մլն. դրամի հաշվին Լոռու մարզի գյուղական բնակավայրերում կլուծվի ևս 44 ընտանիքի բնակարանային խնդիր՝ նրանց կիսակառույցների ավարտմամբ: Այդ մասին ՀՀ կառավարության 2018 թվականի նոյեմբերի 22-ի նիստում ընդունվել է համապատասխան որոշում, որի համաձայն կիսակառույցների շինարարական աշխատանքները նախատեսված է սկսել 2019 թվականի մարտին և ավարտել մինչև դեկտեմբերի 1-ը:

«Արդյունքում, դեռևս լուծման կարիք կունենա 498 ընտանիքի բնակարանային խնդիր, որի համար կպահանջվի մոտ 3.5 մլրդ. դրամ»,- ասաց նա:

Նա նաև նշեց, որ 2019 թվականի պետական բյուջեով այդ աշխատանքների համար արդեն իսկ նախատեսված է 560 մլն. դրամ: