Ձեր վստահելի աղբյուրը

Եվրոպական կինոակադեմիան պատրաստվում է մրցանակաբաշխությանը՝ Եվրոպայի լավագույն ֆիլմ-2018։ Եվրանյուզը գրում է, որ լեհ ռեժիսոր Պավել Պավլիկովսկու «Սառը պատերազմ» ֆիլմը հինգ անվանակարգում հավակնում է մրցանակի՝ լավագույն ֆիլմ, ռեժիսոր, սցենար, դերասան և դերասանուհի։ Ֆիլմը պատմում է գլխավոր հերոսների կրքոտ սիրո մասին, որոնց ճանապարհին կանգնում է ժամանակը, քաղաքականությունը, ճակատագրի վճռականությունը:

Մաթեո Գարոնեի իտալա-ֆրանսիական «Դոգմեն» դրամատիկ ֆիլմը չորս անվանակարգում է ներկայացված։ Ֆիլմում նկարահանված Մարչելո Ֆոնտեն մրցանակի է հավակնում «լավագույն դերասան» անվանակարգում։

Չորս անվանակարգում ներկայացված է  իրանցի հայտնի ռեժիսոր Աբբասի «Աշխարհների սահմանին» ֆիլմը։ Այն նկարահանված է ֆենտզի ժանրում,  քննադատաների կողմից դրական արձագանքի է առաջացել։

Ռեժիսոր Ալիչե Ռորվահերի «Երջանիկ Լազար» ֆիլմը ներկայացված է լավագույն ֆիլմ, ռեժիսոր, սցենար և լավագույն դերասանուհի անվանակարգերում։ Ֆիլմն արդեն համարել են մարդասիրական կինոյի հազվագյուտ օրինակ։

Բելգիացի ռեժիսոր Լուկաս Դոնտի «Աղջիկ»  ֆիլմը երեք անվանակարգում է ներկայացված։ Ֆիլմը պատմում է Լարայի մասին, ում նկատմամբ բնությունը չար կատակ է խաղացել՝ նրա հոգին տղայի մարմնում է։ Հերոսուհին երազանք ունի՝ դառնալ բալետի պարուհի։ 

Եվրոպական կինոակադեմիայի «երկար ցուցակում» ընդգրկվել էին 49 ֆիլմ 35 երկրից։ Կարճ ցուցակում ընդգրկվել է 5 ֆիլմ։ 

Եվրոպական կինոակադեմիայի մրցանակաբաշխությունը կայանալու է դեկտեմբերի 15-ին Սեվիլիայում։ Հաղթողներին ընտրելու է ժյուրին, որի կազմում ընդգրկված է Եվրոպական կինոակադեմիայի 3500 անդամ։