Ձեր վստահելի աղբյուրը

Դեկտեմբերի 6-ին տեղի էր ունեցել Հայաստանի ֆուտբոլի ֆեդերացիայի կարգապահական կոմիտեի հերթական նիստը: Հայաստանի Բարձրագույն խմբի առաջնության 19-րդ տուրի «Փյունիկ»-«Գանձասար-Կապան» (1:3) խաղում մրցավարի օգնականին հայհոյելու համար կոմիտեն որոշել էր «Փյունիկ» թիմի գլխավոր մարզիչ Անդրեյ Տալալաևը որակազրկել մինչև 2019 թ. մայիսի 31-ը ներառյալ, իսկ «Փյունիկ» ֆուտբոլային ակումբին տուգանել 125,000 ՀՀ դրամով: Երևանյան ակումբը հանդես է եկել պաշտոնական հայտարարությամբ.

«Փյունիկ» ֆուտբոլային ակումբը, ուսումնասիրելով ՀՖՖ Կարգապահական կոմիտեի դեկտեմբերի 6-ի նիստի որոշումը՝ որակազրկել թիմի գլխավոր մարզիչ Անդրեյ Տալալաևին մինչև մրցաշրջանի ավարտը, հայտնում է իր խիստ անհամաձայնությունը:

«Փյունիկն»  ուսումնասիրել է կարգապահական կոմիտեի այս մրցաշրջանի բոլոր կայացրած որոշումները և գտնում է, որ կոմիտեն գործում է ոչ պրոֆեսիոնալ, ոչ արդար և կիրառում է երկակի ստանդարտներ:

Հայտնում ենք, որ Անդրեյ Տալալաևը պատժվել է կարգապահական կանոնակարգի 15-րդ հոդվածի 18-րդ կետի համաձայն, ըստ որի որպես պատժամիջոց է սահմանվում մինչև մեկ տարի որակազրկումը: Մեր իրավաբանները, ուսումնասիրելով միջադեպի նախադեպերը, եկել են այն եզրակացությանը, որ պատժաչափը համաչափ չէ կատարված արարքին: Նման դաժան պատժամիջոցը մենք համարում ենք անարդար. այն վնասում է հայկական ֆուտբոլի զարգացմանն ու նրա իմիջի ձևավորմանը թե´ Հայաստանում, թե´ Հայաստանից դուրս:

Չնայած նրա, որ սեպտեմբերի 22-ին փոխվեց ՀՖՖ ղեկավարն ու գործկոմը, սակայն կարգապահական կոմիտեն, ինչպես տարիներ շարունակ, այնպես էլ հիմա, շարունակում է գործել ոչ պրոֆեսիոնալ ու կողմնակալ: Մենք խնդրում ենք ՀՖՖ ղեկավարությանը ուշադրություն դարձնել կարգապահական և մյուս բոլոր կոմիտեների աշխատելաոճին, մենք հույս ունենք, որ առաջիկայում կկազմվեն նոր կոմիտեներ, որոնք կաշխատեն ավելի արդար ու թափանցիկ և միտված կլինեն հայկական ֆուտբոլի որակի բարձրացմանը, այլ ոչ թե նրա հեղինակության վրա բացասաբար ազդելուն:

Կանոնակարգն այնքան ոչ հստակեցված է, որ թույլ է տալիս նույնիսկ կարգապահական կոմիտեին որոշումներ կայացնել իր հայեցողությամբ: Կարգապահական կոմիտեի կայացրած նման որոշումները (ի դեպ ոչ միայն մեր թիմի հանդեպ) կործանարար են հայկական ֆուտբոլի համար: Եթե այս խնդիրը չլուծվի, վստահ ենք, որ այն շատ շուտ կանդրադառնա հայկական ֆուտբոլում պոտենցիալ ներդրողների և մասնագետների ցանկության վրա. մուտք գործել հայկական ֆուտբոլ և նպաստել դրա զարգացմանը:

Կանոնակարգով սահմանված ժամկետում «Փյունիկ» ՖԱ-ն հիմնավոր բողոք կներկայացնի ՀՖՖ բողոքարկման կոմիտե՝ պահանջելով փոխել Անդրեյ Տալալաևի անհամաչափ պատիժը»,- գրված է պաշտոնական հայտարարությունում: