Ձեր վստահելի աղբյուրը

Հայաստանի Հանրապետության և Վերակառուցման և զարգացման եվրոպական բանկի միջև ստորագրված «Երևանի կոշտ թափոնների կառավարման ծրագիր» վարկային համաձայնագրի շրջանակում Նուբարաշենում կկառուցվի տարածաշրջանային նոր աղբավայր: Համապատասխան որոշումն ընդունվեց գործադիրի այսօրվա նիստում, ըստ որի՝ հավանության արժանացավ «Հայաստանի Հանրապետության և Վերակառուցման և զարգացման եվրոպական բանկի միջև 2015 թվականի դեկտեմբերի 11-ին ստորագրված «Երևանի կոշտ թափոնների կառավարման ծրագիր» վարկային համաձայնագրի ժամկետը երկարաձգելու մասին» նամակ-համաձայնագրի ստորագրման առաջարկությունը:

Տարածքային կառավարման և զարգացման նախարարի պաշտոնակատար Սուրեն Պապիկյանը հայտնեց, որ ծրագրով նախատեսվում է կառուցել նոր աղբավայր և փակել Նուբարաշենի ու Աջափնյակի աղբավայրերը: Ծրագիր արժեքը կազմում է 26 մլն եվրո, որից վարկային բաղադրիչը կազմում է 16 մլն եվրո: Վարկային համաձայնագրի հասանելիության վերջնաժամկետը լրանում է 2018 թվականի դեկտեմբերի 11-ին:

Ըստ Սուրեն Պապիկյանի՝ կապալառուի ընտրության մրցույթը նախատեսվում է իրականացնել 2 փուլով, որոնք կարող են տևել 6 ամսից մինչև 1 տարի: Դրա ավարտից հետո կապալառուի հետ նախատեսվում է կնքել պայմանագիր: Վերջինս պետք է վեց ամսվա ընթացում մշակի և ներկայացնի նոր աղբավայրի կառուցման և հին աղբավայրերի փակման նախագծերը: Աղբավայրը պատրաստ կլինի 2021 թվականին:

Վարչապետի պաշտոնակատար Նիկոլ Փաշինյանը հարցրեց, թե ինչ նկատի ունեն, երբ ասում են աղբավայրը փակել, ինչին ի պատասխան Սուրեն Պապիկյանն ասաց, որ գոյություն ունեցող Նուբարաշենի աղբավայրը պետք է այնպիսի վիճակի բերվի, որ դրանից նախ արտահոսք տեղի չունենա ստորջրյա համակարգ, իսկ նոր աղբավայրը կծածկվի հատուկ մեխանիզմով, որի վրա այգի կհիմնվի:

«Խնդիրը նրանում է, որ այն 30-50 տարվա պատմություն ունեցող աղբավայր է,  հետաքրքիր չէ պոտենցիալ ներդրողի համար, շահույթ ստանալն անհնարին է, ուստի հավելյալ գումարներ պետք է ներգրավել՝ վերամշակող ներգրավելու համար: Ոչ մեկ ներդրում չի անի, եթե շահույթ չի ստանում»,- ասաց Սուրեն Պապիկյանը՝ հավելելով, որ  ներդրողներին հետաքրքիր է որակյալ աղբը:

Փոխվարչապետի պաշտոնակատար Մհեր Գրիգորյանն էլ նշեց, որ մաքսիմալ արագ պետք է իրականացնել այս ծրագիրը, քանի որ այն արդեն շատ է հետաձգվել. «Երկու տարի ուղղակի սառած վիճակում է եղել»: