Ձեր վստահելի աղբյուրը

Բելառուսի նախագահ Ալեքսանդր Լուկաշենկոն հայտարարել է, որ Երևանին առաջարկել է գնել բելառուսական «Պոլոնեզ» համակարգեր, որոնք Մինսկը մատակարարում է նաև Բաքվին։ Սակայն Երևանը հրաժարվել է։ Այս մասին գրում է «Ռիա Նովոստի» գործակալությունը։

«Այո, ինձ համար ադրբեջանցիներն օտար չեն, բայց մենք հայերի հետ միշտ միասին ենք եղել, և պետք չէ մեզ մեղադրել, որ մենք Ադրբեջանին զենք ենք վաճառում։ Եվ ինչի՞ համար են մեզ քննադատում, հրթիռային համակարգերի։ Ահա թե ինչ, որպեսզի իմանաք ճշմարտությունը, ասեմ, երբ մենք ստացել ենք «Պոլոնեզ» հրթիռային համակարգերը, մենք փորձարկումներին մասնակցելու համար հրավիրել ենք և հայերին, և ադրբեջանցիներին, և ռուսներին»,-ռուսական ԶԼՄ-ների ներկայացուցիչների հետ հանդիպմանը հայտարարել է Լուկաշենկոն։

Նրա խոսքով, փորձարկումների ժամանակ ադրբեջանական կողմը համոզվել է բարձր ճշգրտության մեջ և խնդրել է վաճառել։

«Մենք պետք է վարկը վճարենք, մեզ չինացիները դրա համար վարկ են տրամադրել։ Ես Ադրբեջանին ասում եմ, այո, կվաճառեմ։ Հասկանում եմ, որ հայերի հետ կապված խնդիր կառաջանա, նրանց ասում եմ, պատրաստ եմ նման համալիր մատակարարել։ Հայերը հրաժարվեցին, վկայակոչելով, որ իրենք ռուսական «Իսկանդեր» ունեն»,-ասել է Լուկաշենկոն։

Բելառուսի նախագահը նշել է, որ Ադրբեջանին զենի մատակարարման առումով Բելառուսը զբաղեցնում է 4-5-րդ տեղը, մինչդեռ Բաքվին զենք վաճառելու հարցում առաջատարը Մոսկվան է։