Ձեր վստահելի աղբյուրը

Բելառուսի նախագահ Ալեքսանդր Լուկաշենկոն ռուսական մեդիա հանրության ներկայացուցիչների հետ այսօր տեղի ունեցած հանդիպման ժամանակ պատմել է ղարաբաղյան հակամարտության լուծմանը վերաբերող, Ռուսաստանի և Բելառուսի մասնակցությամբ ավելի վաղ բարձրաձայնված առաջարկների մասին, գրում է «ԲԵԼՏԱ»-ն։

Լուկաշենկոն նշել է, որ այդ հարցը քննարկվել է դեռևս Երևանում կայացած ՀԱՊԿ գագաթաժողովներից մեկի ժամանակ, երբ Հայաստանի նախագահը Սերժ Սարգսյանն էր։ Նա Հայաստանի և Ադրբեջանի ղեկավարներին կոչ է արել միասին լուծել այդ խնդիրը՝ գնալով փոխզիջումային լուծումների։ Ընդ որում, Բելառուսն ու Ռուսաստանը միասնական դիրքորոշում են ցուցաբերել՝ խոստանելով անհրաժեշտության դեպքում ռազմական կոնտինգենտ մտցնել ՝ երաշխիքների ապահովման համար։

«Հետո արդեն անկեղծ ասացի. լսիր, ինչպես նրանք են ասում, օկուպացվել է 7 շրջան։ Եվ ես ու Պուտինը միասնական դիրքորոշում ցուցաբերեցինք (դա Երևանում էր՝ ՀԱՊԿ-ում). Սերժ, տուր այդ 5 շրջանները։ Ի՞նչ պատճառ կա դրանք չվերադարձնելու, այդ շրջանները դատարկվում են։ Նա ասաց. եթե ես վերադարձնեմ, նրանք ճանապարհը կփակեն, կօկուպացնեն Ղարաբաղը և այլն։ Եվ մենք Պուտինի հետ հստակ խոստացանք, որ կմտցնենք մեր զինված ուժերը, և դա թույլ չենք տա (ադրբեջանցիների ներկայությամբ ենք դա ասել)։ Նա ասաց. մենք դրան չենք գնա, մենք դա չենք ուզում»,- նշել է Բելառուսի նախագահը։

Լուկաշենկոն պատմել է, որ դա իր համար զարմանալի է եղել։ «Ինչո՞ւ չեն ուզում։ 5 շրջան դատարկվում է։ Դա առաջին քայլն է։ Եվ այդ ժամանակ Ադրբեջանն ու Հայաստանը կլինեին և ՀԱՊԿ-ում, և ԵվրԱզէս-ում։ Ինչո՞ւ դուք հրաժարվեցիք։ Լավ, Բելառուսը թողնենք, բայց Ռուսաստանը երաշխավորել է, որ այնտեղ երբեք պատերազմ չի լինի, եթե այդ շրջաններն ազատվեն, որոնք դուք կճանաչեք ադրբեջանական: Դա Ղարաբաղի մասին չէ»,- ասել է Լուկաշենկոն։

Նա հայտարարել է, որ խնդրի խաղաղ կարգավորումը կարևոր գործոն է օտարերկրյա ներդրումների համար։

Լուկաշենկոն առաջին անգամ պատմել է ևս մեկ չկայացած նախագծի մասին։ Նրա խոսքով, խոսքը վերաբերել է Ադրբեջանից Վրաստան ապրանքների խողովակաշարին, և Բելառուսի նախագահն այս հարցով խոսել է այդ երկու երկրների ղեկավարների հետ:

«Նրանք խողովակաշար էին կառուցում, իմ կարծիքով՝ գազի, որը շրջանցում էր Հայաստանը», - ասել է նա:

Լուկաշենկոն նշել է, որ այն ժամանակ շփումներ է ունեցել Ադրբեջանի նախագահ Իլհամ Ալիևի հետ, որպեսզի նա խոսի Հայաստանի նախագահ Սերժ Սարգսյանի հետ, որ խողովակաշարն անցնի Հայաստանի տարածքով, ինչը շահավետ կլինի երկու կողմերի համար:

«Սակայն հայերը դրանից էլ հրաժարվեցին: Բայց ամեն ինչ խաղաղությամբ է ավարտվելու», - ասել է Բելառուսի առաջնորդը։