Արձանագրել ենք Մանվել Գրիգորյանի առողջական և հոգեբանական վիճակի բացասական դինամիկա. ՄԻՊ

Իրավունք 13:06 14/12/2018 Հայաստան

Արձանագրել ենք Մանվել Գրիգորյանի առողջական և հոգեբանական վիճակի բացասական դինամիկա. ՄԻՊ

ՄԻՊ աշխատակիցները, այդ թվում բժիշկը պարբերաբար այցելում են կալանավորված գեներալ Մանվել Գրիգորյանին։ Օրեր առաջ Մարդու իրավունքների պաշտպան Արման Թաթոյանն անձամբ է այցելել ու առանձնազրույց ունեցել նրա հետ։ Լրագրողների հետ ճեպազրույցում Արման Թաթոյանն ասաց, որ առանձնազրույցի արդյունքներով գրություններ է ուղարկել քրեական հետապնդման մարմին և արդարադատության նախարարություն։

«Կարող եմ հայտնել այն, որ մենք արձանագրել ենք առողջական և հոգեբանական վիճակի բացասական դինամիկա»,-նշեց Արման Թաթոյանը:

Ավելի վաղ Panorama.am-ին Մանվել Գրիգորյանի պաշտպան Արսեն Մկրտչյանն ասել էր, որ իր պաշտպանյալի առողջական վիճակը գնալով վատանում է։

«Մանվել Գրիգորյանն անկողնային մի օր էլ չի ապրելու, ինչպես ինքն է ասում։ Ոտքի վրա է տանում հիվանդությունը։ Օրական ստանում է 20 հաբ դեղ, խմում է 30 միավոր ինսուլին այն դեպքում, երբ կալանավորվելուց առաջ ինսուլինից կախվածություն չի ունեցել։ Շաքարի ցուցանիշը նախքան կալանքը եղել է 7-ից ցածր։ Կալանավորումից հետո շաքարային դիաբետը զարգացել է այն աստիճանի, որ այսօր պրոֆեսիոնալ բժիշկները հայտարարում են՝ կա վերջույթները հեռացնելու վտանգ, գանգրենոս պրոցեսներ կան»,- մասնավորապես ասել էր փաստաբանը։

Հիշեցնենք, որ դեկտեմբերի 12-ին դատարանի որոշմամբ Մանվել Գրիգորյանի կալանքի ժամկետը երկարաձգվել է ևս երկու ամսով։

Մանվել Գրիգորյանը կալանավորված է հունիսի 19-ից: Նրան մեղադրանք է առաջադրվել ՀՀ քրեական օրենսգրքի 235-րդ հոդվածի 2-րդ մասով՝ ապօրինի կերպով ռազմամթերք ձեռք բերելու և այլ անձանց հետ նախնական համաձայնությամբ պահելու համար, ինչպես նաև ՀՀ քրեական օրենսգրքի 179-րդ հոդվածի 3-րդ մասի 1-ին կետով՝ մի խումբ անձանց հետ նախնական համաձայնությամբ յուրացման եղանակով իր վստահությանը հանձնված առանձնապես խոշոր չափերով ուրիշի գույք հափշտակելու համար:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: