Ձեր վստահելի աղբյուրը

Հայաստանի Հանրապետական կուսակցության ցուցակը գլխավորող Վիգեն Սարգսյանը իր քաղաքացիական պարտքը կատարելու էր եկել կնոջ ու երեխաների հետ։ Նա քվեարկեց 9/47 ընտրատեղամասում։

«Ես առաջին հերթին ակնկալում եմ, որ մեր հանրությունն ակտիվ կմասնակցի ընտրություններին։ Դա չափազանց կարևոր է։ Երկրի համար վճռորոշ պահերին անհրաժեշտ  է համախմբվածություն։ Ամենավերջին բանը, որ այսօր կարելի է անել, տանը նստելն է։ Պետք է գնալ և քվեարկել»,-լրագրողների հետ զրույցում ասաց Վիգեն Սարգսյանը։

Նրա հաջորդ ակնկալիքն այն է, որ ընտրության ավարտից հետո՝ օրվա վերջին կունենանք ավելի համախմբված հասարակություն։

«Ես քվեարկել եմ այն Հայաստանի համար, որտեղ որևէ մեկի մտքով երբևէ չի անցնի հասարակությանը բաժանել սևերի ու սպիտակների, որովհետև դա  ուղիղ ճանապարհ է դեպի ներքին թշնամու ձևավորում, իսկ պաշարված բերդում ներքին թշնամին  ամենավատ բանն է, որ կարող է լինել։ Մեզ պետք է ավելի ամուր, ավելի համախմբված, ավելի արագ զարգացող երկիր։ Մեր մարտահրավերները  շատ մեծ են, մեր ունեցած պաշարներն այդ մարտահրավերներից անհամեմատ փոքր։ Ես ակնկալում եմ, որ այսօրվա քվեարկությունից հետո մենք կունենանք երկիր, որտեղ  գոնե այն հարցերում, որոնք մեզ համար կենսական նշանակություն ունեն՝ անվտանգություն, պաշտպանություն, արտաքին քաղաքականություն, կհենվենք  գիտելիքի, փորձի, հետևողականության  վրա, չենք անի քայլեր, որոնք կթուլացնեն մեր դիրքերն այս տարածաշրջանում»,-ասաց նա։

Վիգեն Սարգսյանը հույս հայտնեց, որ կարճ քարոզարշավի ընթացքում կարողացել են իրենց մտահոգությունները, կարծիքներն ու դիրքորոշումները հասցնել ընտրողներին։

«Մենք բազմիցս հնչեցրել ենք մտահոգությունները վստահված անձանց վրա ճնշումների վերաբերյալ։ Ես հույս ունեմ, որ այսօր քվեարկությունը կանցնի հանգիստ, հաշվարկը թափանցիկ ու հասկանալի մթնոլորտում։ Առավոտյան մենք կարթնանանք արդյունքներով, որոնք բոլորի համար ընդունելի կլինեն»,-ասաց Սարգսյանը։

Նրա խոսքով, եթե տեսնեն բողոքարկելու հիմքեր, անպայման կանեն դա։ Ինչ վերաբերում է շանսերին, ապա ասաց՝ դա կգնահատի ժողովուրդը։