Ձեր վստահելի աղբյուրը

Կենտրոնական ընտրական հանձնաժողովն ամփոփել է թվով 2010 ընտրատեղամասերի արդյունքները և հրապարակել արտահերթ խորհրդարանական ընտրությունների նախնական տվյալները: Համաձայն այդ տվյալների՝ խորհրդարան է անցել երեք ուժ՝ «Իմ քայլը»դաշինքը՝ 70,43 տոկոս քվեով, «Բարգավաճ Հայաստան» կուսակցությունը՝ 8,27 տոկոս ձայներով և «Լուսավոր Հայաստան» կուսակցությունը` 6,37  տոկոս քվեով:

ՀՀԿ-ն և ՀՅԴ-ն չեն կարողացել հաղթահարել 5 տոկոսի շեմը և 7-րդ գումարման Ազգային ժողովում չեն լինի։

Panorama.am-ի թղթակիցն ընտրությունների արդյունքների և ՀՀԿ-ի հետագա անելիքների մասին խոսեց Հանրապետական կուսակցության անդամ Վահրամ Բաղդասարյանի հետ։

Panorama.am- Պարոն Բաղդասարյան, ընդունո՞ւմ եք ընտրությունների արդյունքները։

Պատասխան- Մենք դեռ քննարկում ենք, այսօրվա ընթացքում հանդես կգանք հայտարարությամբ։

Panorama.am- Չե՞ք զղջում, որ  շուրջ երկու ամիս առաջ առաջ խորհրդարանում դեմ քվեարկեցիք Ընտրական օրենսգրքի փոփոխությունների նախագծին։ Չէ՞ որ կողմ քվարկելով՝ 4 տոկոսի ընտրական շեմը հաղթահարած ՀՀԿ-ն այժմ կարող էր ԱԺ-ում լինել։

Պատասխան- Բացարձակապես չենք զղջում։ Դա քաղաքական մոտեցում էր։ Անթույլատրելի է 20 օր առաջ Ընտրական օրենսգրքի փոփոխություններ անել։

Panorama.am- Պարոն Բաղդասարյան, որո՞նք են լինելու Հանարապետական կուսակցության հետագա անելիքները։

Պատասխան- Դրա մասին լրացուցիչ կխոսենք։

Panorama.am- Իսկ անձամբ Ձե՞ր։

Պատասխան- Շարունակելու եմ իմ գիտամանկավարժական գործունեությունը, մանկավարժությամբ եմ զբաղվելու։

Panorama.am-Իսկ ի՞նչ կորցրեց խորհրդարանը՝ ՀՀԿ-ի Ազգային ժողով մուտք չգործելով։

Պատասխան- Խորհրդարանը կորցրեց ընդդիմություն։ Կունենանք առանց ընդդիմության խորհրդարան։ Մենք տվել ենք բոլոր հիմնավորումները, որ ՀՀԿ-ից բացի Ազգային ժողովում այլ իրական ընդդիմություն չի կարող լինել։ Հիմա էլ պնդում ենք, որ խորհրդարանում իրական ընդդիմություն չկա։ Ժողովուրդն ընտրեց իր ճակատագիրը։ Իհարկե, ցանկանում եմ, որ ամեն ինչ լավ լինի։